¹ خداوندَ شکر بوکونید و اونِ عظیمِ نامَ دخَأنید، اونِ کارانَ همۀ قؤمَأنِ رِه تعریف بوکونید. ² اونِ رِه سرود بوگوئید و اونِ ستایشِ رِه سرود بخَأنید، اونِ عظیمِ کارانَ مردمَ بوگوئید. ³ اونِ قدوسِ نامَ افتخار بوکونید. کسانی دیل کی خداوندِ دونبال گردد شادمان بیبه. ⁴ خداوند و اونِ قوّتَ طالب بیبید، همیشه اونِ جَه کمک بخَأئید ⁵ و کارایِ عجیبی کی بوکوده یَ به یاد بأورید، اونِ معجزه یان و اونِ داوری یانَ به یاد بأورید. ⁶ ای اونِ بنده ابراهیمِ نسل، ای یعقوبِ زَأکأن کی اونِ انتخاب بوبُسته اید. ⁷ یهوَه اَمی خدایه، اون همۀ جهانَ داوری کونه. ⁸ اون تا اَبد عهدی یَ کی دوَسته دَأره به یاد دَأره، و قَسمی کی بوخورده یَ وفادار مَأنه حتی اگر هزاران پوشت هم بوگذره. ⁹ اون عهدی یَ کی ابراهیمِ اَمرَه دوَست، و قَسمی کی اسحاقِ رِه بوخوردَه، ¹⁰ ایتَه فریضه مَأنستَأن یعقوبِ رِه استوار بوکود و ایتَه عهدِ همیشگی مَأنستَأن اسرائیلِ رِه. ¹¹ اون اسرائیلَ بوگوفت: کنعانِ سرزمینَ شمرَه بخشم تا شیمی میراث همیشگی بیبه. ¹² اونموقع کی اوشَأنِ نفرات کم بو و کنعانِ سرزمینِ میَأن غریب بود، ¹³ اونموقعی کی جی قؤمی به قؤمِ دیگر آواره بود و جی مملکتی به مملکت دیگر سرگردان، ¹⁴ وَأنَأشت کسی اوشَأنَ ظلم بوکونه، بلکی پادشاهانَ اوشَأنِ وَسی هشدار بدَه و بوگوفت: ¹⁵ شیمی دسَ می مَسیحانِ رو درازَ نوکونید و می اَنبیایَ آزار نرسَأنید. ¹⁶ خداوند اون سرزمینِ رو قحطی بوجود بأورد و هیچ چی خوردَأنِ رِه پیدا نوبوسته. ¹⁷ و مردی یَ اوشَأنِ پیشاپیش اوسه کود یعنی یوسفَ، کی اونَ بردگی رِه بوفروختد. ¹⁸ اونِ پاهانَ زنجیرِ اَمرَه دوَستد و اونِ گردنِ دور آهنی حلقه تَأوَأدد ¹⁹ تا وختی کی یوسفِ پیشگویی یان اتفاق دکفت و، خداوندِ کلام اونِ دوروستی یَ ثابت بوکود. ²⁰ اونموقع فرعون اوسَه کود تا اونِ زنجیرانَ بازَه کوند. قومَأنِ پادشاه اونَ آزادَ کود. ²¹ اونَ خو خانه حاکم بوکود و خو همۀ سرزمینِ فرماندار. ²² تا همۀ مملکتِ پیله کسان اونِ جَه فرمان بوبورد و قؤمِ شیخَأنَ حکمت تعلیم بده. ²³ بازن اسرائیل بوشود مصر، و یعقوب غریبانِ مَأنستَأن حامِ زمینِ میَأن سامان بیگیفت. ²⁴ خداوند در اویَ خو قؤمَ بارور بوکود و زَأکأنِ زیادی اوشَأنَ فَأدَه، و اوشَأنَ جی اوشَأنِ دوشمنان قویترَه کود. ²⁵ خداوند کاری بوکود کی مصرِ مردم اونِ قؤمِ جَه نفرت بدَأرد، و اونِ خادمینِ مرَه نیرنگِ اَمرَه رفتار بوکوند. ²⁶ بازن خدا خو خادم موسی و خو انتخاب بوکوده هارونَ اوسَه کود. ²⁷ اوشَأن اونِ کلمات و معجزه یان، و اونِ کارایِ عجیبَ مصرِ میَأن آشکارَ کودد. ²⁸ خدا ظلمتَ اوسه کود کی تاریکی یَ بوجود بأورد، ولی مصریان اونِ کلامِ اَمرَه مخالفت بوکودد. ²⁹ اوشَأنِ رودخانه یانِ آبَ به خون تبدیل بوکود و اوشَأنِ ماهیان بمردد. ³⁰ بازن قورباغه یان اون سرزمینَ فوتورکستد، حتی فرعونِ قصرم قورباغه جَه پورَه بوست. ³¹ خداوند اَمر بوکود، و مگسان و پونیشان همۀ او سرزمینَ پورَه کودد. ³² بارانِ جا، تگرگ بوارانه و، رعد و برقَ اوشَأنِ سرزمینِ طرف اوسه کود. ³³ اوشَأنِ تاکستانان و انجیر داران، و همۀ اوشَأنِ دارانَ بیشکینه و جی میَأن بوبورد. ³⁴ اون بفرماست و ملخ بوجود بأمو، انواع ملخانی کی جی بس زیاد بود نِشَأسته ایشمَأردَن. ³⁵ ملخان همۀ اوشَأنِ محصول و همۀ اوشأنِ میوه یانَ بوخوردد. ³⁶ خداوند همۀ مصرِ پیله زَأکأنَ بوکوشت، اوشَأنِ قوّتِ نوبرَ.