¹² عیسی ایبار دیگر مردمِ مرَه گب بزَه و بوگوفت:«من جهانِ نورم، هر کی می جَه پیروی بوکونه هیچموقع تاریکی میَأن سرگردان نیبه، بلکی نورِ حیاتَ پیدا کونه.» ¹³ اونموقع فریسیان اونَ بوگوفتد:«تو خودتْ خودتِ رِه شهادت دیهی؟ پس تی شهادت اعتباری نَئره.» ¹⁴ عیسی جواب بدَه:«هر چند من خودم، خودمِ رِه شهادت دهم، ولی می شهادت راسته، چون دَأنم کَ یَ جَه بأموم و به کَ یَ شوم، ولی شومَأن نَأنید من کَ یَ جَه بأموم و به کَ یَ شوم. ¹⁵ شومَأن معیارِ انسانی مرَه قضاوت کونید، ولی من هیچکسَ قضاوت نوکونم. ¹⁶ ولی اگر قضاوت هم بوکونم می قضاوت دوروسته، چون تنها نییِم، بلکی پئری کی مرَه اوسَه کوده می اَمرَه یه. ¹⁷ شیمی شریعتِ دورون بینیویشته بوبُسته کی هر موضوعی رِه دو تَه شاهد کفایت کونه. ¹⁸ من خودمْ، خودمِ رِه شهادت دهم و پئری کی مرَه اوسَه کود هم مِرِه شهادت دِهه.» ¹⁹ اونَ بوگوفتد:«تی پئر کَ یَ ایسَه؟» عیسی جواب بدَه:«شومَأن کی نَأنید من کیسم، چوطو خَأئید می پئرَ بشنَأسید؟ اگر مرَه بشنأخته بوئید می پئرم شنَأختید.» ²⁰ عیسی اَ حرفانَ وختی بزَه کی معبدِ خزانه ورجَه تعلیم دَئه و کسی اونَ نیگیفت چون هنوز اونِ وخت فَأنرسه بو. ^{21 22} عیسی باز اوشَأنَ بوگوفت:«من شؤم و شومَأن می دونبال گردید و شیمی گوناهانِ میَأن میرید، و جایی کی من شؤم شومَأن نتَأنید بأئید.» یهودیان همدیگرَ بوگوفتد:«آیا خَأیه خودشَ بوکوشه کی گویه جایی کی من شوم شومَأن نتَأنید بأئید؟» ²³ اونموقع عیسی اوشَأنَ بوگوفت:«شومَأن بیجیرِ شینید ولی من بوجُرِ شین، شومَأن اَ جهانِ شینید ولی من اَ جهانِ شین نییِم. ²⁴ هَنه وَسی بوگوفتم کی شومَأن شیمی گوناهانِ میَأن میرید. اگر ایمان نَأورید کی "من ایسم" شیمی گوناهانِ میَأن میرید.» ²⁵ اوشَأنْ اونِ جَه وَأورسد:«تو کیسی؟» عیسی جواب بدَه:«من هونی ایسم کی جی هون اول شمرَه بوگوفتم. ²⁶ من خیلی چیزان دَأرم کی دربارۀ شومَأن بوگویم و داوری بوکونم ولی اَ کارَ نوکونم، اونی کی مرَه اوسَه کوده حقه، و من اونچی کی اونِ جَه بیشتَأوستمَ جهانَ گویم.» ²⁷ اوشَأن نفهمستد کی اون دربارۀ پئر اوشَأنِ اَمرَه گب زنه. ²⁸ پس عیسی اوشَأنَ بوگوفت:«وختی کی انسانِ پسرَ زمینِ جَه راستَ کودید اونموقع فهمید کی من ایسم و خودمِ جَه کاری نوکونم، بلکی هر چی کی پئر مرَه تعلیم بدَه دَأره یَ شمرَه بوگوفتم. ²⁹ اون کی مرَه اوسَه کود می اَمرَه یه و پئر مرَه تنها نِنَه دَأره، چون من همیشه کارهایی انجام دهم کی اون پسند کونه.» ³⁰ وختی اَ حرفَ بزَه خیلیان اونَ ایمان بأوردد. ³¹ بازن عیسی یهودیانی کی اونَ ایمان بأورده بودَ بوگوفت:«اگر می کلامِ میَأن بِئسید، حقیقتاً می شاگرد بوبُسته اید. ³² و حقیقتَ شناسید و حقیقت شمرَه آزادَ کونه.» ³³ اوشَأن اونَ جواب بدَأد:«اَمَأن ابراهیمِ اولادیم، و هیچموقع کسی برده نوبوئیم، پس تی منظور چیسه کی گویی آزاد بیهید؟» ³⁴ عیسی جواب بدَه:«یقین بدَأنید کسی کی گوناه کونه، گوناهِ برده یه. ³⁵ برده، جایگاهِ همیشگی خانه میَأن نَئره، ولی پسرِ جایگاهْ همیشگیه. ³⁶ پس اگر پسر شمرَه آزادَ کونه، واقعاً آزاد بیهید. ³⁷ دَأنم کی ابراهیمِ اولادید، ولی چون می گبانْ شیمی دیلانِ میَأن جایی نَئره خأئید مرَه بوکوشید. ³⁸ من اونچی کی می پئرِ ورجَه بیده دَأرمِ جَه گب زنم، و شومَأنم اونچی یَ کی شیمی پئرِ جَه یاد بیگیفته دَأریدَ عمل کونید.» ³⁹ اوشَأن عیسی یَ جواب بدَأد:«ابراهیم اَمی پئره» عیسی بوگوفت:«نه، اگر ابراهیمِ اولاد بوئید ابراهیمِ اعمالَ بجا اَوردید. ⁴⁰ من حقیقتی کی خدا جَه بیشتَأوستمَ شمرَه بوگوفتم، ولی شومَأن خأئید مرَه بوکوشید، ابراهیم اَجور رفتار نوکوده. ⁴¹ وختی اَ کارَ کونید، شیمی پئرِ جَه تقلید کونید» مردم جواب بدَأد:«اَمَأن کی حرام زاده نیئیم، اَمی پئرِ واقعی خدایه» ⁴² عیسی اوشَأنَ بوگوفت:«اگر شیمی پئر خدا بو مرَه دوس دَأشتید، چون من خدا طرفِ جَه بأموم و شیمی میَأن ایسَم، من خودسرانه نأمومْ بلکی اونْ مرَه اوسَه کوده. ⁴³ چره می حرفانَ نفهمید؟ اَنِ وَسی کی حاضر نیئید می حرفانَ گوش بوکونید. ⁴⁴ شومَأن شیمی پئرْ ابلیسِ جَه ئید و خَأئید اونِ خواسته یانَ عمل بوکونید. اون از اول قاتل بو و راستی جَه بیخبره، چون اونِ میَأن هیچ راستی ایی نِنَه. وختی دوروغ گویه مُطابقِ خودشِ ذات رفتار کونه، چون دوروغگویه و دوروغگویانِ پئره. ⁴⁵ ولی چون من راست گویم، می حرفانَ باور نوکونید. ⁴⁶ کَ ی تَه جی شومَأن تَأنه حتی ایتَه گوناهَ مرَه نسبت بده؟ پس اگر راس گویم چره مرَه باور نوکونید؟ ⁴⁷ کسی کی خدا جَه بیبه، خدا کلامَ قبول کونه، ولی شومَأن قبول نوکونید، چون کی خدا جَه نیئید.» ⁴⁸ پس یهودیان اونَ جواب بدَأد:«آیا راس نوگوفتیم کی تو سامری ایی و دیوانه ایی؟» ⁴⁹ عیسی جواب بدَه:«من دیوانه نییِم، بلکی می پئرَ احترام نهم ولی شومَأن مرَه بی احترامی کونید. ⁵⁰ من نخَأیم مرَه جلال بدم، ولی کسِ دیگری ایسَه کی می جلالِ طالبه، و داوری اونِ اَمرَه یه. ⁵¹ یقین بدَأنید اگر کسی می تعالیمِ جَه اطاعت بوکونه هیچموقع نیمیره.» ⁵² یهودیان اونَ بوگوفتد:«هَسَه دِ مُطمئن بوبُستیم دیوانه ایی! ابراهیم و اَنبیاء بمردد و تو گویی اگر کسی می کلامَ حفظ بوکونه هیچموقع نیمیره؟ ⁵³ آیا تو اَمی پئر ابراهیمِ جَه پیله تری؟ اون بمرد و همۀ اَنبیاء بمردد. خودتَ کی دَأنی؟» ⁵⁴ عیسی جواب بدَه:«اگر خودمْ، خودمَ جلال بدم، اَ جلالْ هیچ ارزشی نَئره، اون می پئرِه کی مرَه جلال دِهه، هونی کی شومَأن گوئید اَمی خدایه. ⁵⁵ هر چند شومَأن اونَ نشناسید، ولی من اونَ شناسم. اگر بوگویم نشناسم شیمی مَأنستَأن دوروغگویم، ولی من اونَ شناسم و هر چی گویه اطاعت کونم. ⁵⁶ شیمی پئر ابراهیم شادی کوده اَز اَنکی ایتَه روز مرَه بیدینه، و بیده و خوشحالَ بوبُست.» ⁵⁷ یهودیان اونَ بوگوفتد:«تو هنوز پنجاه سال نَئری، و گویی ابراهیمَ بیده ایی؟» ⁵⁸ عیسی اوشَأنَ بوگوفت:«یقین بدَأنید قبلِ ابراهیمِ بودونیا اَمونْ من ایسَه بوم.» ⁵⁹ مردم سنگ اوسَأدد کی اونَ سنگسار بوکوند. ولی عیسی مردمِ نظرِ جَه دورَ بوست و معبدِ جَه بیرون بوشو و بوشو.