¹ ایتَه روز بمَأنسته بو به عیدِ فصحْ، عیسی دَأنستِه کی اونِ وخت برسه دَأره تا اَ جهانِ جَه بیشه خو پئرِ ورجَه، اونْ خو کسانَ کی اَ دونیا میَأن اوشَأنَ محبت کوده یَ تا به آخر محبت بوکود. ² شام خوردنِ وخت بو. اِبلیس پیشتر یهودایِ اسخریوطی دیلِ میَأن بنَه بو کی عیسی یَ تسلیم بوکونه. ³ عیسی با اَنکی دَأنسته پئر همه چیَه اونَ بیسپُرده، و جی خدا ورجَه بأمو دَأره و اونِ طرف شوئون دره. ⁴ سُفره سرِ جَه ویریشت، خو لباسَ بکد و حوله ایی بیگیفت و دَوَست خو کمرَ. ⁵ بازن آب دوکود لگن دورون، و شروع بوکود شاگردانِ پایَ بوشوره، و حوله ایی اَمرَه کی خو کمرَ دوَسته بو اوشَأنِ پایَ خوشکَ کود. ⁶ وختی شمعونِ پطرسِ نوبت فأرسِه، پطرس اونَ بوگوفت:«ای آقا، تو خَأیی می پایَ بوشوری؟» ⁷ عیسی جواب بدَه:«تو هَسَه نَأنی من چی کودَأن درم، ولی بعداً فَهمی» ⁸ پطرس بوگوفت:«هیچموقع وَأنألم می پایَ بوشوری.» عیسی اونَ بوگوفت:«اگر ترَه نوشورم می اَمرَه سهمی نَئری.» ⁹ شمعونِ پطرس اونَ جواب بدَه:«پس آقا، هَسَه کی اَطویه، نه فقط می پایَ، بلکی می سر و می دستانم بوشور» ¹⁰ عیسی بوگوفت:«کسی کی غُسل بوکوده، سر تا پا تمیزه و شوستنَ احتیاج نَئره، مگر اَنکی خو پاهانَ بوشوره، شومَأن پاکید، ولی نه همه تَه.» ¹¹ چون عیسی دَأنسته کیی اونَ تسلیم کونه، هَنه وَسی اَنَ بوگوفت کی همۀ شومَأن پاک نیئید. ¹² بعدِ اَنکی خو شاگردانِ پاهانَ بوشوست خو لیباسَ دوکود و دوباره سُفره دور بینیشت و شاگردانِ جَه وَأورسه:«آیا بفهمستید چی وَسی اَ کارَ بوکودم؟ ¹³ شومَأن مرَه استاد و آقا دخَأنید، و دوروستم گوئید چون هَطو ایسم. ¹⁴ پس اگر من کی شیمی آقا و مُعلمم و شیمی پاهانَ بوشوستم، شومَأنم وَأستی همدیگرِ پاهانَ بوشورید. ¹⁵ شمرَه نمونه فأدم تا هوطویی کی من شیمی اَمرَه رفتار بوکودم شومَأنم هوطو رفتار بوکونید. ¹⁶ یقین بدَأنید کی هیچ غلامی خو اربابِ جَه و هیچ قاصدی خو اوسَه کوده جَه پیله تر نییه. ¹⁷ هر وخت اَنَ بفهمستید، خوش به حال شومَأن اگر اونَ عمل بوکونید. ¹⁸ اونچی کی گویم مربوط به همۀ شومَأن نییِه، من کسانی کی انتخاب بوکودمَ خوب شناسم، ولی کیتاب مقدسِ اَ پیشگویی وَأستی انجام بیگیره کی گویه؛ اونی کی می اَمرَه نان خوره بر ضّدِ من ویریشته. ¹⁹ هَسَه قبلِ اَنکی اتفاق دکفه شمرَه گویم تا وختی اتفاق دکفت ایمان بأورید کی من اونم. ²⁰ یقین بدَأنید هر کی، کسی کی من اوسَه کونمَ قبول بوکونه مرَه قبول بوکوده، و هر کی مرَه قبول بوکونه می اوسَه کوده یَ قبول بوکوده.» ²¹ وختی عیسی اَ حرفَ بزَه، خو روحِ دورون مضطرب بوبُست و آشکارا اعلام بوکود:«یقین بدَأنید ایتَه از شومَأن مرَه دوشمنانِ دس تسلیم کونه» ²² پس شاگردان مات و مبهوت همدیگرَ فَأندرستد و حیران بودْ کی عیسی اَنَ دربارۀ کی گویه. ²³ شاگردی کی معمولا عیسی یَ تکیه دَئه و عیسی هم اونَ خیلی دوس دَأشته، عیسی ورجَه نیشته بو. ²⁴ شمعونِ پطرس اِشاره اَمرَه اونِ جَه بخواست کی عیسی جَه وَأورسه کی اَ حرفَ دربارۀ کی بزَه. ²⁵ پس اون شاگردم خورَه تَأوَأدَه عیسی کِشِه میَأنُ اونِ جَه وَأورسه:«ای خداوند، اون کیسه؟» ²⁶ عیسی جواب بدَه:«اون کسی ایسه کی من لقمه ایی زنم کاسه دورون و اونَ فَأدم» بازن عیسی لقمه ایی بیگیفت و بزَه کاسه دورون و فَأدَه یهودایِ اسخریوطی دس. ²⁷ هَطو کی یهودا لقمه یَ بیگیفت، شیطانْ اونِ وجودَ وارد بوبُست، بازن عیسی اونَ بوگوفت:«اون کاری کی خَأیی انجام بدی یَ زودتر انجام بدن.» ²⁸ ولی هیچ کودام جی کسانی کی اویَ ایسَه بود نفهمستد کی عیسی منظور جی اَن حرف چی بو. ²⁹ فقط بعضیان خیال بوکودد چون کیسۀ پول یهودا ورجَه نَهَه، عیسی اونَ بوگوفت تا اونچی کی عیدِ رِه نیاز دَأردَ بِهِنه یا اَنکی چیزی فقیرانَ فَأده. ³⁰ پس یهودا لقمه یَ بیگیفت و سریع بوشو بیرون، و شب بو. ³¹ وختی یهودا بیرون بوشو، عیسی بوگوفت:«هَسَه انسانِ پسرْ جلال پیدا کونه و از طریق اونْ خدا هم جلال پیدا کونه.» ³² و اگر خدا از طریق اونْ جلال پیدا کود، پس خدا هم اونَ جلال دِهه و اَن جلالْ بزودی شروع بِه. ³³ ای زأکأن، ایتَه مدتِ کوتاه شیمی اَمرَه ایسم، و هوطویی کی یهودیانَ بوگوفتم هَسَه هم شمرَه گویم، می دونبال گردید، ولی جایی کی من شؤم شومَأن نتَأنید بأئید. ³⁴ پس هَسَه حُکمی تازه شمرَه فَأدم، همدیگرَ محبت بوکونید هوطویی کی من شمرَه محبت بوکودم. ³⁵ اگر همدیگرَ محبت بوکونیدْ همه فهمده کی می شاگردانید.» ³⁶ شمعونِ پطرس عیسی جَه وَأورسه:«ای آقا کَ یَ شی؟» عیسی جواب بدَه:«جایی شؤم کی هَسَه نتَأنی می دونبال بَأیی، ولی بعداً می دونبال اَیی» ³⁷ پطرس بوگوفت:«ای آقا، چی وَسی هَسَه نتَأنم تی دونبال بأیم؟ من حاضرم می جانَ تِرِه بنم» ³⁸ عیسی اونَ جواب بدَه:«آیا حاضری تی جانَ مِرِه بنی؟ ترَه گویم یقین بدَأن کی هَ اِمشب قبلِ اَنکی خروس بخَأنه تو سه بار گویی کی مرَه نشناسی!»