¹ اَ چیزانَ شمرَه بوگوفتم تا شیمی ایمانَ جی دس ندید. ² شمرَه کنیسه یانِ جَه بیرون تَأوَأدد، حتی زمانی فأرسه کی هر کی شمره بوکوشه فکر کونه خدایَ خدمت کودَأن دره. ³ اَ کارانَ شیمی اَمرَه کوند، چون نه پئرَ شناسد و نه مرَه. ⁴ اَشَأنَ شمرَه بوگوفتم تا وختی اَ اتفاقانِ وخت برسه به یاد بأورید کی من شمرَه بوگوفته بوم، اَ گبانَ اول شمرَه نوگوفتم چون خودمْ شیمی اَمرَه ایسَه بوم. ⁵ ولی هَسَه شؤم کسی ورجَه کی مرَه اوسَه کوده، و هیچکودام جی شومَأن وَأنورسه؛ کَ یَ شی؟ ⁶ ولی چون اَ حرفانَ شمرَه بزم شیمی دیلَ غم بیگیفته. ⁷ من شمرَه راس گویم کی گویم؛ می شوئونْ شمرِه مُفیده، چون اگر نوشوم یاوری شیمی ورجَه نَأیه، ولی اگر بوشوم اونَ شیمی ورجَه اوسَه کونم. ⁸ وختی اون بأیه، جهانَ متوجه کونه کی از نظرِ گوناه و عدالت و داوری تقصیرکاره. ⁹ از نظرِ گوناه تقصیرکارد، چون مرَه ایمان نأورد، ¹⁰ از نظرِعدالت، چون می پئرِ ورجَه شؤم و دِ مرَه نیدینید، ¹¹ و از نظرِ داوری، چون اَ جهانِ رئیس محکوم بوبُسته. ¹² خیلی چیزان دَأرم کی شمرَه بوگویم، ولی هَسَه طاقت ایشتَأوستن نَئرید. ¹³ ولی وختی روحِ راستی بأیه، شمرَه همۀ حقیقتِ طرف راهنمایی کونه، چون خودشِ جَه گب نزنه، بلکی اونچی کی ایشتَأوه یَ گویه، و شمرَه آینده جَه خبردارَ کونه. ¹⁴ اونْ مرَه جلال دِهه و حقیقتی کی می جَه دریافت بوکوده یَ شمرَه اعلام کونه. ¹⁵ هر اونچی کی پئر دَأره منم دَأرم، هَنه وَسی بو کی بوگوفتم؛ حقیقتی کی می جَه دریافت بوکوده یَ شمرَه گویه. ¹⁶ بعدِ ایتَه مدتِ کوتاه دِ مرَه نیدینید، ولی بعدِ چن روز بازم مرَه دینید.» ¹⁷ بعضی جی اونِ شاگردان همدیگرِ جَه وَأورسد:«استاد چی گویه؟ اونِ منظور چیسه کی گویه؛ دِ مرَه نیدینید ولی بازم بعدِ ایتَه مدت مرَه دینید؟» ¹⁸ پس همدیگرَ گوفتد:«اَ مدتی کی اون دربارۀ اون گب زنه چیسه؟ اَمَأن نَأنیم اون دربارۀ چی گب زنه» ¹⁹ عیسی بفهمست کی اوشَأن خأید اونِ جَه چیزی وَأورسد، پس اوشَأنَ بوگوفت:«وَأورسیدی کی می منظور چیسه کی گویم بعدِ ایتَه مدت مرَه نیدینید ولی دوباره بعدِ ایتَه مدتِ کوتاه مرَه دینید؟ ²⁰ یقین بدَأنید شومَأن اَشک فوکونید و ماتم گیرید، ولی جهانْ شادی کونه، شومَأن غمگین بیهید ولی شیمی غم آخرسر شادی یَ تبدیل بِهه. ²¹ ایتَه زنْ زایمانِ وختْ درد کِشه و جی درد ناراحته چون اونِ ساعت فأرسه دَأره، ولی وختی زأی بودونیا اَیه اون زنْ دِ زحمتانَ به یاد نَأوره چون ایتَه انسانِ جدید بودونیا بأمو دَأره. ²² شومَأنم هَسَه هوطو ناراحت و غمگینید، ولی بازم شمرَه دینم و اون موقع شیمی دیلْ شاد بِهه و هیچکس نتَأنه اون شادی یَ شیمی جَه بیگیره. ²³ او روزِ رِه دِ می جَه چیزی وَأنورسید، یقین بدَأنید کی هر چی به می نام پئرِ جَه بخَأئید شمرَه عَطا کونه. ²⁴ تا هَسَه به می نام چیزی نخَأسته اید، بخأئید تا بدس بأورید و شیمی خوشی کامل بیبه. ²⁵ اَ چیزانَ مثال و کنایه اَمرَه شمرَه بوگوفتم، ولی زمانی فأرسه کی مثالِ اَمرَه شیمی مرَه گب نزنمْ بلکی آشکارا دربارۀ پئرْ شیمی اَمرَه گب زنم. ²⁶ وختی اون روز فأرسه به می نامْ پئرِ جَه خَأئید و من نوگویم کی پئرِ ورجَه شیمی سفارشَ کونم، ²⁷ چون پئر خودش شمرَه دوس دَأره، چون شومَأن مرَه دوس دَأشتید و ایمان بأوردید کی من خدا طرفِ جَه بأموم. ²⁸ من پئرِ ورجَه بأموم و اَ جهانَ وارد بوبُستم، و هَسَه اَ جهانَ ترکَ کونم و شؤم می پئرِ ورجَه. ²⁹ شاگردان اونَ بوگوفتد:«هَسَه واضح اَمی اَمرَه گب زنی و نه مثال اَمرَه، ³⁰ دِ مُطمئن بوبُستیم تو همه چیَه دَأنی، حتی لازم نیه کسی خو سوالَ تی جَه وَأورسه، هَن اَمرِه کافیه و دَأنیم کی تو جی خدا ورجَه بأمویی.» ³¹ عیسی جواب بدَه:«آیا هَسَه دِ واقعاً ایمان بأوردید؟ ³² ولی زمانی فأرسه، یا بهتر بوگویم هَسَه هم فأرسه دَأره، کی همۀ شومَأن پراکندَه بید و مرَه تنها نیئید و شید خودتانِ خانه، ولی من تنها نیئِم چون می پئر می اَمرَه یه. ³³ اَشَأنَ شمرَه بوگوفتم تا می دورون آرامش بدَأرید. اَ دونیا میَأن رنج و زحمت دینید، ولی شیمی خاطر جمع بیبه، من دونیا رو پیروزَ بوسته دَأرم.»