¹ بعدِ اَنْ عیسی ایتَه مدت اُستانِ جلیلِ دورون گردسته، چون نخَأسته یهودیه میَأن بِئسِه، چره کی یهودیان خَأستد اونَ بوکوشد. ² وختی عیدِ خیمه یان کی ایتَه از یهودیانِ عیدانه نزدیکَ بوست، ³ عیسی برأرأن اونَ بوگوفتد:«جی اَیَ بوشو یهودیه تا کسانی کی ترَه پیروی کوند تی کارانَ بیدیند، ⁴ چون هر کی بخَأیه شناخته بیبه خلوتی کار نوکونه، تو کی اَ کارانَ کونی بدَه دونیا ترَه بیدینه» ⁵ چون حتی اونِ برأرأنم اونَ ایمان نأورده بود. ⁶ عیسی اوشَأنَ بوگوفت:«می وخت هنوز فأنرسه دَأره، ولی شمرِه فرقی نوکونه کِی بیشید، ⁷ دونیا شیمی جَه نفرت نَئره، ولی می جَه نفرت دَأره، چون من شهادت دهم کی اوشَأنِ اعمال بده، ⁸ شومَأن بیشید و عیدِ مراسمِ میَأن شرکت بوکونید، ولی من فعلاً نَأیم، چون هنوز می وخت فأنرسه دَأره.» ⁹ عیسی اَنَ اوشَأنَ بوگوفت و جلیلِ میَأن بِئسَه. ¹⁰ بعدِ اَنکی عیسی برأرأن عیدِ رِه بوشود اورشلیم، اونم بوشو، ولی نه آشکارا بلکی خلوتی بوشو. ¹¹ عیدِ اَیامِ رِه یهودیان اونِ دونبال گردستد و وَأورسِئد:«پس عیسی کَ یَ ایسَه؟» ¹² مردمِ میَأنم بحث زیاد بو. بعضی اونِ طرفدار بود و گوفتد:«عیسی آدمِ خوبیه» ولی بعضیان اونِ مخالف بود و گوفتد:«نه، عیسی مردمَ گومراه کونه» ¹³ ولی چون مردمْ سرانِ یهودِ جَه ترسِئِد جرأت نوکودد علنی دربارۀ عیسی حرف بزند. ²⁵ پس بعضی جی اورشلیمِ مردم بوگوفتد:«اَن هون کسی نییه کی خَأید اونَ بوکوشد؟ ²⁶ اونْ هَسَه آشکارا موعظه کونه و کسی اونَ حرفی نزنه، مگه قؤمِ سران قبول بوکوده دَأرد کی اون واقعاً مسیحه؟ ²⁷ ولی اَن اِمکان نَئره، چون اَمَأن دأنیم اَ شخص کَ یَ شینه، ولی وختی مسیح ظهور بوکونه هیچکس نَأنه اون کَ یَ شینه.» ²⁸ هَنه وَسی وختی عیسی معبدِ دورون تعلیم دَئه صدایِ بلندِ اَمرَه بوگوفت:«شومَأن مرَه شناسید و دَأنید کَ یَ شینم، ولی من خودم مِرِه نَأموم، بلکی کسی مرَه اوسَه کوده کی حقه و شومَأن اونَ نَشنَأسید. ²⁹ ولی من اونَ شِناسم، چون اونِ طرفِ جَه بأموم و اون مرَه اوسَه کوده.» ³⁰ هَ موقع اوشَأن خَأستد اونَ بیگیرد ولی کسی جرأت نوکود اونَ دس درازَ کونه، چون هنوز اونِ وخت نرسه بو. ³¹ ولی خیلیان اونَ ایمان بأوردد و بوگوفتد:«آیا وختی مسیح بَأیه، اَ شخصِ جَه ویشتر مُعجزه کونه؟» ³² وختی فریسیان و کاهنانِ سران بیشتَأوستد کی مردم دربارۀ عیسی چی گوید، سریع مأمور اوسه کودد تا اونَ بیگیرد. ³³ اونموقع عیسی مردمَ بوگوفت:«فقط ایتَه مدتِ کوتاه شیمی اَمرَه ایسم و بازن شؤم کسی ورجَه کی مرَه اوسه کوده. ³⁴ اونموقع شومَأن می دونبال گردید ولی مرَه پیدا نوکونید، و اون جایی کی من ایسَم شومَأن نتَأنید بأئید.» ³⁵ پس یهودیان همدیگرَ بوگوفتد:«اون کَ یَ خَأیه بیشه کی اَمَأن نتَأنیم اونَ پیدا کونیم؟ آیا خَأیه بیشه یهودیانی ورجَه کی یونانیانِ میَأن پراکنده ید و یونانیانَ تعلیم بده؟ ³⁶ اونِ منظور چی بو کی بوگوفت؛ می دونبال گردید ولی مرَه پیدا نوکونید، و اون جایی کی من ایسم شومَأن نتَأنید بأئید؟» ³⁷ عیدِ آخرین روزِ رِه کی عیدِ مهمترین روز بو، عیسی بِئسَه و صدایِ بلندِ اَمرَه بوگوفت:«اگر کسی یَ تشنه یه بأیه می ورجَه و بوخوره، ³⁸ هوطویی کی کلام گویه، هر کی مرَه ایمان بأوره، اونِ وجودِ جَه نهرِ آبِ زنده جاری بِه.» ³⁹ عیسی منظور جی نهرِ آبِ زنده هون روح القدس بو کی کسانی یَ فَأدَه بِهه کی عیسی یَ ایمان بأورد، ولی روح القدس هنوز کسی یَ عطا نوبوسته بو، چون عیسی هنوز جلال پیدا نوکوده بو. ⁴⁰ وختی مردم اَ گبانَ بیشتَأوستد بوگوفتد:«اَ مرد واقعاً هون نبی ایی ایسه کی وَأستی قبلِ مسیح بأیه» ⁴¹ و بعضی دیگر بوگوفتد:«اون خودش مسیحه» ولی بعضی وَأورسِئد:«مگر مسیح جلیلِ جَه ظهور کونه؟ ⁴² مگر کیتاب مقدس نوگویه کی مسیحْ داودِ پادشاه نسلِ جَه یه و بیت لَحمِ میَأن بودونیا اَیه؟ یعنی هون دَهاتی کی داود بودنیا بأمو؟» ⁴³ پس دربارۀ عیسی مردمِ میَأن اختلاف دکفت. ⁴⁴ بعضیان خَأستد اونَ بیگیرد، ولی کسی اونَ دس درازَ نوکود. ⁴⁵ و مأمورانی کی بوشو بود عیسی یَ بیگیرد دس خالی وَأگردستد فریسیان و سرانِ کاهنانِ ورجَه، اوشَأنْ مأمورانِ جَه وَأورسد:«پس چره اونَ نأوردید؟» ⁴⁶ مأموران جواب بدَأد:«تا هَسَه کسی اَ مردِ مَأنستَأن اَطو قشنگ گب نزَه بو.» ⁴⁷ فریسیان اوشَأنَ بوگوفتد:«شومَأنم گومراه بوبُستید؟ ⁴⁸ آیا حتی ایتَه جی اَمَأن فریسیان یا قؤمِ پیله کسان اونَ ایمان بأورده ایم؟ ⁴⁹ اَ مردمِ ناداند کی اونَ ایمان بأورددْ اوشَأنْ شریعتِ جَه هیچی نَأند. خدا لعنت بر اوشَأن.» ⁵⁰ نیقودیموس کی شب بوشو بو عیسی دِئِنِ رِه و ایتَه جی اوشَأن بو وَأورسه: ⁵¹ «آیا شریعت وَأله اَمَأن کسی یَ محکوم بوکونیم بدونِ اَنکی اونِ گبانَ گوش بدیم و بدَأنیم چی بوکوده؟» ⁵² اوشَأن نیقودیموسَ بوگوفتد:«مگر تو هم جلیلی ایسی؟ بوشو کیتاب مقدسَ بررسی بوکون و بیدین کی هیچ نبی ایی جلیلِ جَه ظهور نوکوده.» ⁵³ بازن هر کودام بوشود خوشَأنِ خانه.