¹ بعدِ اَ گبانْ عیسی آسمانَ فأندرست و بوگوفت:«ای پئر، اونِ وخت برسه دَأره، تی پسرَ جلال بدن تا تی پسرم ترَه جلال بده. ² چون تو هر بشرِ اختیارَ اونَ بیسپُردی تا هر کی یَ کی اونَ فَأدَه ئی، حیاتِ جاودانی ببخشه. ³ و حیاتِ جاودانی اَنه کی اوشَأنْ ترَه کی خدایِ واقعی ایسی یَ، و عیسی مسیحْ کی تو اوسَه کودی یَ بشناسد. ⁴ من زمینِ رو ترَه جلال بدم، و کاری کی مرَه بیسپُرده بویی تا انجام بدمَ، تومامَ کودم. ⁵ هَسَه ای پئرْ، مرَه جلال بدن، هون جلالی کی پیشتر جی جهانِ آفرینش تی ورجَه دَأشتِم. ⁶ من تی نامَ، اونْ مردمانی کی اَ جهانِ جَه مرَه عطا بوکودی یَ بشناسانم، اوشَأنْ تی شین بود و اوشَأنَ مره فَأدَه ایی و اوشَأنْ تی کلامِ جَه اطاعت بوکودد. ⁷ هَسَه دَأند کی هر چی مرَه ببخشه ایی واقعاً تی طرفِ جَه یه. ⁸ چون هر کلامی کی مرَه فأدَه ایی اوشَأنَ فَأدَم و اوشَأن قبول بوکودد و یقین بدَأنستد کی تی طرفِ جَه بأموم، و ایمان بأوردد کی تو مره اوسَه کوده ایی. ⁹ من اوشَأنِ رِه دوعا کونم نه جهانِ مردمانِ رِه، کسانی رِه دوعا کونم کی تو مرَه فَأدَه ایی، چون اوشَأنْ تی شیند. ¹⁰ هر چی من دَأرم تی شینه و هر چی تو دَأری می شینم ایسه، و اَنْ باعثِ می جلال و افتخاره. ¹¹ ویشتر جی اَن جهانِ میَأن نِئسم و تی ورجَه اَیم، ولی اَشَأنْ جهانِ میَأن ایسد. ای مُقدسِ پئر، اَشَأنی کی مرَه فَأدَه ایی به خودتِ نامِ قدرتْ حفظ بوکون تا ایتَه بوبودْ هوطویی کی اَمَأن ایتَه ایم. ¹² تا زمانی کی اوشَأنِ اَمرَه جهانِ میَأن ایسَه بو اوشَأنَ حفظ بوکودم، و هر کسَ کی مرَه ببخشه ایی تی نامِ قدرتِ اَمرَه حفظ بوکودم و هیچکودام هلاکَ نوبوستد، جُز هلاکتِ پسر، تا کیتاب مُقدسِ پیشگویی انجام بیبه. ¹³ ولی هَسَه تی ورجَه اَیم و اَ حرفانَ زمانی زنم کی هنوز جهانِ میَأن ایسَم، تا می خوشی جَه پورَه بود. ¹⁴ تی اَحکامَ اوشَأنَ فأدَم، ولی چون اوشَأنم می مَأنستَأن اَ جهانِ شین نییِد، جهانْ اوشَأنِ جَه نفرت دَأره. ¹⁵ دوعا نوکونم کی اوشَأنَ اَ جهانِ جَه بوبوری، بلکی دوعا کونم اوشَأنَ شریرِ جَه حفظ بوکونی. ¹⁶ اوشَأنم می مَأنستَأن اَ جهانِ شین نییِد. ¹⁷ اوشَأنَ بواسطۀ خودتِ راستی تقدیس بوکون، تی کلام راستیه. ¹⁸ هوطو کی تو مرَه اوسه کودی به اَ جهان، منم اوشَأنَ اوسه کودم به اَن جهان. ¹⁹ من خودمَ اوشَأنِ وَسی تقدیس کونم تا اوشَأنم راستی میَأن تقدیس بوبود. ²⁰ فقط اَشَأنِ رِه دوعا نوکونم، بلکی همۀ کسانی کی اَشَأنِ پیامِ وَسی مرَه ایمان اَوردِ رِه هم دوعا کونم. ²¹ تا همه ایتَه بوبود، هوطویی کی تو ای پئرْ می دورون ایسَأیی و من تی دورون، کاری بوکون تا اَشَأنم اَمی دورون بِئسد تا جهانْ ایمان بأوره کی تو مرَه اوسَه کوده ایی. ²² من جلالی کی مرَه ببخشه ایی یَ اوشَأنَ فَأدَمْ تا ایتَه بوبود، هوطویی کی اَمَأن ایتَه ایم. ²³ من اوشَأنِ دورون و تو می دورون، کاری بوکون کی اوشَأنم کاملاً ایتَه بوبود تا جهان بدَأنه تو مرَه اوسَه کوده ایی، و بفهمه کی اوشَأنم دوس دَأری هو اندازه کی مرَه دوس دَأری. ²⁴ ای پئرْ، خَأیم اوشَأنی کی مرَه ببخشه ایی می اَمرَه بِئسد هو جایی کی من ایسَأم، تا می جلالَ بیدیند، جلالی کی تو مرَه فَأدَه ایی، چون پیشتر جی جهانِ خلقتْ تو مرَه محبت بوکودی. ²⁵ ای پئرِ عادل، جهان ترَه نشناخت، ولی من ترَه شناسم، و اَشَأنْ بدأنستد کی تو مرَه اوسَه کودی. ²⁶ من تی نامَ اوشَأنَ بشناسانم و بازم شناسانم، تا اون محبتی کی تو مرَه دَأری، اوشَأنِ میَأنم بوجود بأیه و منم اوشَأنِ دورون بِئسم.»