¹ بعدِ اَنکی عیسی اَ حرفانَ بزَه، خو شاگردانِ مرَه بوشو اوطرفِ درۀ قِدرون. اویَ باغی نَهَه بو و عیسی و اونِ شاگردان بوشود باغِ دورون. ² ولی یهودایِ اِسخریوطی کی اونَ تسلیم بوکود دَأنسته اون باغ کَ یَ نَهَه، چون عیسی و اونِ شاگردان معمولاً شوئد اویَ. ³ پس یهودا سربازانَ و پاسبانانی کی کاهنانِ سران و فریسیانْ اونِ اختیار بنَه بود اوسَأد و راه دکفت، اوشَأنْ چراغ و مشعَل و اسلحه اَمرَه بوشود باغِ دورون. ⁴ عیسی با اَنکی دَأنسته چی خَأیه بیبه، بوشو جولو و اوشَأنِ جَه وَأورسی:«کی دونبال گردید؟» ⁵ جواب بدَأد:«عیسایِ ناصری دونبال» عیسی اوشَأنَ بوگوفت:«منم» و یهودایِ خائِن هم اوشَأنِ ورجَه بپا ایسَه بو. ⁶ وختی عیسی اوشَأنَ بوگوفت:«منم» اوشَأنْ عقب عقب بوشود و بکفتد زمینِ رو. ⁷ عیسی باز اوشَأنِ جَه وَأورسه:«کی دونبال گردید؟» اوشَأن جواب بدَأد:«عیسای ناصری دونبال» ⁸ عیسی بوگوفت:«شمرَه کی بوگوفتم منم، اگر مرَه خَأئید وَألید اَشَأن بوشود» ⁹ اون اَ کارَ بوکود تا مُطابقِ خودشِ دوعا عمل بوکوده بِه کی بوگوفت:«اوشَأنی کی مرَه فَأدَه ایی جَه، حتی ایَته هم جی دس نَدم.» ¹⁰ اونموقع شمعونِ پطرس شمشیری کی دَأشته یَ بیرون بأورد و ایتَه ضربه بزَه کاهنِ اعظمِ غلامِ گوشَ، و اونِ راستِ گوشَ وَأوِه، اون خادمِ نام مالخوس بو. ¹¹ عیسی پطرسَ بوگوفت:«تی شمشیرَ غلاف بوکون، آیا نوَأستی جامی کی پئر مرَه فَأدَه دَأره یَ بوخورم؟» ¹² بازن سربازانْ خوشَأنِ فرمانده اَمرَه و مأمورینِ یهودی اَمرَه عیسی یَ بیگیفتد و اونِ دَسانَ دوَستد. ¹³ اول اونَ بوبوردد حَنّا ورجَه، حَنّا، قیافا زن پئرْ بو، ولی در اون زمانْ قیافا کاهنِ اعظم بو. ¹⁴ اَن قیافا هون قیافایی ایسه کی یهودیانَ بوگوفته بو کی؛ بهتره اینفر همۀ قؤمِ وَسی بیمیره. ¹⁵ شمعونِ پطرس و ایتَه شاگردِ دیگر عیسی دونبال راه دکفتد، و چون اون شاگرد کاهنِ اعظمِ مرَه آشنایی دَأشته بتَأنست عیسی دونبال سر بیشه خانه دورون. ¹⁶ ولی پطرس درِ پوشت بِئسَه. ولی اوی تَه شاگرد کی کاهنِ اعظمِ آشنا بو بوشو بیرون و زنی کی دربان بو اَمرَه گب بزَه و پطرسَ خو اَمرَه بوبورد بودورون. ¹⁷ اونموقع هون کنیزی کی دربانْ بو پطرسِ جَه وَأورسی:«تو اَنِ شاگردانِ جَه نیئی؟» پطرس جواب بدَه:««نه، نییِم» ¹⁸ هوا سرد بو، و خادمان و مأموران آتش بوکوده بود و آتشِ دور خوشَأنَ گرمَ کودد. پطرسم اوشَأنِ اَمرَه ایسَه بو و خورَه گرمَ کوده. ¹⁹ کاهنِ اعظم عیسی جَه دربارۀ اونِ شاگردان و اونِ تعالیم وَأورسه. ²⁰ اون جواب بدَه:«من جهانِ اَمرَه آشکارا گب بزم و همیشه کنیسه و معبدِ دورون کی یهودیان جمعَ بود تعلیم بدَه دَأرم، من خلوتی چیزی نوگوفته دَأرم. ²¹ چرَه می جَه وَأورسی؟ اوشَأنی جَه وأورس کی می حرفانَ بیشتَأوسته دَأرد. اوشَأن دَأند من چی بوگوفتِم.» ²² وختی اَ حرفَ بزَه ایتَه جی اون نگهبانانی کی اویَ ایسَه بو ایتَه کشیده عیسی صورتَ بزَه و بوگوفت:«کاهنِ اعظمَ اَطو جواب دهی؟» ²³ عیسی اونَ بوگوفت:«اگر حرفِ بدی بزَم دلیلِ اَمرَه ثابت بوکون، ولی اگر راس بوگوفتم چره مرَه زنی؟» ²⁴ بازن حَنّا اونَ هَطو دس بسته اوسَه کود کاهنِ اعظمْ، یعنی قیافا ورجَه. ²⁵ و هَطو کی شمعونِ پطرس اویَ ایسَه بو و خورَه گرم کوده، چن نفر اونِ جَه وأورسد:«تو اونِ شاگردانِ جَه نیئی؟» اون اِنکار بوکود و بوگوفت:«نه نییِم» ²⁶ ایتَه دیگر جی کاهنِ اعظمِ خدمتکاران کی اون کسی کی پطرس اونِ گوشَ وَأوه قؤم و خویش بو اونَ بوگوفت:«مگه من خودم ترَه اونِ اَمرَه باغِ دورون نیدم؟» ²⁷ پطرس بازم اِنکار بوکود، هو لحظه خروس بخَأد. ²⁸ عیسی یَ بوبوردد فرماندارِ قصرِ دورون قیافا ورجَه، سحرِ موقع بو، اوشَأنْ کاخِ دورون نوشود تا نجس نوبود کی بتَأند فِصَحِ غذایَ بوخورد. ²⁹ پس پیلاطُس بأمو بیرون و اوشَأنِ جَه وأورسه:«چی شکایتی اَ شخصِ جَه دَأرید؟» ³⁰ جواب بدَأد:«اگر مُجرم نوبو کی ترَه تسلیم نوکودیم!» ³¹ پیلاطس بوگوفت:«اونَ بوبورید و بر طبقِ خودتانِ شریعت محاکمه بوکونید» یهودیان اونَ جواب بدَأد:«طبقِ قانونْ اَمَأن ایجازه نَئریم کسی یَ اعدام بوکونیم» ³² اَ حرفْ، مُطابقِ عیسی پیشگویی بو کی قبلاً بوگوفته بو چوطو وَأستی بیمیره. ³³ پیلاطس وَأگردست کاخِ دورون و دستور بدَه عیسی یَ بوبورد اونِ ورجَه، اون عیسی جَه وَأورسه:«آیا تو یهودِ پادشاهی؟» ³⁴ عیسی وَأورسه:«اَ حرفَ خودتِ جَه بوگوفتی یا دیگران دربارۀ من ترَه بوگوفتد؟» ³⁵ پیلاطس بوگوفت:«مگه من یهودی ام کی اَ چیزانَ می جَه وَأورسی؟ تی خودتِ قؤم و کاهنانِ سران ترَه بأورده دَأرد می ورجَه، چی بوکوده ایی؟» ³⁶ عیسی جواب بدَه:«می پادشاهی اَ جهانِ شین نییِه، اگر می پادشاهی اَ جهانِ شین بوبُسته بِه می خادمان جنگ کودد تا یهودیانِ دس گرفتار نوبوم، ولی می پادشاهی اَ جهانِ شین نییه.» ³⁷ پیلاطس اونَ بوگوفت:«پس تو پادشاهی؟» عیسی جواب بدَه:«تو خودت گویی کی من پادشاهم، من اَنِ وَسی بودونیا بأموم و بأموم به اَ جهان تا راستی رِه شهادت بدم، پس هر کس راستی شین ایسه، می حرفانَ گوش دِهه» ³⁸ پیلاطس بوگوفت:«راستی چیسه؟» و بازن پیلاطُس بوشو بیرون یهودیانِ ورجَه و اوشَأنَ بوگوفت:«من اَ شخصِ دورون جُرمی پیدا نوکودم، ³⁹ بر طبقِ شیمی رَسم، من عیدِ فصحِ رِه ایتَه زندانی شمرِه آزادَ کونم، خأئیدی "یهودِ پادشاهَ" شمرِه آزادَ کونم؟» ⁴⁰ ولی اوشَأن همه تَه فریاد بزَد:«نه اونَ نخَأئیم، باراباسَ اَمرِه آزادَ کون.» و باراباسْ ایتَه راهزن بو.