¹ آگریپاسِ پادشاه پولسَ بوگوفت:«ایجازه دَأری خودتِ جَه دفاع بوکونی» پس پولس خو دسَ بازَ کود و خودشِ جَه اَطو دفاع بوکود. ² «ای آگریپاسِ پادشاه، مره باعثِ افتخاره کی شیمی حضورِ جَه دربارۀ اتهاماتی کی مرَه بزَه دَأرد خودمِ جَه دفاع بوکونم. ³ و ویشتر اَنِ جَه خوشحالم کی شومَأن همۀ یهودیانِ رسم و رسوم و اوشَأنِ اختلافاتِ مرَه آشنایی دَأرید. هَسَه تمنا دَأرم کی لُطف بوکونید و می عَرایضَ توجه بفرمائید. ⁴ یهودیان همه تَه خُب دَأند کی می جوانی چوطو بوگوذشته دَأره و دَأند کی جی هو اول چوطو خودمِ ملتِ میَأن و اورشلیمِ دورون زندگی بوکوده دَأرم. ⁵ اوشَأن مرَه شنَأسد و اگر بخَأید تَأند شهادت بدد کی من همیشه ایتَه فریسی خیلی جِدی بؤم، یعنی جی سختترین و دقیقترین فرقۀ خودمِ دین اطاعت کودم. ⁶ و ایمروزم اَنِ وَسی محاکمه بوستَأن درم کی اون وعده ای کی خدا اَمی اَجدادَ بدَه دَأره یَ اُمید دَأرم. ⁷ اَن هون وعده ای ایسه کی اَمی دوازده قبیله، شب و روز جی تَه دیل عبادت کوند تا اونِ انجام بوستَأنَ بیدیند، بله پادشاه، هَ اُمیدِ وَسیه کی یهودیان مرَه مُتهم کوند. ⁸ چره وَأستی شمره عجیب و باورنوکودنی بیبه کی خدا مُرده یانَ مردن پسِ رِه زندَه کونه؟ ⁹ خودِ منم ایتَه موقعی خودمِ وظیفه دَأنستم کی هر جور بوبُسته وَأستی عیسای ناصری مرَه مخالفت بوکونم. ¹⁰ و اَن دقیقاً هون کاری بو کی اورشلیمِ دورون کودم. و کاهنانِ سرانِ جَه مجوز فَأگیفتم و خیلی جی مُقدسینَ تَأوَأدمه زندان، و وختی مرگَ محکوم بوستد منم بر ضدِ اوشَأن رأی موافق دَمه. ¹¹ کنیسه یانِ دورون بارها مسیحیانَ اَذیت و آزار بوکودم و اوشَأنَ مجبور بوکودم بر ضدِ مسیح کُفر بوگوید. جوری بر ضدِ اوشَأن بؤم کی تا شهرایِ دور اوشَأنَ تعقیب کودم و آزار رسَأن دمه. ¹² در ایتَه جی اَ سفران کی شوئون دوبوم دمشقِ طرف و سرانِ کاهنانِ طرفِ جَم اختیار دَأشتم و اوشَأنِ حُکم می دس دوبو، ¹³ ظُهرِ موقع راه میَأن، ای پادشاه جی آسمانِ طرف ایتَه نور خورشیدِ نورِ جَه روشنتر، می دؤر و می رِفقانِ دؤر بتاوَست. ¹⁴ همه تَه بکفتیم زمینِ رو، و من صدایی بیشتَأوستم کی زبانِ عبرانی اَمرَه مرَه بوگوفت؛ ای شائول، شائول، چره مرَه آزار دهی؟ میخَأنِ رو لقد زَئَن راحتِ کار نییه. ¹⁵ وَأورسم؛ خداوندا تو کیسی؟ خداوند بوگوفت؛ من هون عیسایم کی تو اونَ آزار رسَأنی. ¹⁶ ویریز و تی پا رو بِئس، من ترَه ظاهرَ بوستم تا ترَه می شاهد و می خادم قرار بدم. تو وَأستی اونچی یَ کی ایمروز بیده ای و اونچی یَ کی آینده رِه تره نیشان دهم همه یَ مردمِ رِه اعلام بوکونی و شهادت بدی. ¹⁷ من ترَه اَ قؤم و ملتهایِ غیرِ یهودی ایی کی ترَه اوشَأنِ ورجَه اوسه کونمِ دسِ جَه نجات دهم تا ¹⁸ اوشَأنِ چومَأنَ وَأ کونی، و اوشَأنَ جی تاریکی به روشنایی، و جی شیطانِ قدرت، به خدا طرف وَأگردَأنی، تا مره ایمان اَوردَأنِ اَمرَه، اوشَأنِ گوناهان آمرزیده بیبه و خدا مُقدسین میَأن سهمی بدَأرد. ¹⁹ پس ای آگریپاسِ پادشاه، منم نسبتِ به اون رؤیایِ آسمانی کی بیدم نافرمانی نوکودم. ²⁰ بلکی اول دمشقیانِ میَأن و اورشلیم و همۀ یهودیه سرزمین، و بازن غیرِ یهودیانِ میَأن اعلام بوکودم کی همه وَأستی توبه بوکوند و خدا طرف وَأگردد و خوشَأنِ اَعمالِ مرَه نیشان بدد کی واقعاً توبه بوکوده دَأرد. ²¹ هَنه وَسی بو کی یهودیان مرَه معبدِ دورون بیگیفتد و خَأستد مرَه بوکوشد. ³⁰ در اَنموقع پادشاه ویریشت و اونِ پوشتِ سر اونِ زن برنیکی و فرماندار و باقی کسانی کی مجلسِ دورون نیشته بود ویرشتد و تالارِ جَه بیرون بوشود. ³¹ و هَطو کی بیرون شوئون دوبود همدیگرَ گوفتد:«اَ شخص کاری کی اونِ حُکم اعدام و یا زندان بیبه نوکوده دَأره» ³² آگریپاسِ پادشاه فرماندار فِستوسَ بوگوفت:«اگر اَ مرد قیصرِ جَه دادخواهی نوکوده بو، شَأسته هَسه اونَ آزادَ کودَأن»