¹ شیش روز قبلِ عیدِ فِصَح عیسی بأمو بیت عَنیا، هون جایی کی ایلعازرَ بعدِ مَردنْ زندَه کوده بو. ² عیسی وَسی اویَ شام دهی بوکودد. مهمانی میَأن مِرتا پذیرایی کوده و ایلعازرم مهمانانِ مرَه عیسی ورجَه نیشته بو. ³ بازن مریم ایتَه شیشه عطرِ سُنبلِ خالص گرانقیمت اوسَأد و فوکود عیسی پاهانِ رو، و خو سرِ مو اَمرَه اونِ پاهانَ خوشکَ کود. جوری کی کُلِ خانه بویِ عطر بیگیفت. ^{4 5} هَ موقع ایتَه از اونِ شاگردان یعنی یهودایِ اسخریوطی که بعداً عیسی یَ تسلیم بوکود بوگوفت:«چی وَسی اَنْ عَطرْ سیصد دینار بوفروخته نوبوست تا اونِ پولْ فقیرانَ فأدَه بیبه؟» ⁶ اون اَ حرفَ فقیرانِ دیلسوزی وَسی نوگوفت، بلکی اَنِ وَسی بوگوفت کی دوزد بو، اون دخل و خرجِ مسئول بو و پولی کی اونَ فَأدَئِدِ جَه اوسَأده. ⁷ عیسی جواب بدَه:«اونِ اَمرَه کاری ندَأرید، چون اَنْ عَطرَ می روزِ دفنِ رِه بدَأشته بو. ⁸ فقیران همیشه شیمی اَمرَه ایسَد، ولی من همیشه شیمی اَمرَه نِئسَم.» ⁹ خیلی از یهودیان بیشتَأوستد کی عیسی بأمو دَأره اویَ، پس بأمود تا نه فقط عیسی یَ بیدیند، بلکی تا ایلعازرم کی اونْ مُرده یانِ جَه زندَه کوده بویَ بیدیند. ¹⁰ هَنه وَسی کاهنانِ اعظم تصمیم بیگیفتد ایلعازرم بوکوشد. ¹¹ چون خیلی از یهودیان اونِ وَسی شوئِد و عیسیَ ایمان اَوردد. ¹² اون روزِ فردایی، خیلی از یهودیان کی عیدِ وَسی بأمو بود اورشلیم، وختی بیشتأوستد عیسی اَمون دره اورشلیم، ¹³ نخلِ شاخه یَ اوسَأدد و بوشود اونِ پیشواز. اوشَأنْ فریاد زَئِد:«هوشیعانا، مبارک بیبه اونی که به نامِ خداوند اَیه، مبارک بیبه اسرائیلِ پادشاه» ¹⁴ عیسی ایتَه کُره خر پیدا کود و اونِ رو سوارَ بوست، هوطویی کی خدا کلام میَأن بینیویشته بوبُسته: ¹⁵ «ای صَهیونِ دختر، نوَه ترسِن، هَسَه تی پادشاهْ کُره خَریَ سوارَ بوسته و آمون دره.» ¹⁶ اونِ شاگردان اول اَ چیزانَ نفهمستد. ولی وختی عیسی جلال پیدا کود اونموقع بیاد بأوردد که اَ چیزان دربارۀ اون بینیویشته بوبُسته بو و دقیقاً هوطو اتفاق دکفت. ¹⁷ جمعیتِ میَأن کسانی ایسَه بود کی وختی عیسی ایلعازرَ زندَه کودْ اویَ ایسَه بود، اوشَأنْ اونچی کی بیده بودَه مردمِ رِه نقل کودد. ¹⁸ اصلاً هَ مُعجزه وَسی بو کی اونهمه آدم اوطو شور و شوقِ اَمرَه بوشو بود اونِ پیشواز. ¹⁹ پس فریسیان همدیگرَ گوفتد:«نیدینید؟ دِ نتَأنید کاری بوکونید، تمامی دونیا اونِ دونبال شوئون درد» ²⁰ جمعیتِ میَأن کی عیدِ وَسی بأمو بود اورشلیم، بعضیان یونانی بود. ²¹ اوشَأن بأمود فیلیپُسِ ورجَه کی بِیت صیدایِ جلیلِ شین بو و اونَ بوگوفتد:«ای آقا، اَمَأن خَأئیم عیسیَ بیدینیم» ²² فیلیپُس بوشو و اَ حرفَ آندریاسَ بوگوفت و هر دو نفر بوشود عیسی ورجَه و اونَ بوگوفتد. ²³ عیسی اوشَأنَ جواب بدَه:«اونِ وخت برسه دَأره کی انسانِ پسر جلال پیدا کونه، ²⁴ یقین بدَأنید اگر گندمِ دانه خاکِ دورون نیشه و نیمیره، هیچموقع ایتَه دانه جَه ویشتر نیبه، ولی اگر بیمیره، دانه هایِ زیادی به بار اَوره. ²⁵ کسی کی خو جانَ دوس دَأره اونَ جی دس دِهه، ولی کسی کی اَ جهانِ دورون خو جانِ جَه بوگذره، اونَ تا حیاتِ جاودانی حفظ کونه. ²⁶ اگر کسی خَأیه مرَه خدمت بوکونه وَأستی می دونبال بأیه و هر جا من بِئسم می خادمم وَأستی می اَمرَه اویَ بِئسه، و هر کی مرَه خدمت بوکونه، می پئر اونَ سربلند کونه. ²⁷ هَسَه می جان آشفته یه، چی بوگویم؟ آیا بوگویم،"ای پئر مرَه اَ ساعتِ جَه نجات بدن؟" ولی من هَ ساعتِ وَسی بأموم به اَ جهان. ²⁸ ای پئر، خودتِ نامَ جلال بدن» ایمرتبه صدایی جی آسمان بأمو کی بوگوفت:«جلال بدم، و بازم جلال دهم» ²⁹ وختی مردمی کی اویَ ایسَه بود صدایَ بیشتأوستد، بعضیان بوگوفتد:«رعد و برق بزَه» بعضی دیگر بوگوفتد:«نه ایتَه فرشته اونِ اَمرَه گب بزه» ³⁰ ولی عیسی بوگوفت:«اَ صدا شیمی وَسی بأمو نه می وَسی، ³¹ هَسَه دِ اَ جهانِ داوری موقعه یه و اَ جهانِ رئیسْ بیرون تَأوأدَه بِه. ³² وختی آسمانِ طرف بوجُر شوم، همۀ آدمیانَ خودمِ طرف فأکشم» ³³ عیسی اَ گبِ اَمرَه، نوعِ مرگی کی اونِ رأفأ ایسَه بویَ اشاره بوکود. ³⁴ مردم اونَ بوگوفتد:«تو مرگِ جَه گب زنی؟ ولی تورات اَمَرَه تعلیم دِهِه کی مسیح تا اَبد زنده مَأنه، پس تو چوطو گویی کی انسانِ پسر وَأستی بوجُر فَأکشه بیبه؟» ³⁵ عیسی اوشَأنَ بوگوفت:«فقط ایتَه مدتِ کوتاه نور شیمی اَمرَه ایسَه، تا وختی اَ نور شیمی اَمرَه یه راه بیشید نوکونه تاریکی میَأن بئسید، کسی کی تاریکی دورون راه شِه نَنه کی کَ یَ شوئون دره. ³⁶ تا زمانی کی نورَ دَأرید نورَ ایمان بأورید تا نورِ زَأکأن بیبید.» بازن عیسی بوشو و خورَه مردمِ چومِ جَه جیگا بدَه. ³⁷ با اَنکی عیسی اوشَأنِ چومِ جولو اَنهمه معجزه انجام بدَه بو، بازم اونَ ایمان نأوردد. ³⁸ تا اونچی کی اِشعیایِ نبی پیشگویی بوکوده بو به انجام برسه:«ای خداوند، کیسه کی اَمی پیامَ باور بوکوده بِه و خداوندِ قدرتَ، اَ چیزانِ میَأن بیده بِه؟» ³⁹ و اوشَأن نتَأنستد ایمان بأورد چون هوطو کی اِشعیایِ نبی بوگوفته بو: ⁴⁰ « اَ قؤمِ دیل سختَ بوسته. اوشَأنِ گوش سنگینَ بوسته و خوشَأنِ چومَ دوَسته دَأرد، نوکونه بیدیند و بفهمدْ، و وَأگردد می طرفُ و من اوشَأنَ شفا بدم» ⁴¹ اِشعیا اَ پیشگویی یَ بوکود چون عیسی جلالَ بیده و دربارۀ اون گب بزَه. ⁴² ولی با همۀ اَ گبانْ، بعضی از یهودیانِ سرانْ ایمان بأوردد کی اون واقعاً مسیحه، ولی فریسیانِ جَه ترسِئد و علناً نوگوفتد، چون ترسِئد کی کنیسه جَه اخراج بوبود. ⁴³ در واقع اوشَأنْ مردمِ تعریف و تمجیدَ، ویشتر از عزّتی کی خدا طرفِ جَه یه دوس دَأشتد. ⁴⁴ اونموقع عیسی صدایِ بلندِ اَمرَه بوگوفت:«اونی کی مرَه ایمان بأوره، نه مرَه، بلکی اونی کی مرَه اوسه کوده یَ ایمان بأورده. ⁴⁵ چون هر کی مرَه بیدینه، کسی کی مرَه اوسه کوده یَ بیده دَأره. ⁴⁶ من ایتَه نورِ مَأنستَأن بأموم به اَ جهانْ تا هر کی مرَه ایمان بأوره تاریکی میَأن نئسِه، ⁴⁷ و اگر کسی می کلامَ بیشتَأوست و ایمان نأورد، من اونَ داوری نوکونم، چون نأموم کی جهانَ داوری بوکونم، بلکی بأموم تا جهانَ نجات بدم. ⁴⁸ هر کی مرَه حقیر بدَأنه و می کلامَ قبول نوکونه، ایتَه داور ایسَه کی در حقِ اون داوری کونه، هون حرفهایی کی بزم روزِ قیامتِ رِه اونَ محکوم کونه. ⁴⁹ چون من خودمِ جَه چیزی نوگوفتم، بلکی پئری کی مرَه اوسَه کود مرَه فرمان بدَه چی بوگویم و چوطو گب بزنم. ⁵⁰ و دَأنم کی اونِ فرمان حیاتِ جاودانیه، پس اونچی کی من گویم هون چیزایی ایسه کی پئر مرَه بوگوفته تا بوگویم.»