¹ شیمی دیل مُضطرب نیبه، خدایَ توکل بوکونید، مرَه هم ایمان بدَأرید. ² می پئرِ خانه، منزل زیاد نَهَه، اگر اَطو نوبو شمرَه گوفتم، من شؤم تا شمرِه جایی آماده کونم. ³ بعدِ اَنکی بوشوم و شمرِه جایی آمادَه کودم دوباره اَیم و شمرَه بورم خودمِ ورجَه، تا جایی کی من ایسَم شومَأنم بِئسید. ⁴ شومَأن دَأنیدْ کَ یَ شوئون درم و دَأنید چوطو بأئید اویَ» ⁵ توما اونَ بوگوفت:«ای آقا، اَمَأنْ نَأنیم تو کَ یَ شی، پس چوطو تَأنیم راهَ پیدا کونیم؟» ⁶ عیسی اونَ بوگوفت:«من راه و راستی و حیاتم، هیچکس نتَأنه بأیه پئرِ ورجَه جُز بواسطۀ من. ⁷ اگر مرَه شنَأختید، می پئرم شناختید، ولی بعد اَنْ شومَأنْ اونَ شناسید و اونَ بیده اید.» ⁸ فیلیپُس اونَ بوگوفت:«ای آقا، پئرَ اَمرَه نیشان بدن کی هَن اَمره کافیه» ⁹ عیسی اونَ بوگوفت:«ای فیلیپُس، اَ مدت شیمی اَمرَه بؤم، تو هنوز مرَه نشناختی؟ هر کی مرَه بیدینه پئرَه بیده دَأره، پس دِ چره گویی پئرَ اَمرَه نیشان بدن؟ ¹⁰ آیا باور نَئری کی من پئرِ دورون و پئرْ می دورون ایسَه؟ حرفهایی کی من شمرَه زنم خودمِ جَه نوگویم، اون پئری کی می دورون ساکنه، اونه کی اَ کارانَ انجام دِهه. ¹¹ مرَه ایمان بدَأرید کی من پئرِ دورون ایسَم و پئرْ می دورون، وگرنه، پس اون کارانی کی می جَه بیده ایدِ وَسی مرَه ایمان بدَأرید. ¹² یقین بدَأنید هر کی مرَه ایمان بأوره، کارایی کی من کونمْ اونم تَأنه انجام بده، حتی پیله تر از اونم انجام دِهه، چون منْ می پئرِ ورجَه وَأگردم. ¹³ هر چی کی به می نام بخوائید شمرَه انجام دهم تا پئر، پسرِ میَأن جلال پیدا کونه. ¹⁴ اگر چیزی به می نام بخوائید من اونَ انجام دهم.» ¹⁵ «اگر مرَه دوس بدَأرید می اَحکامِ جَه اطاعت کونید، ¹⁶ و من پئرِ جَه درخواست کونم و اون یاورِ دیگری شمرَه فَأده تا همیشه شیمی اَمرَه بِئسه. ¹⁷ یعنی روحِ راستی کی جهانْ نتأنه اونَ قبول بوکونه، چونکی اونَ نیدینه و نشنَأسه، ولی شومَأن اونَ شنَأسید، چون شیمی اَمرَه ایسه و شیمی وجودِ میَأن مَأنه. ¹⁸ شمرَه بی کس نَنم، شیمی ورجَه اَیم. ¹⁹ بعدِ ایتَه مدت، جهان دِ مرَه نیدینه، ولی شومَأن مرَه دینید، و چون من زنده یم، شومَأنم زندگی کونید. ²⁰ او روزِ رِه فهمید کی من پئرِ دورون ایسَم، و شومَأن می دورونْ و من شیمی دورونْ. ²¹ هر کی می احکامَ قبول بوکونه و اوشَأنِ جَه اِطاعت بوکونه هونْ کسی ایسه کی مرَه دوس دَأره، و هر کی مرَه دوس بدَأره می پئرم اونَ دوس دَأره، و منم اونَ دوس دَأرم و خودمَ اونَ نیشان دهم. ²² ایتَه جی اونِ شاگردان کی یهودا نام دَأشته "البته نه یهودایِ اسخریوطی" عیسیَ بوگوفت:«ای آقا، چره خَأیی خودتَ اَمرَه آشکارَ کونی ولی جهانِ رِه نه؟» ²³ عیسی اونَ جواب بدَه:«اگر کسی مرَه دوس بدَأره، می کلامَ دَأره و می پئرم اونَ دوس دَأره، و اَمَأن اونِ ورجَه اَئیم و اونِ اَمرَه زندگی کونیم. ²⁴ و کسی کی مرَه دوس نَئره، می کلامِ جَه اطاعت نوکونه. اونچی کی شومَأن ایشتَأوید می جَه نییه بلکی پئری جَه یه کی مرَه اوسه کوده. ²⁵ اَ چیزانَ زمانی شمرَه بوگوفتم کی هنوز شیمی ورجَه ایسه بؤم. ²⁶ ولی اون یاور، یعنی روح القدس، کی پئر اونَ به نام من اوسه کونه، همه چیَه شمرَه یاد دِهه و هر چی من شمرَه بوگوفتمَ، شمرَه بخاطر اَوره. ²⁷ شمرِه آرامش بجا نهم، خودمِ آرامشَ شمرَه فَأدم، اونچی کی من شمرَه فَأدم، آرامشی مَأنستَأن نییه کی دونیا شمرَه فَأده، پس شیمی دیل مضطرب نیبه و نترسید. ²⁸ بیشتَأوستید کی شمرَه بوگوفتم؛ من شؤم، ولی شیمی ورجَه وَأگردم. اگر مرَه دوس بدَأرید اَ خبرِ جَه خوشحالَ بید کی شوئون درم می پئرِ ورجَه، چون پئر می جَه پیله تره. ²⁹ من همه چیَه پیشترْ شمرَه بوگوفتم تا وختی اتفاق دکفته مرَه ایمان بأورید. ³⁰ دِ خیلی وختْ نَئریم کی شیمی اَمرَه گب بزنم، چون اَ جهانِ رئیس اَیه، اون می رو هیچ قدرتی نَئره. ³¹ ولی من کاری یَ انجام دهم کی پئرْ مرَه فرمان بدَه دَأره، تا جهانْ بدَأنه کی منْ پئرَ دوس دَأرم. ویریزید تا از اَیَ بیشیم.»