¹ من اَنگوردارِ واقعیم و می پئر باغبانه. ² هر شاخه ایی که می دورون میوه نَأوره وَأوینه و هر شاخه ایی کی میوه بأوره یَ پاکَ کونه تا ویشتر میوه بأوره. ³ شومَأن بواسطۀ اون کلامی کی شمرَه بوگوفتم پاکَ بوسته اید. ⁴ می دورون بِئسید و منم شیمی دورون، هوطویی کی شاخه خودش تنهایی نتَأنه میوه بأوره اگر اَنگوردارَ وصل نیبه، شومَأنم اگر می دورون نِئسید نتَأنید ثمری بأورید. ⁵ بله، من اَنگوردارمْ و شومَأن اونِ شاخه یانْ، کسی کی می دورون مَأنه و منم اونِ دورون، میوۀ زیادی اَوره، اگر می جَه سیوایَ بید هیچ کاری نتَأنید بوکونید. ⁶ اگر کسی می دورون نِئسِه شاخه مَأنستَأن اونَ فیشَأند و خوشکَ بِه. مردم خوشکه شاخه یانَ جمعَ کوند و آتشِ دورون تَأوَأدد و سوجَأند. ⁷ ولی اگر می دورون بِئسید و می کلامْ شیمی دورون، هر چی بخأئید شمرَه فَأَدَه بِه. ⁸ می پئرِ جلال اَنه کی شومَأن میوۀ زیاد بأورید، و اَطو می شاگردان بیهید. ⁹ هوطو کی پئرْ مرَه دوس بدَأشته، منم شمرَه دوس بدَأشته دَأرم، پس می محبتِ دورون بِئسید ¹⁰ اگر می احکامَ بدَأرید می محبتِ دورون ایسید، هوطویی کی منْ می پئرِ احکامَ بدَأشته دَأرم و اونِ محبتِ میَأن ایسَم. ¹¹ اَ گبانَ شمرَه بزم تا می شادی جَه پورَه بید و شیمی شادی کاملَ بِه. ¹² می حُکم اَنه کی همدیگرَ محبت بوکونید، هوطویی کی من شمرَه محبت بوکودم. ¹³ محبتی پیله تر جی اَن وجود نَئره کی کسی خو جانَ خو دوستانِ رِه بنه. ¹⁴ اگر اون چیزایی کی شمرَه حکم بوکودمَ اطاعت بوکونیدْ شومَأن می دوستانید. ¹⁵ دِ شمرَه بَنده دنخَأنم، چون بنده خو اَربابِ کارانِ جَه خبر نَئره، بلکی شمرَه می دوست دَخَأنم چون هر چی کی می پئرِ جَه بیشتَأوستمَ، شمرَه بوگوفتم. ¹⁶ شومَأن مرَه انتخاب نوکودیدْ بلکی من شمرَه انتخاب بوکودم و اوسه کودم تا بیشید و میوه بأورید، میوه ایی کی همیشگی بیبه، تا به می نامْ هر چی می پئرِ جَه بخَأئیدْ شمرَه فَأُده. ¹⁷ شمرَه حُکم کونم، همدیگرَ محبت بوکونید. ¹⁸ اگر جهانْ شیمی جَه نفرت دَأره، بدَأنید پیشتر جی شومَأن می جَه نفرت دَأشته. ¹⁹ اگر شومَأن اَ جهانِ شین بوئیدْ جهانْ شمرَه دوس دَأشته، ولی چون اَ جهانِ شین نیئید و من شمرَه اَ جهانِ جَه انتخاب بوکودِم، هَنه وَسی جهان شیمی اَمرَه دوشمنی کونه. ²⁰ اونچی کی بوگوفتمَ بخاطر بدَأرید، غلام خو اَربابِ جَه پیله تر نییه، اگر مرَه اذیت بوکودد شمرَه هم اذیت کوند، و اگر می گبانَ گوش بدَأد شیمی گبانم گوش کوند. ²¹ می نامِ وَسی همۀ اَ کارانَ شیمی اَمرَه کوندْ چون کسی کی مرَه اوسَه کوده یَ نشناسد. ²² اگر نَأمو بوم و اَشَأنِ اَمرَه گب نزَه بوم گوناهی نَأشتد، ولی هَسَه دِ خوشَأنِ گوناه وَسی عُذرُ بهانه ایی نَئرد. ²³ کسی کی می جَه نفرت دَأره، می پئرِ جَه هم نفرت دَأره. ²⁴ اگر اوشَأنِ ورَجه کارهایی کی هیچ کسِ دیگری نتَأنه انجام بده یَ انجام ندَه بومْ مُقصر نوبود، ولی هَسَه اوشَأنْ اَ کارانَ بیدد ولی بازم می جَه و می پئرِ جَه نفرت دَأرد. ²⁵ و اَطو اونچی کی خودشَأنِ توراتِ میَأن پیشگویی بوبُسته حقیقت پیدا کونه کی گویه؛ "بیخودی می جَه نفرت دَأرد" ²⁶ ولی وختی اون یاور، کی از می پئرِ ورجَه شمرِه اوسه کونم بأیه، یعنی روحِ راستی کی پئرِ جَه صادر بِه، اون خودش دربارۀ من شهادت دِهه، ²⁷ و شومَأنم شهادت دهید، چون جی هون اول می اَمرَه ایسَه بید.