¹ از اولْ کلمه بو، کلمه خدا اَمرَه بو؛ و کلمه خدا بو. ² اونْ از اولْ، خدا اَمرَه بو. ³ همه چی بواسطۀ اون بوجود بأمو، و هر چی کی بوجود بأمو، هیچ چیزی بدونِ اون بوجود نأمو. ⁴ حیات اونِ جَه بوجود بأمو و اون حیاتْ آدمیانِ نور بو. ⁵ اَ نورْ تاریکی دورون تابِه و تاریکی اونَ درک نوکود. ⁶ مردی بأمو کی خدا طرفِ جَه اوسه بوبُسته بو، اونِ نامْ یحیی بو. ⁷ اونْ شهادت دَئَنِ رِه بأمو، تا نورِ رِه شهادت بده، تا همه بواسطۀ اونْ ایمان بأورد. ⁸ اون خودشْ اونْ نور نوبو، بلکی بأمو تا اونْ نورِ رِه شهادت بده. ⁹ اون نورِ حقیقی ایی کی هر انسانی یَ کی به جهان اَیه روشنایی بخشه. ¹⁰ اونْ جهانِ میَأن ایسَه بو و جهانْ بواسطۀ اونْ خلق بوبُست، ولی جهانْ اونَ نشنَأخت. ¹¹ اون بأمو به خودشِ سرزمین، ولی اونِ قؤم اونَ قبول نوکودد. ¹² ولی همۀ کسانی کی اونَ قبول بوکودد، یعنی همۀ کسانی یَ کی اونِ نامَ ایمَأن بأورددْ اَ حقَ فَأده تا خدا زأکأن بوبود. ¹³ ولی نه تولدی انسانی اَمرَه، کی خواهشِ جسمْ و یا ایتَه مردایِ خواسته وَسیه، بلکی اوشَأنْ خدا جَه بودونیا بأمود. ¹⁴ و کلمهْ انسان بوبُست و اَمی میَأن ساکن بوبُست، و اَمَأنْ اونِ جلالَ بیده ایم، جلالی سزاوارِ اونْ ایدَأنه پسرْ کی پئرِ طرفِ جَه بأمو، پور جی فیضُ راستی. ¹⁵ یحیی اونِ رِه شهادتد دَئه و فریازَئه و گوفته:«اَن اون کسی ایسه کی دربارۀ اونْ گوفتم، اون کی بعدِ من اَیه ولی اونِ مقامْ می جَه بوجُرتره، چون پیشتر از من وجود دَأشته.» ¹⁶ اونِ پوری جَه همۀ اَمَأن بهره بوبوردیم، فیضْ فیضِ پوشت. ¹⁷ چره کی شریعتْ بواسطۀ موسی فَأدَه بوبُست، ولی فیض و راستی، بواسطۀ عیسی مسیح بأمو. ¹⁸ هیچوخت کسی خدایَ نیده دَأره، ولی اون ایدَأنه پسرْ کی پئرِ کِشِه جَه ایسَه، هونْ اونَ اَمرَه بشنَأسانی. ¹⁹ اَن ایسه یحیی شهادت وختی کی اورشلیمِ یهودیان، کاهنانُ لاویانَ اونِ ورجَه اوسه کودد تا اونِ جَه وَأورسد کی:«تو کیسی؟» ²⁰ یحیی اِعتراف بوکودْ وَ اِنکار نوکود، بلکی خیلی واضح اِقرار بوکود و بوگوفت:«من مسیح نییِم» ²¹ اوشَأن وَأورسد:«پس چی؟ آیا اِلیاسی؟» جواب بدَه:«نییِم» وأورسد:«آیا اون نبی ایی ایسی کی اونِ چوم براهیم؟» جواب بدَه:«نه» ²² اونموقع وَأورسد:«پس تو کیسی؟ بوگو اون کسانی کی اَمرَه اوسه کودَدِ رِه، چی جوابی بوبوریم؟ دربارۀ خودت چی گویی؟» ²³ یحیی طبقِ اونچی کی اِشعیایِ نبی پیشگویی بوکوده بو بوگوفت:«من اون کسی صدایمْ کی بیابانِ میَأن فریاد زنه؛ خداوندِ راهَ هموارَ کونید.» ²⁴ بعضی از قاصدانْ کی فِرقۀ فَریسیانِ جَه بود ²⁵ اونِ جَه وَأورسد:«اگر تو نه مسیحی نه اِلیاسْ و نه اون نبی یه موعود، پس چره مردمَ غُسلِ تَعمید دیهی؟» ²⁶ یحیی بوگوفت:«من مردمَ فقط آبِ اَمرَه غُسل دهم، ولی هَ یَ شیمی میَأنْ کسی ایسَه کی شومَأن اونَ نشنَأسید، ²⁷ اون بعدِ من اَیه و من لیاقت نَئرم حتی اونِ کفشِ بندَ بازَ کونم.» ²⁸ همۀ اَ اتفاقانْ بیت عَنْیا میَأن دکفت، یعنی اُردنِ رودخانه اوطرف، هون جایی کی یحیی تعمید دَئِه. ²⁹ او روزِ فردایی وختی یحیی عیسی یَ بیده کی اَمون دره اونِ طرف بوگوفت:«بیدینید اَنْ خدا برّه یه کی جهانِ گوناهَ اوسَأنه. ³⁰ اَن هون کسی ایسه کی دربارۀ اون بوگوفتم؛ بعدِ من مَردی اَیه کی اونِ مقامْ می جَه بوجُرتره، چون قبلِ من وجود دَأشته. ³¹ منم اونَ نشناختِم، ولی هَنه وَسی بأموم تا مردمَ آبِ اَمرَه تعمید بدم تا اونْ قؤمِ اسرائیلَ ظاهر بیبه» ³² پس یحیی شهادت بدَه و بوگوفت:«روحَ بیدِم کی کبوترِ مَأنستَأن جی آسمان بیجیر بأمو و اونِ رو قرار بیگیفت. ³³ هوطو کی بوگوفتمْ منم اونَ نشناختِم، ولی هون کسی کی مرَه اوسه کود تا آبِ اَمرَه تعمید بدم، مرَه بوگوفت؛ هر وخت بیده ایی روحْ کسی رو بیجیر بأمو و اونِ رو قرار بیگیفت، بدَأن اونْ کسی ایسه کی روح القدسِ اَمرَه تعمید دِهِه. ³⁴ و من بیدم و شهادت دهم کی؛ اَنْ خدا پسره» ³⁵ اون روزِ فردایی، ایبار دیگر یحیی خو دو تَه از شاگردانِ اَمرَه ایسَه بو. ³⁶ وختی عیسی یَ بیده کی اورَه شوئون دره، بوگوفت:«اَنه خدا برّه» ³⁷ وختی اون دو تَه شاگرد اَ حرفَ بیشتَأوستد عیسی دونبال راه دکفتد. ³⁸ عیسی وَأگردست و بیده کی دو نفر اونِ دونبال آمون درد، اوشَأنِ جَه وَأورسی:«چی خَأئید؟» اوشَأن بوگوفتد:«ای استاد، تی خانه کَ یَ ایسه؟» ³⁹ عیسی جواب بدَه:«بأئید و بیدینید» پس اوشَأنم بوشود و بیدد کی کَ یَ خانه دَأره، و باقی روزَ اونِ ورجَه بِئسَد، چره کی ساعت چهار بعدِ از ظهر بو. ⁴⁰ ایتَه جی اون دو نفری کی یحیی حرفَ بیشتأوست و عیسی دونبال بوشو، آندریاسْ، شمعونِ پطرسِ برأر بو. ⁴¹ اون اول بوشو خو برأرْ شمعونَ پیدا کود و اونَ بوگوفت:«اَمَأنْ مسیحَ پیدا کوده دَأریم» ⁴² و خو برأرَ بوبورد عیسی ورجَه، عیسی اونَ فَأندرسته و بوگوفت:«تو شمعونْ یونا پسری، ولی جی اَن پس، کِیفا دخَأده بی» کیفا یعنی پطرس. ⁴³ فردایی عیسی تصمیم بیگیفت بیشه جلیلِ طرف، اون فیلیپُسَ بیده و اونَ بوگوفت:«می دونبال بیا» ⁴⁴ فیلیپُس شهرِ بیت صِیدا شین بو، یعنی پطرس و آندریاسِ شهر. ⁴⁵ فیلیپُس هم بوشو نَتَنائیلَ پیدا کود و اونَ بوگوفت:«اَمأَن کسی یَ کی موسی، توراتِ دورون بوگوفته بو و اَنبیاء دربارۀ اون بینیویشته دَأردَ پیدا کودیم، اون عیسی، یوسفِ پسر و شهرِ ناصره شینه.» ⁴⁶ نَتَنائیل اونَ بوگوفت:«مگر شهرِ ناصره جَه هم چیزِ خوب بیرون اَیه؟» فیلیپُس جواب بدَه:« بیأ و خودت بیدین» ⁴⁷ عیسی وختی بیده نَتَنائیل اونِ طرف اَمون دره، دربارۀ اون بوگوفت:«ایتَه اسرائیلی واقعی، کی اونِ میَأن هیچ کلکی وجود نَئره» ⁴⁸ نَتَنائیل اونِ جَه وَأورسه:«مرَه کَ جَه شناسی؟» عیسی اونَ جواب بدَه:«پیشتر جی اونی کی فیلیپُس ترَه دَخأنه، وختی انجیر دارِ جیر ایسَه بی، ترَه بیدم.» ⁴⁹ نَتَأنائیل جواب بدَه:«ای اُستاد، تو خدا پسری، تو اسرائیلِ پادشاهی» ⁵⁰ عیسی جواب بدَه:«چون بوگوفتم ترَه اَنجیر دارِ جیر بیدم ایمان بأوردی؟ جی اَن پس چیزهای پیله تری دینی.» ⁵¹ بازن بوگوفت:«شمرَه گویم یقین بدَأنید کی آسمانَ بازَه بوسته دینیدْ و خدا فرشته یانَ کی انسانِ پسرِ وَسی بوجُر شُدُ بیجیر اَید»