¹ بعدِ ایتَه مدت عیسی بوشو دریاچۀ جلیلِ اوطرف. دریاچۀ جلیلَ، دریاچۀ طبریه هم گوید. ² خیلی از مردم اونِ دونبال راه دکفتد، چون مُعجزاتی کی کوده و مریضانَ شفا دَئه یَ بیده بود. ³ پس عیسی بوشو ایتَه کوه جُر و خو شاگردانِ اَمرَه اویَ بینیشت. ⁴ یهودیانِ عیدِ فِصح نزدیک بو. ⁵ وختی عیسی خو دور و وَرَ فأندرست و بیده کی جمعیتِ زیادی اونِ طرف اَمون دردْ فیلیپُسَ بوگوفت:«کَ یَ جَه نان بِهِنیم تا اَشَأنْ بوخورد؟» ⁶ عیسی اَ سوالَ وَأورسه تا اونَ اِمتحان بوکونه، چون خودش دَأنسته کی چی خَأیه بوکونه. ⁷ فیلیپُس جواب بدَه:«دویست دینار نانم اَشَأنِ رِه وَست نیه، حتی اگر هر کودام ایبچه بوخورد.» ⁸ ایتَه جی شاگردان کی آندریاس نام دَأشته و شمعونِ پطرسِ برأر بو اونَ بوگوفت: ⁹ «ایتَه پسر زَأی اَیَه ایسَه کی پنج تَه نانِ جو و دو تَه ماهی دَأره، ولی اَنهمه آدمِ رِه اَن چی کونه؟» ¹⁰ عیسی بوگوفت:«مردمَ بینیشَأنید» اویَ سبزه زیاد بو، پس مردمَ سبزه یانِ رو بینیشَأنِد، فقط مردَکأن اون جمعیتِ میَأن حدود پنج هیزار نفر بود. ¹¹ بازن عیسی نانَ بیگیفت و شُکر بوکود و خو شاگردانَ فأدَه کی مردمِ میَأن قسمت بوکوند، و ماهیانم هَطو، و هو اندازه کی مردم بخَأستد اوشَأنَ فأدَد. ¹² وختی همه سِئرَ بوستد خو شاگردانَ بوگوفت:«خورده نانانَ جمعَ کونید تا چیزی هَدر نیشه» ¹³ پس شاگردان خورده نانانَ کی زیاد بأمو بو جمعَ کودد و دوازدَه سبد پور بوبُست. ¹⁴ مردم اَ مُعجزه یَ کی عیسی جَه بیدد بوگوفتد:«حتماً اَن هون نبی ایی ایسه کی وَأستی به اَ جهان بأیه» ¹⁵ وختی عیسی بفهمست کی اوشَأنْ خَأید اونَ بزور بوبورد و خوشَأنِ پادشاه چَأکوند، اوشَأنِ جَه سیوایَ بوست و تنهایی بوشو کوه جُر. ¹⁶ غروب دمِ رِه شاگردان بیجیر بأمود و بوشد دریا طرف. ¹⁷ چون هوا تاریکَ بوسته بو و عیسی هم وَأنگردسته بو، اوشَأنْ قایقَ سوارَ بوستد و حرکت بوکودد بوشود کفرناحومِ طرفْ، کی دریا اوطرف نَهَه بو. ¹⁸ بادِ شدیدی بأمو و دریا کولاک بوبُست. ¹⁹ وختی حدودِ پنج شیش کیلومتر جولو بوشو بود، عیسی یَ بیدد کی آبِ رو قدم زنه و قایقِ طرف اَیه. اوشَأن بترسِد. ²⁰ ولی عیسی اوشَأنَ بوگوفت:«نترسید، منم» ²¹ وختی خَأستد اونَ بأورد قایقِ دورون، هو لحظه قایق فأرسه ساحلَ. ²² فردایی صبحْ مردمی کی دریا اوطرف ایسَه بود دوباره جمعَ بوستد تا عیسی یَ بیدیند، چون بیده بود کی اویَ هیچ قایقی نِنَه بو جُز هونی کی شاگردانْ اونِ اَمرَه بوشو بود و عیسی هم اون قایقَ سوارَ نوبوسته بو، بلکی شاگردان تنهایی بوشو بود. ²³ ولی چن تَه قایقِ دیگر جی طبریه فأرسد به هون محلی کی خداوند نانانَ برکت بدَه بو و مردم بوخورده بود. ²⁴ مردم وختی بیدد کی عیسی و اونِ شاگردان اویَ نِئسَأد، اونْ قایقانَ سوارَ بوستد و بوشود کَفرناحوم تا عیسی یَ پیدا کوند. ²⁵ وختی فأرسد اویَ و عیسی یَ پیدا کودد وَأورسد:«اُستاد، کِی بأمویی اَیَه؟» ²⁶ عیسی جواب بدَه:«شمرَه گویم؛ یقین بدَأنید می دونبال گردید نه مُعجزاتی وَسی کی بیده اید، بلکی اون نانی وَسی کی بوخوردید و سِئرَ بوستید. ²⁷ تلاش بوکونید، ولی نه خوراکِ جی میَأن شوئونی رِه، بلکی خوراکی رِه کی تا حیاتِ جاودانی باقی مَأنه، یعنی خوراکی کی انسانِ پسر شمرَه فَأده، چون خدایِ پئرْ اونَ مُهرِ تأئید بزَه دَأره.» ²⁸ اوشَأن وَأورسد:«چی بوکونیم تا کارهایی کی خدا اَمی جَه خَأیه یَ انجام بدیم؟» ²⁹ عیسی اوشَأنَ جواب بدَه:«اون کاری کی خدا شیمی جَه خَأیه اَنه، اون کسی کی اون اوسِه کوده یَ ایمان بأورید.» ³⁰ اوشَأن بوگوفتد:«چه مُعجزه ایی انجام دیهی تا اونَ بیدینیم و ترَه ایمان بأوریم؟ چی کونی؟ ³¹ اَمی پئران بیابانِ میَأن "مَنّ" بوخورددْ هوطویی کی کیتاب مقدسِ میَأن بینیویشته بوبُسته؛ اون جی آسمان اوشَأنَ نان فأدَه تا بوخورد» ³² عیسی اوشَأنَ بوگوفت:«شمرَه گویم یقین بدَأنید کی موسی نوبو کی جی آسمان اوشَأنَ نان فَأده، بلکی می پئرْ خدا بو، و هَسَه هم اونه کی خَأیه نانِ حقیقی یَ جی آسمان شمره فَأده. ³³ چون اَ نانِ حقیقی یَ خدا جی آسمان بیجیر بأورده تا جهانَ حیات ببخشه.» ³⁴ بازن اونَ بوگوفتد:«ای آقا، هر روز جی اَن نان اَمرَه فَأدن» ³⁵ عیسی اوشَأنَ بوگوفت:«من نانِ حیاتم، هر کی می ورجَه بأیه هیچموقع ویشتا نیبه و هر کی مرَه ایمان بأوره هیچموقع تشنَه نیبه. ³⁶ ولی هوطویی کی قبلاً شمرَه بوگوفتم با اَنکی مرَه بیده اید ایمان نأوردید. ³⁷ همۀ کسانی کی پئرْ مرَه عَطا کونه می طرف اَیدْ، و کسی کی می طرف اَیه هیچموقع خودمِ جَه دورَه نوکونم. ³⁸ چون من جی آسمان بیجیر بأموم نه اَنِ وَسی کی خودمِ اِراده یَ انجام بدم، بلکی کسی اِراده یَ کی مرَه اوسَه کوده. ³⁹ و اونی کی مرَه اوسَه کوده اِراده اَنه، اون کسانی کی مرَه فَأده دَأره جَه، حتی اینفرم جی دس ندم، بلکی روزِ قیامتِ رِه اوشَأنَ ویریزَأنم. ⁴⁰ چون می پئرِ اِراده اَنه هر کی پسرَ بیدینه و اونَ ایمان بأوره، حیاتِ جاودانی صاحاب بیبه و من روزِ قیامتْ اوشَأنَ ویریزَأنم.» ⁴¹ بازن یهودیانْ سر و صدا و اعتراض بوکودد چره کی بوگوفته بو:«منم اون نانْ کی جی آسمان بیجیر بأمو» ⁴² و همدیگرَ گوفتد:«اَن عیسی، یوسفِ پسر نییه کی اَمَأن اونِ پئر و مارَ شناسیم؟ پس چوطویه کی گویه من آسمانِ جَه بیجیر بأموم؟» ⁵⁷ هوطویی کی پئرِ زنده مرَه اوسه کود و من بواسطۀ پئرْ زنده یم، هر کی مرَه بوخوره بواسطۀ من زنده مَأنه. ⁵⁸ اَن اون نانی ایسه کی آسمانِ جَه بیجیر بأمو، نه اون نانی مَأنستَأن کی شیمی پئران بیابانِ میَأن بوخوردد و بمردد، بلکی هر کی اَ نانِ جَه بوخوره تا اَبد زنده مَأنه.» ⁵⁹ عیسی اَ گبانَ وختی بزَه کی شهرِ کَفرناحومِ میَأن ایتَه کَنیسه دورون تعلیم دَئِه. ⁶⁰ اَ پیغامِ درک کودَأن اَقدر سخت بو کی حتی اونِ شاگردانم وختی بیشتَأوستد همدیگرَ بوگوفتد:«اَ تعلیم سخته، کیی تَأنه اونَ بفهمه؟» ⁶¹ وختی عیسی متوجه بوبُست کی شاگردان دربارۀ اَ موضوع اعتراض دَأرد اوشَأنَ بوگوفت:«آیا اَ گبان باعث بِه شومَأن لغزش بوخورید؟ ⁶² پس اگر انسانِ پسرَ بیدینید کی بوجُر شوئون دره به هون جایی کی اول ایسَه بو چی کونید؟ ⁶³ روحه کی زندَه کونه، ولی جسمِ جَه فایده ایی نییه. کلامی کی من شمرَه گویم، روح و حیاته. ⁶⁴ ولی بعضی جی شومَأن ایمان نأورید» چون عیسی جی هون اول دَأنسته چی کسایی اونَ ایمان نأورد و کیی اونَ تسلیم کونه. ⁶⁵ پس عیسی بوگوفت:«هَنه وَسی شمرَه بوگوفتم کی هیچکس نتَأنه می ورجَه بأیه مگر اَنکی می پئر اونَ عطا بوکوده بِه.» ⁶⁶ بعدِ اَ حرفانْ، خیلی از اونِ شاگردان اونِ جَه رو وأگردَأند و دِ اونَ همراهی نوکودد. ⁶⁷ اونموقع عیسی رو بوکود اون دوازدَه شاگردَ و بوگوفت:«آیا شومَأنم خَأئید بیشید؟» ⁶⁸ 8 شمعونِ پطرس جواب بدَه:«ای اُستاد، کی ورجَه بیشیم؟ کلماتِ حیاتِ جاودانی تی ورجَه نَهَه.» ⁶⁹ اَمَأن ایمان بأورده و بشناخته ایم کی تو، مسیحْ، خدایِ زنده پسری.» ⁷⁰ عیسی اوشَأنَ بوگوفت:«آیا من شومَأن دوازده نفرَ انتخاب نوکودم؟ ولی ایتَه جی شومَأن ابلیسی ایسه.» ⁷¹ و اَنَ دربارۀ یهودا، شمعونِ اسخریوطی پسر بوگوفت، چون اونْ جُزِ اون دوازده شاگرد بو و بعدِ مدتی عیسی یَ دوشمنِ دس تسلیم بوکود.