⁸ شاگردان اونَ بوگوفتد:«ای اُستاد، هَ چن وخت پیش بو کی یهودیان خَأستد ترَه سنگسار بوکوند، بازم خَأیی بیشی اویَ؟» ⁹ عیسی جواب بدَه:«آیا ایتَه روز دوازده ساعت نییه؟ کسی کی روزِ میَأن راه شِه لیز نوخوره، چون اَ جهانِ نورَ دینه، ¹⁰ ولی اگر کسی شبِ رِه راه بیشه، لیز خوره، چون هیچ نوری وجود نَئره.» ¹¹ عیسی اَ حرفانَ بزه و باز بوگوفت:«اَمی رِفق ایلعازر خوفته، ولی من شؤم تا اونَ بیدارَ کونم.» ¹² شاگردان بوگوفتد:«ای آقا، اگر اون خوفته، حتماً خوب بِهه» ¹³ ولی عیسی اونِ مرگِ جَه گب زَئه، ولی اوشأن فکر کودد اونْ دربارۀ خوابِ معمولی گب زنه. ¹⁴ بازن عیسی واضح اوشَأنَ بوگوفت:«ایلعازر بمرده، ¹⁵ و من شیمی وَسی خوشحالم کی اویَ نِئسَه بوم، چون اونِ مرگ باعث بِه شومَأن ایمان بأورید، هَسَه بأئید بیشیم اونِ ورجَه.» ¹⁶ ایتَه جی شاگردان کی "توما" یعنی "دو قلو" نام دَأشته باقی شاگردانَ بوگوفت:«بأئید اَمَأنم بیشیم تا اونِ اَمرَه بیمیریم.» ³³ وختی عیسی بیده مریم زار زار گریه کونه و یهودیانی کی اونِ اَمرَه بأمو دَأرد هم گریه کوند، خیلی ناراحتَ بوست، ³⁴ بازن وَأورسه:«اونَ کَ یَ بنَه دَأرید؟» بوگوفتد:«ای آقا، خودت بیا و بیدین» ³⁵ عیسی چومَأنِ جَه اشک فووَأسته. ³⁶ یهودیان همدیگرَ گوفتد:«بیدینید چقدر اونَ دوس دَأشته» ³⁷ ولی بعضی دیگر گوفتد:«اَ مردْ کی کورِ چومَ شفا بدَه، چره نتَأنست کاری بوکونه کی ایلعازر نیمیره؟» ³⁸ باز عیسی خیلی ناراحتَ بوست، اونْ بوشو قبرِ سر، قبرْ غاری بو کی اونِ جولو سنگ بنَه بود. ³⁹ عیسی بوگوفت:«سنگَ اوسَأنید» مِرتا ایلعازرِ خأخور اونَ بوگوفت:«ای آقا، هَسَه دِ جنازه بو دِهِه، چون چهار روز بوگوذشته.» ⁴⁰ عیسی بوگوفت:«آیا ترَه نوگوفتم اگر ایمان بأوری، خدا جلالَ دینی؟» ⁴¹ پس سنگی کی قبرِ جولو نَهه بویَ اوسَأدد. عیسی آسمانَ فأندرست و بوگوفت:«ای پئر، ترَه شُکر کونم کی مرَه بیشتَأوستی، ⁴² من دَأنستم کی تو همیشه مرَه ایشتَأوی، ولی اَنَ کسانی وَسی بوگوفتم کی هَ یَ ایسَد، تا ایمان بأورد کی تو مرَه اوسه کوده ایی.» ⁴³ اَ حرفَ بزه و صدایِ بلندِ اَمرَه دخَأد و بوگوفت:«ایلعازر، بیأ بیرون» ⁴⁴ اون مُرده بیرون بأمو، هوطو کی اونِ دست و پا کفن پیچ بو، و اونِ صورتِ رو دستمالی نَهه بو. عیسی اوشَأنَ بوگوفت:«اونَ بازَ کونید و وَألید بیشه.» ⁴⁵ و خیلی از یهودیان کی بأمو بود مریمِ دِئِنِ رِه و عیسی کارَ بیدد اونَ ایمان بأوردد. ⁴⁶ ولی بعضی بوشود فریسیانِ ورجَه و اونچی کی عیسی بوکوده بویَ اوشَأنَ خبر بدَأد. ⁴⁷ کاهنِ اعظم و فریسیان ایتَه جلسه تشکیل بدَأد و بوگوفتد:«چی وَأستی بوکونیم؟ چون اَ مردْ معجزاتِ زیادی انجام دِهه، ⁴⁸ اگر اونَ هَطو آزاد بنیم همۀ مردمْ اونَ ایمان اَورد و اونموقع رومیان اَید و اَن معبدْ و اَمی قؤمَ جی میَأن بورد.» ⁴⁹ ایتَه جی اوشَأنْ کی قیافا نام دَأشته و اون سالِ رِه کاهنِ اعظم بو ویریشت و بوگوفت:«شومَأن هیچی نَأنید، ⁵⁰ فکر نوکونید بهتره اینفر همۀ قؤمِ فدا بیبه؟ آیا بهتر نییه اَ شخص بیمیره تا اَمی قؤم هلاک نیبه؟» ⁵¹ اونْ اَ حرفَ خودشِ جَه نوگوفت، بلکی چون کاهنِ اعظم بو، نبوّت بوکود کی وَأستی عیسی همۀ قؤمِ وَسی بیمیره، ⁵² و نه فقط قؤمِ ره، بلکی تا خدا زأکأنَ کی پراکنده یدْ همه یَ در ایتَه بدن جمعَ کونه. ⁵³ و جی هون روز به بعد تصمیم بیگیفتد کی عیسی یَ بوکوشد. ⁵⁴ بعدِ اونْ عیسی دِ آشکارا یهودیانِ میَأن شوئون آمون نوکوده، بلکی جی اویَ بوشو به شهری کی اَفرایم نام دَأشته و بیابانِ نزدیکی نَهه بو. ⁵⁵ کم کم عیدِ فصح نزدیک بوسته. و خیلیان جی دهات نزدیک اَموده اورشلیم تا خوشَأنَ قبلِ عیدْ تطهیر بوکوند. ⁵⁶ و خیلیان دوس دَأشتد عیسی یَ بیدیند و معبدِ دورون همدیگرَ گوفتد:«چی فکر کونید؟ یعنی عیدِ وَسی اَیه؟» ⁵⁷ ولی کاهنانِ اعظم و فریسیان دستور بدَه بود هر کی بدَأنه عیسی کَ یَ ایسَه وَأستی اطلاع بده تا اونَ بیگیرد.