⁷ پس عیسی اوشَأنِ رِه توضیح بدَه و بوگوفت:«یقین بدَأنید من اونْ دری ایسم کی گوسفندانْ اونِ جَه بودورون اَید. ⁸ همۀ کسانی کی پیشتر جی من بأمود دزد و راهزن بود و گوسفندانْ اوشَأنِ حرفانَ گوش نوکودد. ⁹ من در ایسم، هر کی بواسطۀ من بودورون بَأیه نجات پیدا کونه، و بیرون و بودورون شِه و عَلف پیدا کونه. ¹⁰ دوزد نَأیه مگر اَنکی بخَأیه بودوزَأنه و بوکوشه و هلاکْ بوکونه. من بأموم تا اوشَأنْ حیات پیدا کوند و اونْ حیاتِ جَه به فراوانی بَهره بوبورد. ¹¹ من چوپانِ خُب ایسم. چوپانِ خُب خو جانَ گوسفندانِ رِه نِهه. ¹² ولی کسی کی مُزد فأگیره و چوپان نییه و گوسفندانم اونِ شین نییِد، وختی دینه گُرگ اَمون دره، گوسفندانَ نِهه و فرار کونه، و گُرگم گوسفندانَ گیره و پراکندَه کونه. ¹³ اون فرار کونه چونکه مُزد بیگیره و گوسفندانِ فکر نییه. ¹⁴ من چوپانِ خُب ایسم، من می گوسفندانَ شناسم و اوشَأنم مرَه شناسد. ¹⁵ هوطو کی پئرْ مرَه شناسه منم پئرَ شناسم و می جانَ گوسفندان رِه فدا کونم. ¹⁶ منْ گوسفندانِ دیگری هم دَأرم کی اَ گله شین نیید، وَأستی اوشَأنم بأورم، اوشَأنْ می صدایَ ایشتَأود و ایتَه گله بهد و ایتَه چوپان دَأرد. ¹⁷ پئر مرَه دوس دَأره، چون من می جانَ فَأدم تا دوباره اونَ پسَ بیگیرم. ¹⁸ هیچکس می جانَ فَأنگیره، بلکی منْ، خودمِ میلِ اَمرَه اونَ فدا کونم. قدرت دَأرم کی اونَ بنم، و قدرت دَأرم کی اونَ پسَ گیرم. پئر اَ اختیارَ مرَه فَأدَه دَأره.» ¹⁹ اَ حرفانِ وَسی باز یهودیانِ میَأن دو دستگی بوبُست. ²⁰ بعضی جی اوشَأن گوفتد:«اون دیوانه یه و دیو دَأره، چره اونِ حرفانَ گوش کونید؟» ²¹ ولی بعضی دیگر گوفتد:«اَ حرفانْ ایتَه دیوانه حرفان نییِه، آیا دیو تَأنه کورانِ چومَ وَأکونه؟» ²² وختی عیدِ تقدیس اورشلیمِ میَأن شروع بوبُست، زمستان بو. ²³ و عیسی معبدِ دورونْ و سُلیمانِ تالارِ میَأن قدم زَئه. ²⁴ یهودیانِ سران، اونِ دورَ بیگیفتد و وَأورسد:«تا کِی خَأیی اَمرَه بی تکلیفی دورون بدَأری؟ اگر مسیحی، آشکارا اَمرَه بوگو.» ²⁵ عیسی جواب بدَه:«من قبلاً هم شمرَه بوگوفتم ولی ایمان نَأوردید. مُعجزه یانی کی به نامِ می پئر انجام دهم شهادت دهد کی من مسیحم. ²⁶ ولی شومَأن ایمان نأورید، چون جُزِ می گوسفندان نیئید. ²⁷ می گوسفندان می صدایَ شناسد، منم اوشَأنَ شناسمْ، و اوشَأنْ می دونبال اَید. ²⁸ من اوشَأنَ حیاتِ جاودانی فَأدم و هیچموقع هلاکَ نوبود، و هیچکس اوشَأنَ می دسِ جَه نیگیره. ²⁹ چون می پئرْ اوشَأنَ مرَه فَأدَه دَأره و اونْ، همه تَه جَه پیله تره، هیچکس نتَأنه اوشَأنَ می پئرِ دسِ جَه بیگیره. ³⁰ من و پئرْ ایتَه ایم.» ³¹ اَ موقع یهودیان ایبارِ دیگر سنگ اوسَأدد تا اونَ سنگسار بوکوند. ³² عیسی اوشَأنَ بوگوفت:«کارهایِ خوبِ زیادی می پئرِ طرفِ جَه شمرِه انجام بدم، کَ ی تَه وَسی خَأئید مرَه سنگسار بوکونید؟» ³³ یهودیان جواب بدَأد:«کارهایِ خوبِ وَسی نییه کی خَأئیم ترَه سنگسار بوکونیم، بلکی تی کُفر گوفتنِ وَسی یه. تو کی ایتَه انسانی، اِدعایِ خدایی کونی!» ³⁴ عیسی اوشَأنَ جواب بدَه:«مگر شیمی توراتِ دورون نأمو دَأره کی "شومَأن خدایانید؟" ³⁵ پس اگر خدا، اوشَأنی کی اونِ کلامَ دریافت بوکوددَه، خدایان دخَأده، و اَمَأن دَأنیم کی خدا کلام هیچموقع باطل نیبه. ³⁶ پس چره مرَه کی پئر انتخاب بوکوده و اوسَه کوده به جهانْ گوئیدی کُفر گوفتَأن درمْ وختی گویم خدا پسرم؟