¹ وختی حُکم بوکودد کی جی راهِ دریا بیشیم ایتالیا، پولس و چن تَه زندانی دیگرَ ایتَه افسرَ کی «یولیوس» نام دَأشته و جُزِء قیصرِ سپاه بو تحویل بدد. ² اَمَأن ایتَه کشتی یَ سوارَ بوستیم و حرکت بوکودیم کی اَدرامیتینوسِ جَه بأمو بو و شوئون دوبو ایالتِ آسیا بنادر. آریستارخوسِ مقدونی کی جی مردمان شهرِ تسالونیکی بو اَمی اَمرَه بأمو. ³ فردایی فأرسِه ایم بندرِ صیدونَ، و یولیوس پولسَ لُطف بوکود و وَأهَأشت کی پولس بیشه خو دوستانِ دِئِنِ رِه تا خو احتیاجاتَ اوشَأنِ جَه فَأگیره. ⁴ جی اویَ راه دکفتیم و چون باد جی جهتِ مخالف آمویه جی قبرسِ حاشیه کی باد پناه بو بوگوذشتیم. ⁵ جی بنادرِ قیلیقیه و پامفلیه روبرو دوَأرستیم و فَأرسِه ایم میرایَ کی ایالتِ لیکیه جَه نَهه بو، در اویَ پیادَه بوستیم. ⁶ اویَ افسرِ رومی ایتَه مصری کشتی پیدا کود کی جی اسکندریه بأمو بو و شوئون دوبو ایتالیا طرف، و همۀ اَمرَه اونَ سوارَ کود. ⁷ چن روزی خیلی آرام حرکت کودیم و سختی اَمرَه فَأرسِه ایم بندرِ قنیدوس. چون بادِ مخالف آمویه ایتَه جهتِ دیگرَ پیش بیگیفتیم و جزیرۀ سالمونی دماغه جَه دوَأرستیم و بوشوئیم جزیرۀ کرِتِ ساحلِ طرف کی باد پناه بو، ⁸ سختی اَمرَه ساحلِ کنارِ جَه دوَأرستیم و جایی یَ فَأرسِه ایم کی بندرِ نیک نام دَأشته و شهرِ لسائیه نزدیکی نَهَه بو. ⁹ زمانِ زیادی جی دس بوشو بو و حتی ایامِ روزه کی آخرِ پائیزه هم تومامَ بوسته بو و دریا میَأن سفر کودَأن دِ خطرناک بو. ¹⁰ پولس اوشَأنَ نصیحت بوکود و بوگوفت:«آقایان من مطمئنم کی جی اَن به بعد خیلی خطرناکه و نه فقط کشتی و اونِ بار صدمه دینه، بلکی اَمی جانم به خطر دکفه» ¹¹ ولی افسرِ رومی، ناخدا و کشتی صاحابِ گبانَ ویشتر توجه کوده تا پولسِ گبَ. ¹² و چون اون بندر جایِ خوبی نوبو کی زمستانَ اویَ بِئسیم، اکثراً صَلاح بدَأنستد کی ایدامه بدیم، به اَ اُمید کی فَأرسیم بندرِ فینیکسَ و بتَأنیم زمستانَ در اویَ بئسیم. اَ بندر جزیرۀ کرتِ میَأن نَهه بو و رو به شمالِ غربی و جنوبِ غربی بو. ¹³ پس وختی جنوبِ جَه ایتَه بادِ ملایم بدمست، گُمان بوکودد کی اونچی کی خَأستدَ برسه دَأرد، پس کشتی لنگرَ فَأکشِد و جزیرۀ کرِتِ ساحلِ راسته حرکت بوکودیم. ¹⁴ ولی خیلی نوشوبیم کی هوا خرابَ بوست و ایتَه بادِ شدید کی بادِ شمالِ شرقی یَ معروفه جی جزیره طرف به اَمی طرف بدمست. ¹⁵ و طوفان بوبُست و کشتی دِ نِتَأنست بر خلافِ مسیرِ باد حرکت بوکونه، هَنه وَسی خودمَأنَ بادَ بیسپُردیم و باد کشتی یَ بوردَأن دوبو. ¹⁶ و کشتی فَأرسه ایته کوچدانه جزیره جنوبِ طرف کی کلودی نام دَأشته، زحمتِ زیادِ اَمرَه قایقِ نجاتَ کی کشتی پوشت دوَسته بوبُسته بویَ به اَمی اختیار بیگیفتیم، ¹⁷ و ملوانانِ کمکِ اَمرَه اونَ بأوردیم کشتی بوجُر، و ملوانان لافندِ مرَه کشتی دؤرَ دوستد تا ویشتر طاقت بأوره و مُتلاشی نیبه، و چون ترسده کی کشتی جاهای کم عُمقِ خلیجِ سیرتسِ میَأن به گیل بینیشه، بادبانانَ بیجیر بأوردد، ولی توندِ باد کشتی یَ هطو خو مرَه بوردَأن دوبو. ¹⁸ طوفان هَطو ایدامه دَأشته و فردایی رِه مجبور بوبُستیم کشتی بارَ تَأوَأدیم دریا میَأن. ¹⁹ روزِ سومِ رِه کشتی لوازم یدکی، و هر چی کی اَمی دس فَأرسِه یَ تَأوَأدَأئیم دریا میَأن. ²⁰ روزای زیادی نه آفتابِ رنگَ دِئیم نه ستاره یانِ رنگَ، طوفان هم تومامَ نوبوسته و شدت دَأشته و توندِ باد همچنان دمسته و هیچکس دِ اُمیدی نجاتِ رِه نَأشته. ²¹ ایتَه مدت هَطو بوگوذشت و هیچکس غذا نوخورده بو و همه تَه ویشتا بود، پولس بوشو همه یَ جمعَ کود و اوشَأنِ میَأن بِئسَه و بوگوفت:«آقایان، وَأستی هو اول می حرفَ گوش بدَه بید و بندرِ نیکِ جَه حرکت نوکوده بید تا اَن همه ضرر و زیان نیده بید. ²² هَسَه هم شیمی جَه خَأیم کی نترسید و غُصه نوخورید، چون هیچکسِ جانَ ضرری نرسه و فقط کشتی جی میَأن شِه. ²³ چون دیشبِ رِه اون خدایی فرشته کی اونِ شینم و اونَ خدمت کونم می ورجَه بِئسَه ²⁴ و بوگوفت:«پولس نترس، چره کی تو وَأستی قیصرِ ورجَه حاضر و محاکمه بیبی، و خدا همۀ مسافرانِ جانَ ترَه ببخشه دَأره. ²⁵ پس آقایان، دیل و جرأت بدَأرید، چره کی من خدایَ ایمان دَأرم و دَأنم هوطویی بِهه کی مرَه بوگوفته دَأره. ²⁶ ولی ایتَه جی اَ جزایر کنار اَمی کشتی به گیل نیشینه و متلاشی بِهه» ²⁷ شبِ چهاردهم فَأرسِه و هنوز کشتی دریایِ آدریاتیکِ میَأن به اَطرف اوطرف شوئِه، نیصفه شب ملوانان احساس بوکودد کی خوشکی یَ نزدیکَ بوستَأن دریم. ²⁸ پس دریا عُمقَ اندازه بیگیفتد و بیدد حدود سی هشت متره، ایبچه بعد دوباره اندازه گیری بوکودد بیدد کی عُمقِ بیست و هفت متری یَ فَأرسه دَأریم. ²⁹ و بترسد کی کشتی بوخوره صخره یانَ، هَنه وَسی چهار تَه لنگر جی کشتی پوشت تَأوَأدد آبِ دورون و دوعا کودد کی هر چی زودتر هوا روشنَ بِه. ³⁰ ملوانان تصمیم بیگیفتد کی کشتی جَه فرار بوکوند، هَنه وَسی قایقِ نجاتَ آبِ میَأن تَأوَأدد و بهانه بوکودد کی خَأید بوشود و لنگرانَ کشتی جولو جَه تَأوَأدد به آب. ³¹ پولس افسرِ رومی و سربازانَ بوگوفت:«اگر اَشَأن کشتی میَأن نِئسِد همۀ شومَأن جی میَأن شید» ³² پس سربازانم قایقِ نجاتِ لافندانَ وَأوِد و وَأهَأشتد کی قایق بیشه دریا میَأن. ³³ کمی پیشتر جی اَنکی روزَ به، پولس همه تَه یَ اصرار بوکود کی ایتَه چی بوخورد و بوگوفت:«ایمروز چهاردَه روزه کی بلاتکلیفید و لب به غذا نزَه دَأرید، ³⁴ شیمی جَه خواهش کونم خودتَأنِ سلامتی و زنده ماندنِ وَسی ایتَه چی بوخورید، شیمی هیچکودامِ سرِ جَه ایتَه مو هم کمَه نیبه» ³⁵ وختی اَ حرفانَ بزَه، نانَ اوسَأد و همگی ورجَه خدایَ شکر بوکود و نانَ پارَه کود و شروع بوکود به خوردَن. ³⁶ پس همه تَه احساس بوکودد اَشَأنِ حال بهترَه بوسته و شروع بوکودد به خوردَأن. ³⁷ کلاً دویست و هفتاد و شیش نفر کشتی دورون نیشته بیم. ³⁸ وختی سِئرَ بوستد باقیه گندمَ دوکودد دریا میَأن و اَطو کشتی یَ سبکَ کودد. ³⁹ وختی روزَ بوست خوشکی یَ کی بیدد نشناختد و نِتَأنستد بفهمد کی کَ یَ ایسَأد، ولی ایتَه خلیج بیدد کی فورشی ساحل دَأشته. پس تصمیم بیگیفتد کی اگر بیبه کشتی یَ اویَ به گیل بینیشَأند. ⁴⁰ لنگرانِ لافندانَ وَأوِد و اوشَأنَ دریا میَأن ولَ کودد، و لافندی کی سکانَ اونِ اَمرَه دوَسته بؤدم بازَ کودد و کشتی جولو بادبانانَ بادِ مسیرِ جَه بوجُر فَأکشد، و یکراست کشتی یَ هدایت بوکودد ساحلِ طرف. ⁴¹ ولی کشتی ایتَه جی آبِ جیرِ تپه یانَ بر بوخورد و به گیل بینیشت. کشتی دماغه ثابت و بی حرکت بمَأنست، ولی کشتی عقبَ پیلدانه موج بزَه بیشکینه و داغانَ کود. ⁴² سربازان تصمیم بیگیفتد زندانیانَ بوکوشد نوکونه کسی شنا کونان فَأرسه ساحلَ و فرار بوکونه. ⁴³ ولی افسرِ رومی کی خَأسته پولسِ جانَ نجات بده، وَأنَأشت اوشَأن اَ کارَ بوکوند و دستور بدَه اول کسانی کی شنا دَأند دکفد آبِ دورون و خوشَأنَ فَأرسَأند ساحلَ. ⁴⁴ باقی نفراتم سعی بوکوند خوشَأنَ تَأوَأدد تخته پاره یان و کشتی قطعاتِ رو و اوشَأنِ دونبال بوشود. و اَطو همۀ اَمَأن صحیح و سالم فَأرسِه ایم ساحلَ.