³ پولس اوشَأنَ بوگوفت:«پس تعمید گیفتَأنِ موقع چیَه اعتراف بوکودید؟» جواب بدَأد:«اَمَأن یحیی تعلیم مرَه تعمید بیگیفته دَأریم» ⁴ پولس بوگوفت:«یحیی تعمید، تعمیدِ توبه بو. اون مردمَ گوفته کسیَه ایمان بأورید کی بعدِ من اَیِه، یعنی عیسی مسیحَه» ⁵ وختی اَنَ بیشتَأوستد به نام خداوند عیسی تعمید بیگیفتد. ⁶ وختی پولس اوشَأنِ رو دس بنَه روح القدس اوشَأنِ رو نازل بوبُست و بتَأنستد به زبانهای مختلف گب بزند و نبوّت بوکوند. ⁷ اوشَأن دوازدَه تَه مردانه بود ⁸ پولس سه ماه او شهرِ دورون بِئسَه و هر شنبه روز شوئِه کنیسه و شجاعتِ اَمرَه دربارۀ خدا ملکوت گب زَنِه، و دلیل محکم اَورده کی عیسی هون مسیحه. ⁹ اما بعضیَأن سر سختی کودد و ایمان نَأوردد و دیگرانِ ورجَه مسیحَ بد گوفتد. پس پولسم مخالفینِ جَه کنار فَأکشه و شاگردانَ بوبورد تیرانوسِ تالار و هر روز در اویَ اوشَأنِ رِه جلسه نَئِه. ¹⁰ دو سال هَطو بوگوذشت و اَ مدتِ دورون همۀ آسیا ایالتِ مردم، چی یهودی و چی یونانی خدا پیامَ بیشتَأوستد. ¹¹ خداوند پولسَ قدرت بدَه تا پیله مُعجزه یانی آشکارَ کونه. ¹² جوری کی مردم دستمال و یا پارچه ای کی اونِ بدنَ بوخورده بویَ بوردد مریضانِ رِه و مریضان شفا پیدا کودد و ارواحِ پلید اوشَأنِ جَه دورَ بوستد. ¹³ پس چن نفر جی یهودیانِ دوره گرد کی جن گیری کودد تصمیم بیگیفتد کی عیسی نامِ اَمرَه ارواحِ ناپاکَ اخراجَ کوند. اوشَأن اَطو گوفتد:«شمرَه قسم دهیم به اون عیسایی کی پولس بشارت دهه» ¹⁴ اوشَأنی کی اَ کارَ کودد هفت تَه جی «اِسکیوا» پسرأن بود، اسکیوا ایتَه جی سرانِ کاهنانِ یهود بو. ¹⁵ اما اون روحِ پلید اوشَأنَ جواب بدَه:«عیسی یَ شناسم، پولسم دَأنم کیسه، ولی شومَأن کیسید؟» ¹⁶ پس اون مردأیی کی تؤرَ بوسته بو اوشَأنَ فوتورکست و چنان قدرتی اَمرَه اوشَأنَ پَأیی بزَه کی همه تَه لخت، و خونین و مالین جی اون خانه فرار بوکودد. ¹⁷ وختی اَ اِتفاق اَفِسُسِ مردمِ گوش فَأرسه، چی یهودی و چی یونانی، همه تَه وحشت بوکودد و جی اون به بعد عیسی نامَ ویشتر احترام نَئِد. ¹⁸ و خیلی جی اوشَأنی کی ایمان بأورده بود بأمود و اعتراف بوکود کی قبلاً چه کارایی کودد. ¹⁹ خیلیَأنم بأمود و بوگوفتد پیشترانِ رِه جادوگری کودد و خوشَأنِ جادوگری کیتابانَ بأوردد و همۀ مردمِ چومِ جولو بوسوزَأنید. وختی کیتابانِ قیمتَ حیساب بوکودد، پنجاه هیزار درهَم بوسته. ²⁰ و اَطو خدا کلام منتشرَ بوسته و قوّتِ ویشتری گیفته. ²¹ بعدِ اَ اتفاقان، پولس بواسطۀ خدا روح تصمیم بیگیفت کی مقدونیه و یونانَ سر بزنه و بازن وَأگرده اورشلیم. اون بوگوفت:«بعداً وَأستی بوشوم تا روم» ²² اون دو تَه جی خو دسیاران، یعنی تیموتائوس و اَرسطوسَ اوسه کود مقدونیه و خودش ایبچه ویشتر ایالتِ آسیا میَأن بِئسَه. ²³ در هَ موقع اَفِسُسِ میَأن بر ضدِ مسیحیان شورش بوبُست. ²⁴ در اویَ شخصی ایسَه بو کی «دیمیتریوس» نام دَأشته و تمثالِ نقره ای بُتکدۀ آرتمیسِ رِه چَأکوده، اون جی اَ راه صنعتگرانِ رِه شغل و درآمدِ خوبی ایجاد بوکوده بو. ²⁵ پس اون خو همکاران و اُستاکارانَ جمعَ کود و اوشَأنَ بوگوفت:«آقایان، شومَأن دَأنید کی اَمی روزی وابسته به اَ شُغله، ²⁶ اما هوطو کی دینید و ایشتَأوید، اَ پولس نه فقط اَفِسُسِ جَه، بلکی تقریباً همۀ ایالتِ آسیا جَه خیلی جی مردمَ خو طرف فَأکشه دَأره و مُنحرفَ کوده، و گویه کی اَ خدایانی کی انسانِ دسِ اَمرَه چَأکوده بِهِه خدا نییِد. ²⁷ پس اَ خطر وجود دَأره کی هم اَمی شغل و کاسبی جی میَأن بیشه، و هم اَمی خدایِ عظیم آرتِمیسِ معبد بی ارزش بیبِه، و حتی ممکنه اَمی خدا آرتمیس کی همۀ آسیا مردم و همۀ دنیا مردمان اونَ پرستش کوند، خو عظمتَ جی دس بده» ²⁸ وختی اوشَأن اَ گبانَ بیشتَأوستد همه تَه عصبانی بوبُستد، و فریاد بوکودد و بوگوفتد:«اَفِسُسیان آرتمیس پیلدانه یه» ²⁹ شهرِ دورون آشوبی بپا بوبُست. مردم همه تَه راه دکفتد شهرِ تماشاخانه طرف، و غایوس و آریستارخوس کی پولسِ همراهانِ جَه و مقدونیه شین بودَ فَأکش فَأکش خوشَأنِ اَمرَه بوردَأن دوبود. ³⁰ پولس بخَأست کی جمعیتِ جولو ظاهرَ بِه، ولی اونِ شاگردان وَأنَأشتد. ³¹ حتی چن تَه جی پولسِ دوستانِ کی ایالتِ آسیا مقاماتِ جَه بود، اونِ رِه پیغام اوسه کودد و خواهش بوکودد کی نیشه تماشاخانه و خو جانَ به خطر تَأنوَأده. ³² جمعیتی کی تماشاخانه میَأن جمعَ بوسته بو آشفته بود و فریاد کودد و هر کسی ایتِه چی گوفته، و خیلیان نَأنِستد اَصلاً چی وَسی اویَ جمعَ بوسته دَأرد. ³³ یهودیان اسکندرَ پیش تَأوَأدد، و بعضیان خیال بوکودد کی اسکندر مردمَ جمعَ کوده دَأره، اون خو دسِ اَمرَه مردمَ ایشاره بوکود کی ساکت بِئسِد و خَأسته کی چیزی بوگویه. ³⁴ ولی وختی مردم بفهمستد کی اون یهودیه، همه تَه یکصدا تا دو ساعت فریاد کودد:«اَفِسُسیان آرتمیس پیلدانه یه» ³⁵ آخرسر شهرِ داروغه مردمَ آرامَ کود و بوگوفت:«ای مردمان، همه دَأند کی اَمی شهر اَفِسُس، آرتمیسِ عظیمِ معبدِ نگهبانه، و حافظ اونِ تمثالی ایسه کی جی آسمان نازل بوبُسته. ³⁶ اَشَأنی کی بوگوفتم حقیقته و نِشَه مُنکر بوستَأن، پس وَأستی آرام بیبید و ندانسته کاری نوکونید. ³⁷ اَ مردانی کی بأورده دَأرید اَیَ، نه اَمی معبدِ جَه دوزدی بوکودد و نه اَمی خدایَ کُفر بوگوفته دَأرد. ³⁸ پس اگر دیمیتریوس و اونِ همکاران کسی جَه شکایت دَأرد، دادگاهانِ در بازه و قاضیانم ایسَد، تَأند بوشود شکایت بوکوند. ³⁹ ولی اگر موضوع چیزِ دیگری ایسه، وَأستی ایتَه جلسۀ رسمی میَأن حل و فصل بیبه. ⁴⁰ هَسَه اَ خطر وجود دَأره کی اَمی جَه دربارۀ ایمروزِ آشوب بازخواست بوکوند، و اگر وَأورسد چون علتی نِتَأنیم بأوریم ممکنه مُتهم بیبیم کی شورش بوکوده دَأریم» ⁴¹ اَنَ بوگوفت و جمعیتَ پراکندَه کود.