¹ سه روز بعدِ اینکی فِستوس بأمو قیصریه و خو پُستَ تحویل بیگیفت، جی قیصریه بوشو اورشلیم. ² در اویَ کاهنانِ اعظم و یهودِ شیخَأن بوشود اونِ ورجَه و خوشَأنِ اتهاماتَ بر علیه پولس اونَ بوگوفتد، و اونِ جَه خواهش بوکودد و بخَأستد کی اوشَأنَ لطفی بوکونه ³ و پولسَ اوسه کونه اورشلیم. اوشَأنِ نقشه اَن بو کی پولسَ راه میَأن بکوشد. ⁴ ولی فِستوس جواب بدَه:«پولس قیصریه دورون بازداشته، و من خودمم قصد دَأرم به زودی وَأگردم اویَ، ⁵ پس هر کودام جی شیمی رهبران کی تَأند می مرَه بأید تا اگر اَ شخص خطایی بوکوده اونِ جَه شکایت بوکوند» ⁶ فِستوس ایتَه هشت ده روزی اورشلیمِ میَأن بِئسَه و بازن وَأگردست قیصریه. فردایی رِه دادگاه تشکیل بدَه و اَمر بوکود پولسَ حاضرَ کوند. ⁷ وختی پولس بأمو بودورون، یهودیانی کی اورشلیمِ جَه بأمو بود، اونَ دؤرَ کودد و تُهمتای زیادی اونَ بزد، ولی نتَأنستد هیچکودامَ ثابت وکوند. ⁸ پولس خو جَه دفاع بوکود و بوگوفت:«من نه یهودِ شریعتِ مرَه مخالفم، نه خدا معبدَ بی احترامی بوکودم و نه بر علیه قیصر حرکتی بوکوده دَأرم» ⁹ فِستوس کی خَأسته یهودیانِ سر مِنّت بنه، پولسَ بوگوفت:«آیا خَأیی بیشی اورشلیم و اویَ می حضورِ جَه محاکمه بیبی؟» ¹⁰ پولس جواب بدَه:«هَسَه قیصرِ دادگاه میَأن ایسَم یعنی جایی کی وَأستی محاکمه بوبوم. خودتَأن خُب دَأنید کی من بی تقصیرم و بر علیه یهودیان هیچ جُرمی نوکوده دَأرم. ¹¹ ولی اگر مُجرمم و کاری بوکوده دَأرم کی وَأستی اعدام بوبوم، مرگِ جَه ترسی نَئرم و حاضرم بیمیرم. ولی اگر هیچکودام جی اَ کارایی کی اَشَأن مرَه تُهمت زندَه نوکوده دَأرم، هیچکس نِتَأنه مرَه اَشَأنِ دس بیسپاره، من تقاضا دَأرم کی خودِ قیصر می دادخواستَ بررسی بوکونه» ¹² فِستوس خو شورا اَعضاء مرَه مشورتی بوکود و بازن پولسَ بوگوفت:«قیصرِ جَه دادخواهی کونی؟ پس شی قیصرِ حضور» ¹³ چن روزی بوگوذشت، و «آگریپاس» پادشاه و اونِ زن «برنیکی» بأمود قیصریه تا فِستوسَ خوش آمد بوگوید. ¹⁴ و اوشَأن چن روزی اویَ بِئسَأد و فِستوس پولسِ قضیه یَ پادشاه رِه تعریف بوکود و بوگوفت: «ایتَه زندانی اَیَ ایسَه کی فِلیکس اونَ زندانی بوکوده بو. ¹⁵ وختی بوشوبوم اورشلیم، کاهنانِ سران و یهودیانِ شیخَأن اونِ جَه رسماً شکایت بوکودد و بخَأستد کی اون محکوم بیبه. ¹⁶ اوشَأنَ بوگوفتم کی رومِ قانون وَأنَأله کسیَه بدونِ محاکمه محکوم بوکونیم، اول وَأستی اون خو شاکیانِ مرَه روبرو بیبه و بتَأنه خو جَه دفاع بوکونه. ¹⁷ پس اوشَأنم بأمود اَیَ و منم معطلَ نوکودم و فردایی دادگاه تشکیل بدَم و دستور بدَم اونَ بأورد. ¹⁸ و اوشَأن ویریشتد و بر علیه اون گب بزد، ولی به هیچکودام جی اتهاماتی کی من انتظار دَأشتم اونَ مُتهم نوکودد، ¹⁹ بلکی خوشَأنِ دینِ سر جرّ و بحث دَأشتد و ایتَه عیسی نامی سر کی یهودیان گوفتد بمرده دَأره ولی پولس اِدعا کوده زنده یه. ²⁰ و چون اَجور مسائلِ میَأن وارد نوبوم و شک دَأشتم، اونِ جَه وَأورسم؛ آیا خَأیی بیشی اورشلیم و اویَ محاکمه بیبی؟ ²¹ ولی پولس تقاضا بوکود تا امپراطور اونِ کارَ بررسی نوکوده، زندانِ میَأن بِئسِه، منم دستور بدم اونَ زندانِ دورون بدَأرد تا روزی کی اونَ اوسه کونم قیصرِ ورجَه» ²² آگریپاس، فِستوسَ بوگوفت:«دوس دَأرم خودم اَ شخصِ گبانَ بیشتَأوم» فِستوس بوگوفت:«فردا اونَ به شیمی حضور اَورم تا اونِ گبانَ گوش بوکونید» ²³ فردایی آگریپاس و اونِ زن بِرنیکی تشریفاتِ تمامِ اَمرَه بأمود تالارِ عمومی میَأن، و فرمانده یان و پیله کسانِ اَمرَه اویَ بینیشتد. فِستوس دستور بدَه پولسَ بأورد. ²⁴ بازن فِستوس بوگوفت:«ای پادشاه آگریپاس، و ای حاضران، شومَأن مردی یَ خودتَأن پِشِ جَه دِئِن درید کی همۀ یهودیان چی هَ یَ و چی اورشلیمِ میَأن، جی اَن مرد می ورجَه شکایت بوکوده دَأرد و فریادِ اَمرَه بخَأسته دَأرد کی اون نوَأستی زنده بمَأنه. ²⁵ ولی می نظر اَنِ کی اون کاری نوکوده کی اونِ سزا مرگ بیبه. ولی چون قیصرِ جَه دادخواهی بوکود تصمیم بیگیفتم اونَ اوسه کونم روم. ²⁶ ولی چون نَأنم دربارۀ اون قیصرِ رِه چی بینیویسم، هَنه وَسی اونَ شیمی ورجَه و مخصوصاً پادشاه آگریپاسِ ورجَه بأوردم تا بعدِ بازخواست شاید نوشتنِ رِه مطلبی پیدا کونم. ²⁷ چون عاقلانه نییه کی ایتَه زندانی یَ بدونِ مدارک و دلیل اوسه کونم قیصرِ ورجَه.»