¹³ جی آسمان کوه هانِ رو باران وأرأنی و زمینَ جی خودتِ نعمتان پورَه کونی. ¹⁴ حیوانانِ غذا رِه علف جُر اَوری و انسانانِ رِه سبزیان و غله یانَ، ¹⁵ و شرابَ کی آدمِ دیلَ شادَ کونه، و روغن کی اونِ رویَ وَأکونه و شادابَ کونه، و نانَ کی اونِ جانَ قوّت دِهه. ¹⁶ خداوندِ داران سیرابد، یعنی لبنانِ سروِ داران کی تو اوشَأنَ بکاشته ایی ای خداوند، ¹⁷ و پرنده یان اوشَأنِ رو خوشَأنِ لانه یانَ چَأکوند. ولی لک لک لانه صنوبر رو نَهه. ¹⁸ پیلدانه کوه هان بزِ کوهی شینه، و صخره یان خرگوشانِ پناهگاه. ¹⁹ اون ماهَ فصلانِ تعیین کودَأنِ رِه چَأکود و آفتاب، خو غروب کودَأنِ وختَ دَأنه. ²⁰ تاریکی چَأکونی و شب بِه، و همۀ جنگلِ حیوانان خوشَأنِ لانه یانِ جَه بیرون اَید. ²¹ جوانِ شیران شکارِ رِه غرش کوند و خوشَأنِ روزی یَ خدا جَه خَأید. ²² وختی آفتاب بیرون اَیه، دوباره جمعَ بود خوشَأنِ لانه یانِ دورون و خوسد.