¹ سه روز بعد، قانایِ جلیلِ میَأن عروسی بو و عیسی مارْ اویَ ایسَه بو. ² عیسی و اونِ شاگردانم عروسیَ دعوت بوبُسته بود. ^{3 4} وختی شراب تومامَ بوست، عیسی مارْ اونَ بوگوفت:«شراب تومامَ بوست!» عیسی اونَ جواب بدَه:«ای زنْ، اَ کار مرَه مربوط نییه، می وخت هنوز فأنرسه دَأره» ⁵ اونِ مار نوکرانَ بوگوفت:«هر چی شمرَه گویه انجام بدید.» ⁶ اویَ شیش تَه خُمره سنگی نَهَه بو کی یهودیانْ خوشَأنِ تَطهیرِ رِه اونِ جَه استفاده کودد و هر کودام صد لیتر ظرفیت دَأشته. ⁷ عیسی نوکرانَ بوگوفت:«خُمره یانَ آبِ جَه پورَه کونید» اوشَأنم خُمره یانَ لَبالب پورَه کودد. ⁸ بازن اوشَأنَ بوگوفت:«هَسَه ایبچه اونِ جَه اوسَأنید و بوبورید صاحاب مجلسِ ورجه» ⁹ صاحاب مجلس آبَ کی شراب بوبُسته بو بچشِه. اون نَنِسته کی اونَ کَ یَ جَه بأورده دَأرد، هر چند نوکران دَأنستد. پس صاحاب مجلس دامادَ دخَأد ¹⁰ و بوگوفت:«همه اولْ شرابِ خوبِ مرَه پذیرایی کوند و وختی مهمانان مَستَ بوستد بازن شرابِ ارزانترَ اَورد، ولی تو شرابِ نابَ تا هَسَه بدَأشته ایی!» ¹¹ و اَطو عیسی خو اولین مُعجزه یَ قانایِ جلیلِ دورون انجام بدَه و خو جلالَ آشکارَ کود و اونِ شاگردان اونَ ایمان بأوردد. ¹² بازن عیسی خو مار و خو براران و خو شاگردانِ اَمرَه بوشُد شهرِ کفرناحوم و چند روز اویَ بِئسَد. ¹³ و چون یهودیانِ عیدِ فِصَح نزدیک بو، عیسی بوشو اورشلیم. ¹⁴ اورشلیمِ معبدِ دورون بیده کی چند نفر گاو و گوسفند و کبوتر فروشی یَ مشغولد، و صرافانم خوشَأنِ میزِ پوشت نیشتد و معامله کودَأن درد. ¹⁵ پس لافندِ مرَه ایَته شلاق چَأکود و همۀ اون آدمانَ اوشَأنِ گاو و گوسفندِ مرَه معبدِ جَه بیرون تَأوأدَه، و صرافانِ سکه یانم فوکود زمینِ رو و اوشَأنِ تَختانَ وأگردَأنی. ¹⁶ و کبوتر فروشانَ بوگوفت:«اَشَأنَ جی اَیَ بیرون بوبورید، و می پئرِ خانه یَ بازار چَأنکونید.» ¹⁷ اونموقع عیسی شاگردانْ بیاد بأوردد کی کیتاب مقدسِ دورون بینیویشته بوبُسته:«غیرتی کی تی خانه وَسی دَأرم مرَه سوجَأنه» ¹⁸ یهودیان اونِ جَه وَأورسد:«به چه حقی اَ کارانَ کونی؟ مُعجزه ایی اَمرَه نشان بدن تا بدَأنیم حق دَأری و خدا طرفِ جَه بأمویی!» ¹⁹ عیسی اوشَأنَ جواب بدَه:«اَ معبدَ خرابَ کونیدْ من سه روزمیَأنْ دوباره اونَ چَأکونم.» ²⁰ یهودیان بوگوفتد:«چی گویی؟ چهل و شیش سال طول بکشه دَأره تا اَ معبدَ چَأکوند، و هَسَه تو خَأیی سه روزه اونَ چَأکونی؟» ²¹ ولی عیسی منظور جی معبد، خودشِ بدن بو. ²² پس وختی کی عیسی مُرده یانِ جَه ویریشت، اونِ شاگردانَ بخاطر بأمو کی اَنَ بوگوفته بو. اونموقع اوشَأنْ کیتاب مقدس و عیسی حرفانَ ایمان بأوردد. ²³ مدتی کی عیسی عیدِ فِصحِ رِه اورشلیمِ میَأن ایسَه بو، خیلیانْ مُعجزاتی کی اون انجام دَئه یَ بیدد و اونِ نامَ ایمان بأوردد. ²⁴ ولی عیسی اوشَأنِ ایمانَ اعتماد نَأشته، چره کی همه تَه یَ خوب شناخته ²⁵ و لازم نوبو کسی دربارۀ انسانْ اونَ چیزی بوگویه، چون خودش دَأنسته انسانِ دورون چیسه.