¹ مردی بو جی فِرقۀ فریسیانْ کی نیقودیموس نام دَأشته، اون از بزرگانِ قؤمِ یهود بو. ² اون ایتَه شب عیسی ورجَه بأمو و اونَ بوگوفت:«ای اُستاد، دَأنیم کی تو معلمی ایسی کی خدا طرفِ جَه بأمویی، چون هیچکی نتَأنه مُعجزاتی کی تو کونی یَ اَنجام بده مگر اَنکی خدا اونِ اَمرَه بیبه.» ³ عیسی اونَ جواب بدَه:«یقین بدَأن تا کسی دوباره بودونیا نَأیِه نتَأنه خدا ملکوتَ بیدینه» ⁴ نیقودیموس اونَ بوگوفت:«کسی کی پیرَ بوسته چوطو تَأنه دوباره بودونیا بأیه؟ آیا تَأنه وَأگردِه خو مارِ شکمِ میَأن و دوباره بودونیا بأیه؟» ⁵ عیسی جواب بدَه:«یقین بدَأن هیچکس نتَأنه خدا ملکوتَ بودورون بیشه مگر اَنکی آب و روحْ جَه، بودونیا بأیه. ⁶ اونچی کی جسمِ جَه بودونیا اَیه جِسمانیه، و اونچی کی روحْ جَه بودونیا اَیه روحانیه ⁷ تعجب نوکون کی بوگوفتم وَأستی دوباره بودونیا بأئید! ⁸ باد هر جا کی بخَأیه شِه، اونِ صدایَ ایشتَأوی، ولی نَأنی از کَ یَ اَیه و به کَ یَ شِه، کسی حالتم کی خدا روح جَه بودونیا اَیه هَطویه، و نَتَأنه بفهمه کی چوطو عطا بِهه.» ⁹ نیقودیموس اونِ جَه وَأورسه:«تی منظور چیسه؟ اَ چوطو ممکنه؟» ¹⁰ عیسی جواب بدَه:«تو اسرائیلِ مُعلمی، چوطو اَ چیزانَ نَأنی؟ ¹¹ یقین بدَأن کی اَمَأن دربارۀ چیزایی کی دَأنیم گب زنیم، و بر اونچی کی بیده ایم شهادت دهیم، ولی شومَأن اَمی شهادتَ قبول نوکونید. ¹² وختی دربارۀ اُمورِ زمینی گب زنم شومَأن باور نوکونید، پس اگر دربارۀ اُمورِ آسمانی گب بزنم چوطو باور کونید؟ ¹³ هیچکس به آسمان بوجُر نوشو، مگر اون کسی کی جی آسمان بیجیر بأمو، یعنی انسانِ پسرْ، کی اونِ جا، آسمانِ میَأنه. ¹⁴ هوطویی کی موسی بیابانِ میَأن بِرنجی لانتی یَ چوبِ سر بنَه و بلندَ کود، انسانِ پسرم وَأستی بلندَ بِه، ¹⁵ تا هر کی اونَ ایمان بأوره هلاک نیبه بلکی حیاتِ جاودانی بدَأره. ¹⁶ چون خدا جهانَ اوقدر محبت بوکود کی خو ایدَأنه پسرَ فَأدَه، تا هر کی اونَ ایمان بأوره هلاک نیبه، بلکی حیاتِ جاودانی پیدا کونه. ¹⁷ چره کی خدا، پسرَ اوسه نوکود جهانِ میَأن تا جهانیانَ محکوم بوکونه، بلکی اوسه کودْ تا بواسطۀ اون نجات پیدا کوند. ¹⁸ هر کی اونَ ایمان بأوره محکوم نیبه، ولی هر کس اونَ ایمان نأوره جی هَسَه مَحکوم بوبُسته، چونکی خدا ایدَأنه پسرِ نامَ ایمان نأورده. ¹⁹ و محکومیتْ اَنِ وَسیه کی نورْ بأمو جهانِ میَأن، ولی مردم تاریکی یَ ویشتر جی نور دوس دَأشتد، چره کی اوشَأنِ اَعمال و رفتار بده. ²⁰ کسانی کی اَعمالِ بد انجام دهد نورِ جَه نفرت دَأرد و نورِ نزدیکی نَأیِد، نوکونه اوشَأنِ اَعمال آشکارَ بِه و رُسوا بوبود. ²¹ ولی اونی کی اونِ اَعمال دوروسته، اَیه نورِ ورجَه تا آشکار بیبه کی اونِ کاران خدا یاری اَمرَه انجام بوبُسته.» ²² بازن عیسی خو شاگردانِ اَمرَه اورشلیمِ جَه بوشو، ولی ایتَه مدت اوشَأنِ اَمرَه اُستانِ یهودیه میَأن بِئسَه و مردم تعمید بدَه. ²³ یحیی هم محلی به نامِ «عِیْنونِ» میَأنْ کی سالیمِ نزدیکی بو تعمید دَئه، چونکی اویَ آب زیاد بو، و مردمْ اَموئِد و تعمید گیفتد. ²⁴ اَن قبلِ اَن بو کی یحیی دکفه زندان. ²⁵ ایروز ایتَه یهودی، یحیی شاگردانِ اَمرَه آدابِ طهارتِ سر بحث بوکود. ²⁶ یحیی شاگردان اونِ ورجَه بأمود و بوگوفتد:«اُستاد، اونی کی رودِ اُردنِ اوطرف تی اَمرَه ایسَه بو و تو دربارۀ اون شهادت بدَأیی، هَسَه خودش تعمید دِهه و همه شُد اونِ ورجَه.» ²⁷ یحیی جواب بدَه:«هیچکس نتَأنه چیزی بدس بأوره مگر اَنکی خدا جی آسمان اونَ فأده بِه، ²⁸ شومَأن خودتان شاهدید کی من بوگوفتم من مسیحْ نییِم بلکی اونِ پیشاپیش اوسه بوبُستِم. ²⁹ عروسی میَأن،عروسْ شِه دامادِ ورجَه و دامادِ رِفِق کی اونِ کنار ایسَه و دامادِ صدایَ ایشتَأوه خوشحالی کونه، من دامادِ رِفقم و می شادی اَطو کامل بوبُسته. ³⁰ اون روز¬به¬روزْ وَأستی پیلَه بِه، و من کوچیکَ بؤم. ³¹ اونی کی جی آسمان اَیه از همه بوجُرتره و کسی کی اَ زمینِ شینه، زمینی یه و دربارۀ اُمورِ زمینی گب زنه، ولی اون کی جی آسمان اَیه، از همه بوجُرتره، ³² و اونچی کی بیده و بیشتَأوسته یَ شهادت دِهه، ولی هیچکس اونِ شهادتَ قبول نوکونه. ³³ هر کس اونِ شهادتَ قبول بوکونه خدا راستی و صداقتَ مُهرِ تائید بزَه دَأره. ³⁴ کسی کی خدا اوسَه کود، خدا کلامِ جَه گب زنه، چون خدا، روحَ به فراوانی اونَ عَطا کونه. ³⁵ پئرْ پسرَ مُحبت کونه و همه چیزَ اونَ بیسپُرده دَأره. ³⁶ اونی کی پسرَ ایمان بأوره حیاتِ جاودانی دَأره، ولی کسی کی پسرِ جَه ایطاعت نوکونه حیات جاودانی یَ نیدینه، بلکی خدا غضبَ گرفتارَ بِه.»