¹ وختی عیسی بفهمست کی فَریسیان بیشتَأوسته دَأرد کی اون ویشتر جی یحیی، شاگرد پیدا کوده دَأره و مردمَ تعمید دِهه. ² هر چند عیسی شاگردان تعمید دَئِد نه خودش. ³ یهودیه جَه بیرون بوشو و وَأگردست استانِ جلیلِ طرف. ⁴ ولی لازم بو کی سامره جَه بوگذره. ⁵ پس شهرِ سوخارَ فَأرسِه، کی نزدیک زمینی بو کی یعقوبْ خو پسر یوسفَ فَأدَه بو. ⁶ یعقوبِ چاهْ اویَ نَهه بو و عیسی کی سفرِ جَه خستَه بوسته بو، چاه کنار بینیشت، حدوداً ظهر بو. ⁷ هَ موقع ایتَه زنِ سامری بأمو تا چاه جَه آب فأکشه. عیسی اونَ بوگوفت:«ایبچه آب مرَه فَأدن» ⁸ چون اونِ شاگردان بوشو بود شهرْ تا غذا بِهند. ⁹ زنِ سامری اونَ بوگوفت:«چوطو تو کی یهودی ایسی، می جَه کی ایتَه زنِ سامری یم آب خَأیی؟» اون اَ حرفَ بزه چون یهودیانْ سامریانِ مرَه معاشرت نوکوند. ¹⁰ عیسی جواب بدَه:«اگر دَأنستی کی خدا بخشش چیسه، و کیسه کی تی جَه آب خَأیه، حتماً اونِ جَه خواهش کودی کی ترَه آبِ زنده عَطا بوکونه.» ¹¹ زن بوگوفت:«ای آقا، تو کی سطل نَئری و چاه هم کی عُمق دَأره، پس کَ یَ جَه آبِ زنده اَوری؟ ¹² آیا تو اَمی پئر یعقوبِ جَه پیله تری کی اَ چاهَ اَمرَه فَأدَه و خودشْ و اونِ پسران و اونِ گله یان اَ چاه جَه آب خوردد؟» ¹³ عیسی بوگوفت:«هر کی اَ آبِ جَه بوخوره بازم تشنه بِهه. ¹⁴ ولی هر کس اون آبی جَه کی من اونَ فَأدم بوخوره هیچموقع تشنه نیبه، چون اون آبْ اونِ وجودِ دورون چشمه ایی یَ تبدیل بِهه کی تا حیاتِ جاودانی جوش کونه.» ¹⁵ زن اونَ بوگوفت:«ای آقا، جی اون آب مرَه فَأدن تا دِ تشنه نوبوم و مجبور نوبوم آب فَأکشنِ رِه تا اَیَ بَأیم.» ¹⁶ عیسی اونَ بوگوفت:«بوشو تی مردَه دخَأن و وَأگرد بیَأ» ¹⁷ زن جواب بدَه:«مرد نَئرم» عیسی بوگوفت:«راس بوگوفتی کی مرد نَئری، ¹⁸ چون پنج بار مردَ بوسته ایی و هَسَه اونی کی اونِ اَمرَه زندگی کونی تی مرد نییه، اَ گبَ راس بوگوفتی!» ¹⁹ زن بوگوفت:«ای آقا، دینم کی تو نبی ایی، ²⁰ اَمی پئرانْ اَ کوه جُر عبادت کودد، ولی شومَأن یهودیان گوئید وَأستی خدایَ اورشلیمِ میَأن عبادت کودَأن.» ²¹ عیسی اونَ بوگوفت:«ای زنْ، می حرفَ باور بوکون، زمانی فَأرسه کی پئرَ، نه اَ کوه جُر عبادت کونید، و نه اورشلیمِ میَأن، ²² شومَأنْ اونچی کی نشنَأسیدَ عبادت کونید، ولی اَمَأنْ اونچی کی شنَأسیمَ عبادت کونیم، چونکی نجاتْ بواسطۀ قؤمِ یهود فراهم بِهه. ²³ و زمانی فَأرسه، و هَسَه هم فَأرسه دَأره، کی عبادت کوننده هایِ واقعی پئرَ به روح و راستی پرستش کوند. پئرْ اَجور عبادت کوننده یانِ طالبه. ²⁴ خدا روحه، و هر کی خَأیه اونَ عبادت بوکونه، وَأستی روح و راستی مرَه عبادت بوکونه.» ²⁵ زن بوگوفت:«من دَأنم کی مسیح بزودی اَیه، و وختی بأیه همه چیزَ اَمرَه گویه.» ²⁶ عیسی بوگوفت:«من کی تی مرَه گب زنم، هون مسیحم» ²⁷ هو لحظه عیسی شاگردان فأرسد و تعجب بوکودد کی ایتَه زنِ اَمرَه گب زَئَن دره. ولی هیچکودام وَأنورسد کی «چی خَأیی؟» یا «چره اونِ اَمرَه گب زنی؟» ²⁸ اونموقع زنْ خو کوزه یَ بنَه زمینِ رو و بوشو شهرْ، و مردمَ بوگوفت: ²⁹ «بأئید و مردیَ بیدینید کی تا هَسَه هر کاری بوکوده بومْ مرَه بوگوفت، آیا اون مسیح نییه؟» ³⁰ پس مردمْ، شهرِ جَه خارجَ بوستد و بأمود عیسی ورجَه. ³¹ در اَ موقع شاگردان عیسی جَه خواهش بوکودد کی چیزی بوخوره، ³² ولی عیسی اوشَأنَ بوگوفت:«من غذایی خوردَأنِ رِه دَأرم کی شومَأن اونِ جَه بیخبرید.» ³³ شاگردان همدیگرِ جَه وَأورسد:«مگر کسی اونِ رِه غذا بأورده؟» ³⁴ عیسی اوشَأنَ بوگوفت:«می غذا اَنه، اون کسی کی مرَه اوسه کوده اِراده یَ بجا بأورمْ و اونِ کارانَ انجام بدم. ³⁵ مگر شومَأن نوگوئید؛ چهار ماه دیگر دِرو وخته؟ ولی من شمرَه گویم شیمی دور و ورَ فَأندرید و مزرعه یانَ بیدینید کی دِرو رِه آماده ید. ³⁶ دروگر خو مُزدَ فَأگیره تا محصولَ حیاتِ جاودانی رِه آمادَه کونه، تا کسی کی بکاشته و کسی کی دِرو بوکوده، هر دو باهم شادی بوکوند. ³⁷ و اَ مثال اَیَ معنا پیدا کونه کی گویه؛ ایتَه کاره و ایتَه دِرو کونه. ³⁸ من شمرَه اوسه کودم تا محصولی کی اونِ رِه زحمت نکشه دَأریدَ دِرو بوکونید، دیگران زحمت بکشد، و شومَأن اوشَأنِ دسترنجَ برداشت کونید.» ³⁹ و اون زنِ شهادتِ وَسی کی بوگوفته بو:«هر کاری بوکوده بؤم مرَه بوگوفت» او شهرِ میَأن خیلی از سامریان اونَ ایمان بأوردد. ⁴⁰ وختی مردم بأمود عیسی ورجَه، اونِ جَه بخأستد کی او شهرِ میَأن بِئسِه، و عیسی هم دو روز اوشَأنِ ورجَه بِئسَه. ⁴¹ و هَ دو روزِ میَأن خیلیان اونِ گبانَ بیشتَأوستد و ایمان بأوردد. ⁴² و اون زنَ بوگوفتد:«دِ فقط تی حرفانَ وَسی نییه کی اَمَأن اونَ ایمان دَأریم، بلکی خودمَأن اونِ حرفانَ بیشتَأوستیم و بدَأنستیم کی اَ مردْ، واقعاً مسیح و جهانِ نجات دهنده یه.» ⁴³ بعدِ دو روز عیسی جی اویَ بوشو اُستانِ جلیل. ⁴⁴ خودش قبلاً بوگوفته بو کی هیچ نبی ایی خودشِ ولایتِ دورون احترام نَئره. ⁴⁵ ولی وختی فأرسِه جلیلَ، جلیلیان گرمی اَمرَه اونَ قبول بوکودد، چون اوشَأنم عیدِ رِه بوشو بود اورشلیم و اونچی کی عیسی اورشلیمِ میَأن انجام بدَه بویَ بیده بود. ⁴⁶ بازن عیسی بوشو قانایِ جلیل، جایی کی آبَ به شراب تبدیل بوکوده بو. ایتَه اَفسرِ دولت اویَ ایسَه بو کی اونِ پسرْ شهرِ کفرناحومِ میَأن مریض بو. ⁴⁷ اون وختی بیشتَأوست کی عیسی یهودیه جَه بأمو دَأره اُستانِ جلیل، بأمو اونِ ورجَه و خواهش بوکود کی بیشه شهرِ کفرناحومْ و اونِ پسرَ کی مردن دوبوَیَ شفا بده. ⁴⁸ عیسی اونَ بوگوفت:«تا مُعجزات نیدینید ایمان نَأورید» ⁴⁹ اون اَفسر التماس کونان بوگوفت:«ای آقا، پیشتر جی اَنکی می پسر بیمیره، بیأ و اونَ شفا بدن» ⁵⁰ عیسی اونَ بوگوفت:«وَأگرد تی خانه، تی پسر زنده مَأنه» اونْ مرد عیسیْ گوفته یَ اِطمینان بوکود و وَأگردست خو شهر. ⁵¹ هنوز راه میَأن ایسَه بو کی اونِ نوکران بأمود اونِ پیشواز و خوشحالی اَمرَه اونَ مژده بدَأد کی تی پسر زنده یه، و اونِ حال خُب بوبُسته. ⁵² اون مرد اوشَأنِ جَه وَأورسه:«چی ساعتی اونِ حال خُب بوبُست؟» بوگوفتند:«دیروز، حدوداً ساعت یکِ ظهر اونِ تب قطعَ بوست.» ⁵³ اونموقع پئر بفهمسته کی اَ دوروست هون ساعتی ایسه کی عیسی اونَ بوگوفت:«تی پسر زنده مَأنه» پس خودش، و همۀ اونِ خانواده ایمان بأوردد. ⁵⁴ اَ دومین مُعجزه ایی بو کی عیسی بعدِ اَنکی از یهودیه بأمو جلیلْ انجام بدَه.