¹ اَمَأن اَفِسُسِ کشیشانِ اَمرَه خداحافظی بوکودیم و کشتی اَمرَه مستقیم بوشوئیم جزیرۀ کیوس، و فردایی جی اویَ بوشوئیم بندرِ رودس، و جی اویَ هم بوشوئیم پاترا. ² پاترا جَه ایتَه کشتی پیدا کودیم کی شوئون دوبو فینیقیه، پس هو کشتی یَ سوارَ بوستیم و راه دکفتیم. ³ قبرسَ جی دور اَمی چپِ طرفِ جَه بیده ایم و اونِ جنوبِ جَه بوگوذشتیم و بوشوئیم به سمتِ سوریه. بازن بندرِ صورِ میَأن کشتی پهلو بیگیفت، چون قرار بو کی در اویَ کشتی بارَ خَألی کوند. ⁴ در اویَ ایماندارانَ پیدا کودیم و هفت روز اوشَأنِ ورجَه بِئسَأئیم، اَ ایمانداران روح القدسِ هدایتِ اَمرَه پولسَ اصرار بوکودد کی نیشه اورشلیم. ⁵ چون اَمی وخت تومامَ بوست، راه دکفتیم کی بیشیم سفر، همۀ ایمانداران خوشَأنِ زن و زایِ اَمرَه تا بیرونِ شهر اَمرَه بدرقه بوکودد. اویَ دریا کنارِ جَه زانو بزَئیم و دوعا بوکودیم. ⁶ و بازن همدیگرِ جَه خداحافظی بوکودیم و اَمَأن کشتی یَ سوارَ بوستیم و اوشَأن وَأگردستد خوشَأنِ خانه. ⁷ اَمَأنم اَمی سفرَ ایدامه بدَأئیم و فَأرسِه ایم پتولامیس. در اویَ بوشوئیم مسیحیانِ دِئِنِ رِه و ایتَه روز اوشَأنِ ورجَه بِئسَأئیم. ⁸ و فردایی جی اویَ حرکت بوکودیم و فَأرسِه ایم شهرِ قیصریه و بوشوئیم فیلیپُسِ مبشرِ خانه و اونِ ورجَه بِئسَأئیم. فیلیپُس ایتَه جی اون شیش نفری بو کی اورشلیمِ میَأن انتخاب بوبُسته بو تا بیوه زنَأکانِ میَأن غذا تقسیم بوکونه. ⁹ اون چهار تَه عَزب دختر دَأشته کی نبوّت کودد. ¹⁰ چن روز بوسته کی اویَ ایسَه بیم، ایتَه نبی جی یهودیه بأمو اویَ کی اونِ نام «آغابوس» بو. ¹¹ اون بأمو اَمی ورجَه و پولسِ کمربندَ بیگیفت و خو دس و پایَ اونِ اَمرَه دوَست و بوگوفت:«روح القدس گویه؛ اورشلیمِ یهودیان اَ کمربندِ صاحابَ اَطو دَودد و اونَ ایسپَأرد غیرِ یهودیانِ دس» ¹² وختی اَنَ بیشتَأوستیم هم اَمَأن هم قیصریه ایمانداران پولسَ التماس بوکودیم کی نیشه اورشلیم. ¹³ ولی پولس جواب بدَه:«اَ چی کاری ایسه کی کونید؟ چره شیمی گریه کودَأنِ اَمرَه می دیلَ ایشکینید؟ من نه فقط حاضرم اورشلیمِ میَأن زندانی بوبوم، بلکی حاضرم خداوند عیسی نامِ وَسی می جانم فدا بوکونم» ¹⁴ امَأن وختی بیده ایم اونِ نظر عوضَ نیبِه، دس بکشه ایم و بوگوفتیم:«هر چی کی خدا بخَأیه هون بیبِه» ¹⁵ بعدِ چن روز اَمی سفرِ بارَ دوستیم و راه دکفتیم به سمتِ اورشلیم. ¹⁶ و چن نفر جی قیصریه ایمانداران اَمی اَمرَه راه دکفتد بأمود، وختی فَأرسِه ایم اورشلیمَ، اوشَأن اَمرَه بوبوردد ایتَه ایماندارِ قدیمی خانه کی قبرسِ شین بو و «مِناسون» نام دَأشته. ¹⁷ وختی فَأرسِه ایم اورشلیم، اویِ مسیحیان اَمرَه خیلی تحویل بیگیفتد و اَمی جَه پذیرایی بوکودد. ¹⁸ فردایی پولسِ اَمرَه بوشوئیم یعقوبِ دِئِنِ رَه. همۀ کلیسا کشیشان اویَ ایسَه بود. ¹⁹ بعدِ سلام و احوالپرسی پولس اوشَأنِ رِه تعریف بوکود کی خدا بواسطۀ اونِ خدمت چی کارایی غیرِ یهودیانِ میَأن انجام بدَه دَأره. ²⁰ وختی بیشتَأوستد خدایَ شکر بوکودد و پولسَ بوگوفتد:«ای برَأر، هوطویی کی دینی هزاران یهودی ایمان بأورده دَأرد و همه تَه نسبتِ به شریعت تعصب دَأرد و اصرار دَأرد کی مسیحیانِ یهودی نژاد وَأستی خوشَأنِ آداب و رسومَ بدَأرد. ²¹ و اوشَأن دربارۀ تو بیشتَأوسته دَأرد کی یهودیانی کی دیگر کشورانِ میَأن زندگی کوندَه گویی کی نخَأیه موسی شریعتِ جَه اطاعت بوکوند، و لازم نییه کی خوشَأنِ پسرانَ ختنه بوکوند و یهودیانِ رسم و رسومَ بدَأرد. ²² هَسَه چی وَأستی کودَأن؟ اوشَأن حتماً خبردارَ بود کی تو بأمو دَأری. ²³ پس اونچی کی ترَه گوفتَأن دریمَ انجام بدن. اَیَ چهار تَه مردای ایسَه کی نذری دَأرد. ²⁴ تو اَشَأنِ مرَه بوشو خدا خانه و طهارتِ مراسمَ بجا بأور، و اوشَأنِ مخارجم فَأدن تا خوشَأنِ سرَ بتراشد، اَطو همه فهمد کی چیزایی کی دربارۀ تو بیشتَأوسته دَأرد راست نییِه و تو خودتم مطابقِ شریعت زندگی کونی. ²⁵ ولی دربارۀ مسیحیانِ غیرِ یهودی اَمَأن اَمی حُکمَ نامه ای دورون اوشَأنِ رِه بینیویشتیم کی گوشتِ حیوانی کی بُتِ رِه قربانی بوبُسته و خفا بوبُسته حیوانِ گوشت و خونَ نوخورد، و زِنا هم نوکوند» ²⁶ پس پولس راضی بوبُست و فردایی اون اشخاصَ خو مرَه بوبورد و اوشَأنِ مرَه رسمِ طهارتَ انجام بدَه و بازن بوشود معبد و اعلام بوکود کی هفت روز بعد هر کودام جی اَن اَشخاصِ رِه قربانی تقدیم بِهِه. ²⁷ چیزی نمَأنسته بو کی هفت روز تومامَ بِه کی چن تَه یهودی کی ایالتِ آسیا شین بود، پولسَ معبدِ دورون بیدد. اوشَأن مردمَ تحریک بوکودد و پولسَ بیگیفتد ²⁸ و فریاد کودد:«ای اسرائیلیَأن کمک بوکونید، اَن هون کسی ایسه کی همه جا بر ضدِ اَمی قؤم و موسی شریعت و اَن معبد تعلیم دهه، اَن یونانیَأنم خو مرَه بأورده معبد و اَیَ نجسَ کوده» ²⁹ اوشَأن پیشتر شهرِ دورون پولسَ «تروفیموسِ اَفِسُسی» مرَه بیده بود، و خیال بوکوده بود کی پولس اونَ بوبورده معبدِ دورون. ³⁰ همۀ شهر آشوب بوبُست و مردم جی هر طرف فووَستد و پولسَ بیگیفتد و معبدِ جَه بیرون فأکشد و سریع معبدِ درَ خوشَأنِ پوشتِ سر دوستد. ³¹ اوشَأن در نظر دَأشتد کی پولسَ بوکوشد، پس فرماندۀ هنگِ رومی یَ خبر برسِه کی اورشلیمِ مردم شورش بوکودد. ³² اونم سریع خو سربازانِ اَمرَه بأمو جمعیتِ طرف. وختی مردم سربازان و فرماندۀ رومی یَ بیدد دِ پولسَ نزَد. ³³ فرمانده پولسَ دستگیر بوکود و دستور بدَه اونَ دو تَه زنجیرِ اَمرَه دوَدد، بازن مردمِ جَه وَأورسی:«اَ شخص کیسه و چی بوکوده دَأره؟» ³⁴ جمعیتِ جَه هر کس خوره فریاد کوده و ایتَه چی گوفته، فرمانده هم کی شلوغی وَسی نِتَأنست بفهمه چی بوبُسته دَأره، دستور بدَه پولسَ بوبورد سربازخانه دورون. ³⁵ وختی سربازخانه پله یانَ فَأرسد، مردم چنان پولسِ سر هجوم بأورده بود کی سربازان مجبور بوبُستد پولسَ بینیشَأند خوشَأنِ شانه یانِ رو و اونَ بوبورد بودورون. ³⁶ مردمی کی اوشَأنِ دونبال سر اَمون دوبود فریاد کودد:«اونَ بوکوشید» ³⁷ هنوز پولسَ سربازخانه بودورون نوبورده بود کی فرماندۀ رومی یَ بوگوفت:«وَألی ایتَه چی شمرَه بوگویم؟» فرمانده اونَ بوگوفت:«تو یونانی دَأنی؟ ³⁸ مگر تو هون مصری نییی کی چن وخت پیش فتنه بپا بوکود و چهار هیزار آدمکشَ خو مرَه اوسَأد و فرار بوکود بیابان؟» ³⁹ پولس جواب بدَه:«من یهودی یم، و طرسوسِ قیلیقیه شینم کی خوره پیلدانه شهری ایسه. خواهش کونم ایجازه بدن مردمِ اَمرَه گب بزنم» ⁴⁰ اونم ایجازه بدَه. پولسم بوشو پله یَأنِ سر بِئسَه و خو دسَ مردمِ طرف درازَ کود کی ساکت بِئسِد، وختی همه تَه ساکتَ بوستد، به زبانِ عِبری مردمَ اَطو بوگوفت.