¹ بعدِ مدتی عیسی بوشو اورشلیم تا ایتَه از یهودیانِ عیدانِ دورون شرکت بوکونه. ² اورشلیمِ میَأن، دروازۀ گوسفندِ ورجَه، ایتَه حوض نَهه کی اونَ به زبانِ عِبری "بیت حِسدا" گویده و پنج تَه اِیوان دَأره. ³ اون حوضِ اِیوانانِ دورون خیلی از مریضان و کوران و فلجان و شَلاَن خوفتِد و آبِ حرکتِ رأفأ ایسَأئِد. ⁴ چونکی هر چند وخت یکبار خداوندِ فرشته اَمویه و استخرَ بودورون شوئه و آبَ تکان دَئه، و اولین مریضی کی بعدِ آبِ تکان خوردن شوئِه استخرِ دورونْ، هر مریضی ایی جَه کی دَأشته شفا پیدا کوده. ⁵ اون مریضانِ میَأن ایتَه مَردای ایسَه بو کی سی و هشت سال بو زمینگیر بود. ⁶ وختی عیسی اونَ بیده و بفهست کی اونِ مریضی طول بکشه دَأره اونِ جَه وَأورسه:«خأیی شفا پیدا کونی؟» ⁷ اون مریض جواب بدَه:«ای آقا، وختی آب تکان خوره من کسی یَ نَئرم کی مرَه کمک بوکونه تا بوشوم استخرِ دورون، تا من می جا جَه تکان بوخورم کسِ دیگری پیشتر جی من شِه استخرِ دورون.» ⁸ عیسی اونَ بوگوفت:«ویریز و تی جایَ جمعَ کون و بوشو!» ⁹ اون مرد هو لحظه شفا پیدا کود و خو جایَ جمعَ کود و راه دکفت بوشو. اون روز شنبه، و روزِ سَبَّت بو. ¹⁰ هَنه وَسی یهودیان اون کسی کی شفا پیدا کوده بویَ بوگوفتد:«امروز روزِ سَبَّته و تو حقَ نَئری تی رختخوابَ جمعَ کونی» ¹¹ اون مردای جواب بدَه:«اون مردی کی مرَه شفا بدَه بوگوفت کی تی رختوابَ جمعَ کون» ²⁴ یقین بدَأنید هر کس می گبانَ بیشتَأوه و کسی کی مرَه اوسه کوده یَ ایمان بأوره، حیاتِ جاودانی دَأره و هیچموقع محکوم نیبه، بلکی مرگِ جَه نجات پیدا کونه و حیاتِ اَبدی یَ مُنتقل بِه. ²⁵ یقیین بدَأنید زمانی فأرسه، بلکی هَسَه فأرسه دَأره کی مُرده یانْ خدا پسرِ صدایَ ایشتَأود و هر کی بیشتَأوه زنده بِهِه. ²⁶ چون هوطو کی پئرْ خو دورون حیات دَأره، پسرم عَطا بوکوده کی خو دورون حیات بدَأره. ²⁷ و اونَ اختیار بدَه دَأره کی داوری هم بوکونه، چون انسانِ پسره. ²⁸ اَ گبِ جَه تعجب نوکونیدْ چون زمانی اَیِه کی همۀ مُرده یانْ اونِ صدایَ ایشتأود. ²⁹ و قبرانِ جَه بیرون اَید، دوروستکارانْ زندگی اَبدی رِه، و گوناهکارانم محکومیتِ اَبدی رِه. ³⁰ من از خودم کاری نتَأنم بوکونم، بلکی بر طبقِ اونچی کی ایشتَأوم داوری کونم، و می داوری عادلانه یه، چره کی نخَأیم خودمِه اِراده یَ بجا بأورمْ بلکی پئری اِرادۀ کی مرَه اوسه کوده. ³¹ اگر من خودم، خودمِ رِه شهادت بدم می شهادت اعتباری نَئره. ³² ولی دیگری ایسَه کی دربارۀ من شهادت دِهه و دَأنم کی اونِ شهادت راسته. ³³ شومَأن یحیی ورجَه قاصدانی اوسَه کودید و اونْ به حقیقتْ، شهادت بدَه. ³⁴ نه اَنکی من نیاز بدَأرم انسان مِرِه شهادت بده، بلکی شیمی وَسی بوگوفتم تا نجات پیدا کونید. ³⁵ یحیی چراغی یَ مَأنسته کی سوخته و روشنایی فأدَه یه و شومَأن خَأستید کی ایتَه مدت اونِ نورِ دورون شادی بوکونید. ³⁶ ولی من شاهدی هم دَأرم پیله تر جی یحیی، کارایی کی پئر مرَه عطا بوکوده تا کامل بوکونم، یعنی هَ کارایی کی انجام دهم، اَن حقیقتَ شهادت دهد کی مرَه پئر اوسَه کوده. ³⁷ و هون پئری کی مرَه اوسه کوده خودش هم مرِه شهادت دِهه، شومَأن هیچموقع نه اونَ بیده اید و نه اونِ صدایَ بیشتَأوسته اید. ³⁸ و اونِ کلامْ شیمی میَأن ساکن نییِه، چون اونِ اوسه کوده یَ ایمان نَئرید. ³⁹ شومَأن کیتاب مقدسَ تفتیش کونید چون خیال کونید کی اونِ دورون حیاتِ جاودانی پیدا کونید، در حالی کی هون کیتابان مِرِه شهادت دهد. ⁴⁰ ولی بازم نخَأئید می طرف بأئید و حیاتِ جاودانی پیدا کونید. ⁴¹ نخَأیم مردم مرَه احترام بوکوند، ⁴² ولی شمرَه خوب شناسم و دَأنم کی شیمی دیلِ دورون خدایَ دوس نَئرید. ⁴³ من بنامِ می پئر بأموم ولی شومَأن مرَه قبول نوکونید، ولی اگر کسی بنامِ خودش بأیه و خودتانِ جنس بیبه اونَ قبول کونید. ⁴⁴ شومَأن چوطو تَأنید ایمان بأورید؟ در حالی کی خَأئید مردم شمرَه احترام بند و اونْ عزّت و احترامی کی خدا طرفِ جَه اَیِه یَه توجهی نَئرید. ⁴⁵ ولی فکر نوکونید که من پئرِ ورجَه شیمی جَه شکایت کونم، نه، کسی کی شیمی جَه شکایت کونه موسی یه، هون موسایی کی اونَ اُمید دَوسته دَأرید. ⁴⁶ چون اگر موسی یَ ایمان دَأشتید مرَه هم ایمان اَوردید، چونکی اونْ دربارۀ من بینیویشته دَأره. ⁴⁷ ولی اگر اونِ نوشته یانَ قبول نوکونید، چوطو می گبانَ قبول کونید؟»