¹ وختی صحیح و سالم فَأرسِه ایم ساحلَ، بفهمستیم کی اون جزیره «مالت» نام دَأره. ² جزیره مردم اَمره خیلی لُطف بوکودد و اَمی وَسی آتش روشنَ کودد تا اَمی جَه پذیرایی بوکوند، چونکی هوا خیلی سرد بو و بارانم وَأرسته. ³ پولس هم ایبچه هیزم جمعَ کود، و وختی هیزمانَ آتشِ رو نَئَن دوبو آتشِ گرما وَسی ایتَه سمی لانتی اون چوبانِ جَه بیرون بأمو و محکم پولسِ دسَ دوچوکست. ⁴ هَطو کی جزیره مردمان لانتی یَ پولسِ دسِ رو آویزان بیدد، همدیگرَ بوگوفتد:«حتماً اَ مرد قاتله، با اَنکی دریا طوفانِ جَه نجات پیدا کوده، عدالت وَأنَأله کی زنده بمَأنه» ⁵ پولس لانتی یَ تَأوَأدَه آتشِ دورون و اونَ هیچی نوبوست. ⁶ مردم منتظر بود اونِ بدن باد بوکونه یا ایمرتبه بکفه بیمیره. ولی هر چی بِئسَإد بیدد کی اونَ هیچی نوبوست، بازن اوشَأنِ نظر عوضَ بوست و بوگوفتد:«اون ایتَه جی خدایانه» ⁷ هو نزدیکی یان زمینانی نَهه بو کی جزیره رئیسِ شین بو. جزیره رئیس «پوبلیوس» نام دَأشته. اون اَمرَه خو خانه دعوت بوکود و سه روز مهربانی اَمرَه اَمی جَه پذیرایی بوکود. ⁸ از قضا پوبلیوسِ پئر مریض بو و تب و اسهال دَأشته. پولس بوشو اونِ ورجَه و دوعا بوکود و اونَ شفا بدَه. ⁹ بعدِ اَ ماجرا همۀ مریضانی کی جزیره میَأن ایسَه بود آموئد و شفا گیفتد. ¹⁰ مردم اَمرِه خیلی احترام کودد و وختی خَأستیم جی اویَ بیشیم هر چی کی احتیاج دَأشتیم اَمرِه آمادَه کودد. ¹¹ بعدِ سه ماه، ایتَه کشتی مرَه کی زمستانَ جزیره میَأن بوگذرأنه بو دوباره حرکت بوکودیم. اَ کشتی جی اسکندریه بأمو بو و جوزا و یا دوقلو برَأرَأنِ علامتَ دَأشته. ¹² اَمی راه سر فَأرسه ایم بندرِ سراکیوس، و سه روز اویَ لنگر تَأوَأدَه ایم. ¹³ بازن دوباره راه دکفتیم و فَأرسِه ایم بندرِ ریگیونَ. فردایی بادِ جنوبی بدمست و دومین روزِ رِه فَأرسِه ایم شهرِ پوتیولی. ¹⁴ در اویَ چن تَه مسیحی مرَه آشنا بوبُستیم کی اَمی جَه خواهش بوکودد بیشیم اوشَأنِ ورجَه، یک هفته اوشَأنِ مهمان بوئیم، آخر سر فَأرسِه ایم رومَ. ¹⁵ رومِ مسیحیان کی بیشتَأوسته بود اَمَأن راه میَأن ایسَأئیم و اَمون دریم، تا آپیوسِ بازار و ایتَه روستا کی اونِ نام سه دکان بو بأمود اَمی پیشواز. وختی پولس اوشَأنَ بیده خدایَ شُکر بوکود و قوّتِ قلب بیگیفت. ¹⁶ وختی فَأرسِه ایم رومَ، فرماندۀ رومی زندانیانَ تحویل بدَه. فقط پولسَ وَأهَأشت کی ایتَه سربازِ محافظ اَمرَه خو خانه دورون بِئسِه. ¹⁷ سه روز بعد، پولس یهودِ رهبرانَ دعوت بوکود، وختی همه جمعَ بوستد اوشَأنَ بوگوفت:«ای برَأرأن، با اَنکی من هیچ موقع کاری بر ضدِ خودمِه قؤم و یا بر ضدِ اَمی اَجدادِ رسم و رسوم نوکوده بؤم، مرَه اورشلیمِ میَأن دستگیر بوکودد و رومیأنَ تحویل بدَأد. ¹⁸ رومیأن می جَه بازخواست بوکودد و خَأستد کی مرَه آزادَ کوند، چون بفهمستد کی هیچ کاری نوکوده دَأرم کی می حق مرگ بیبه. ¹⁹ ولی چون یهودیان مخالفت بوکودد، من دِ هیچ راهی نَأشتم و مجبور بوبُستم کی قیصرِ جَه دادخواهی بوکونم، ولی نه اینکی می قؤمِ جَه شکایت بوکوده بِم. ²⁰ هَ موضوع وَسی خَأستم شمرَه بیدینم و شیمی اَمرَه گب بزنم، اَ زنجیرانَ کی دینید می دسَ دوَسته دَأرد اَنِ وَسیه کی ایمان دَأرم کی اسرائیلِ اُمید، یعنی مسیحِ موعود ظهور بوکوده» ²¹ اوشَأن جواب بدَأد:«جی یهودیه هیچ نامه ای دربارۀ تو به اَمی دس فَأنرسِه دَأره، و هیچکودام جی برَأرَأنی کی جی اویَ بأمو دَأرد، دربارۀ تو گزارشِ بدی نَأوردد و حرفِ بدی نزَد. ²² ولی میل دَأریم تی عقاید و نظراتَ بیشتَأویم، چون همه جا همۀ مردم دربارۀ اَ فرقه بد گوفتَأن درد» ²³ پس ایتَه روزَ تعیین بوکودد و او روزِ رِه خیلیَأن بأمود به او خانه ای کی پولس ایسَه بو تا اونَ بیدیند. اون جی صبح تا شب، مُفصل دربارۀ خدا پادشاهی اوشَأنِ اَمرَه گب بزَه و تلاش بوکود موسی تورات و پیغمبرَأنِ کیتابانِ جَه سند بأوره و اوشَأنَ نسبتِ به عیسی قانع بوکونه. ²⁴ بعضیَأن اونِ گبانَ قبول بوکودد و ایمان بأوردد و بعضی دیگرم ایمان نَأوردد. ²⁵ و هَطو کی همدیگرِ اَمرَه جرّ و بحث کودد ویریشتد کی جی پولسِ ورجَه بوشود، ولی قبلِ اینکی بیرون بوشود پولس خو آخرین حرفَ اوشَأنَ بزَه و بوگوفت:«روح القدس چی خُب شیمی پئرَأنِ مرَه گب بزَه، اون موقعی کی بواسطۀ اِشعیای نبی بوگوفت؛ ²⁶ بوشو اَ قؤمِ ورجَه و بوگو، شیمی گوشِ اَمرَه ایشتَأوید، ولی هیچ موقع درک نوکونید، خودتَأنِ چومِ اَمرَه فَأندرید، ولی نیدینید، ²⁷ چره کی اَ قؤمِ دیل سختَ بوسته، و اوشَأنِ گوشَأن سنگینَ بوسته، و خوشَأنِ چومَأن دوَسته دَأرد، نوکونه کی خوشَأنِ چومَأنِ اَمرَه بیدیند، و خوشَأنِ گوشَأنِ اَمرَه بیشتَأود، و خوشَأنِ دیلِ اَمرَه بفهمد، و وَأگردد و من اوشَأنَ شفا ببخشم. ²⁸ پس بدَأنید کی خدا نجات غیرِ یهودیانِ رِه اوسه بوبُسته و اوشَأن گوش دهد» ²⁹ پولس اَ حرفَأنَ کی بزَه یهودیان بوشود و همدیگرِ اَمرَه جرّ و بحث کودد. ³⁰ و پولس دو سالِ تمام خو ایجاره ای خانه میَأن زندگی کوده و هر کسی کی اَمویه اونِ دِئِن رِه رویِ خوشِ اَمرَه اونِ جَه پذیرایی کوده. ³¹ اون خدا پادشاهی یَ اعلام کوده و بدونِ ترس و خیلی آشکارا بی اَنکی کسی اونِ مانع بیبه، دربارۀ خداوند عیسی مسیح تعلیم دَأئه. آمین