¹ وختی آشوب تومامَ بوست، پولس شاگردانَ دخَأد و بعدِ اینکی اوشَأنَ تشویق بوکود، اوشَأنِ جَه خداحافظی بوکود راه دکفت بیشه مقدونیه. ² اون خو راه سر هر شهریَ فَأرسه یه، مسیحیانِ رِه موعظه کوده، و اَطو اون فَأرسه یونانَ. ³ اون سه ماه در اویَ بِئسَه، و وختی خَأسته کشتی اَمرَه بیشه سوریه، یهودیان بر علیه اون توطئه بوکودد، پس اونم تصمیم بیگیفت جی راهِ مقدونیه وَأگرده. ⁴ اونِ همراهان اَشَأن بود؛ سوپاتِروس کی بیریه شین بو، و آریستارخوس و سِکوندوس کی تسالونیکی شین بود، و غایوس کی دِربه شین بو، و تیخیکوس و تروفیموس کی ایالتِ آسیا شین بود، و تیموتائوس. ⁵ اوشَأن پِشتر جی اَمَأن بوشود و تروآسِ میَأن اَمی رَأفا بِئسَأد. ⁶ ولی اَمَأن بعدِ عیدِ فطیر کشتی اَمرَه جی فیلیپی راه دکفتیم و پنج روز بعد، تروآسِ میَأن اوشَأنَ فَأرسِه ایم. همگی ایتَه هفته اویَ بِئسَأئیم. ⁷ یکشنبه شبِ رِه، همه تَه جمع بوستیم تا مراسمِ شامِ مقدسَ بجا بأوریم، و چون پولس خَأسته فردایی رِه بیشه سفر، اَمرِه موعظه بوکود و اونِ موعظه تا نیصفه شب طول بکشه. ⁸ جایی کی اَمَأن جمعَ بوسته بیم اونِ طبقۀ بوجُرِ جَه، چراغهای زیادی روشن بو. ⁹ هوطو کی پولس گب زَئَن دوبو، ایتَه جوان کی «اِفتیخوس» نام دَأشته و پنجره کنار نیشته بو، اونَ خواب بوبورد و جی طبقۀ سوم بکفت بیجیر، وختی اونَ اوسَأدد بیدد بمرده دَأره. ¹⁰ پولس بوشو بیجیر و خورَه تَأوَأدَه اونِ رو و اونَ کشا گیفت و بوگوفت: «نترسید اون هنوز زنده یه» ¹¹ بازن بوشو بوجُر و نانَ بیگیفت و پارَه کود و بوخورد. اون تا خودِ سحر شاگردانِ رِه موعظه بوکود و بازن راه دکفت و شهرِ جَه بوشو. ¹² مردم او جوانَ زنده بوبوردد اونِ خانه و اوشَأنِ خیال جی اَ بابت راحتَ بوست. ¹³ و اَمَأن کشتی سوارَ بوستیم و بوشوئیم آسوس تا طبقِ برنامه ای کی قبلاً دیچه بیم در اویَ پولسَ کشتی یَ سوار کونیم، چون خودش بخَأسته بو کی تا اویَ جی راه خوشکی بیشه. ¹⁴ وختی پولسَ آسوسِ میَأن بیده ایم، اونَ کشتی یَ سوارَ کودیم و بوشوئیم میتیلینی. ¹⁵ و روزِ بعد کشتی اَمرَه بوشوئیم جزیرۀ خیوسِ روبرو، و روزِ دوم جی اویَ بوشوئیم جزیرۀ ساموس، و فردایی رِه فَأرِسِه ایم بندر میلیتُس. ¹⁶ پولس تصمیم دَأشته جی راهِ دریا اَفِسُسِ کنارِ جَه دوَأره تا ایالتِ آسیا میَأن معطلِ نیبیم. چون عجله دَأشته کی اگر بیبِه قبلِ عیدِ پنطیکاست فَأرسه اورشلیم. ¹⁷ پس جی بندر میلیتُس اَفِسُسِ کلیسا کشیشانِ رِه پیغامی اوسه کود و اوشَأنَ خو ورجَه دخَأد. ¹⁸ وختی اوشَأن بأمود اوشَأنَ بوگوفت:«خودتَأن دَأنید کی جی وختی بأمو دَأرم ایالتِ آسیا همه وخت شیمی اَمرَه بؤم و چوطو رفتار بوکودم، ¹⁹ و چوطو فروتنی و اَشک و زحمتِ زیادِ اَمرَه، خداوندَ خدمت بوکودم، چون همیشه یهودیان توطئه کودد کی مرَه بوکوشد. ²⁰ شومَأن دَأنید کی من شیمی خیر و صلاح وَسی چیزیَه دریغ نوکودم، من پیامَ شمرَه بِرسَأنم و مردمِ ورجَه و شیمی خانه یَأنِ میَأن شمرَه تعلیم بدَم. ²¹ من یهودیان و غیرِ یهودیانم اخطار بوکوده دَأرم کی وَأستی خوشَأنِ گوناهانِ جَه توبه بوکوند و خدا طرف وَأگردد و اَمی خداوند عیسی مسیحَ ایمان بأورد. ²² و هَسَه روح القدسِ دستور اَمرَه خَأیم راهی بوبوم اورشلیم، و نَأنم کی مرِه چی پیش اَیِه. ²³ فقط هَنَه دَأنم کی هر شهرِ دورون روح القدس مرَه هشدار دهه کی زندان و سختی می رَأفا ایسَه. ²⁴ ولی زندگی مرِه ارزشی نَئرِه و می جانِ رِه نگران نییِم. می هدف و آرزو اَنِ کی می مأموریتَ تا آخر انجام بدم و خدمتی کی عیسی مرَه بیسپُرده دَأره، یعنی انجیلِ پیغامِ اعلام کودَأنَ به آخر برسَأنم. ²⁵ هَسَه دَأنم کی دِ هیچکودام جی شومَأن کی خدا ملکوتِ موعظه کودَأنِ رِه شیمی میَأن آمد و شُد کودم، دِ هیچموقع می رویَ نیدینید. ²⁶ پس ایمروز شیمی اَمرَه اتمامِ حُجت کونم کی شیمی خون می گردن نییِه، و هر کودام جی شومَأن اگر خدا فیضِ جَه محروم بیبِه من مُقصر نییِم. ²⁷ چره کی در حقِ کسی کوتاهی نوکودم و همۀ خدا اراده یَ شمرَه فَأرسَأنیم.