¹ هو زمان هیرودیسِ پادشاه شروع بوکود کلیسا افرادَ اَذیت و آزار کودَأن. ² اونِ دستورِ اَمرَه یعقوب یوحنا برَأرَ، شمشیرِ اَمرَه بوکوشتد. ³ وختی اون بیدِه اَ کار یهودیانَ خوش بأمو، پطرسم دستگیر بوکود. اَ کار عیدِ فطیرِ اَیامِ موقع اِتفاق دکفت. ⁴ هیرودیس پطرسَ تَأوَأدَه زندان و شونزده نفر سربازَ مأمور بوکود تا اونِ نگهبان بوبود. هیرودیس در نظر دَأشته تا بعدِ عیدِ فصح اونَ یهودیانِ سرانَ تحویل بده. ⁵ و اَطو پطرس زندانِ میَأن ایسَه بو و کلیسا اَعضاء شب و روز اونِ وَسی خدا درگاهَ دوعا کودد. ⁶ شبِ قبلِ اون روزی کی هیرودیس خَأسته پطرسَ اوسه کونه دادگاه، پطرسَ زندانِ دورون زنجیرِ اَمرَه دوَسته بود و اون دو تَه سربازِ میَأن خوفته بو، و نگهبانانم درِ پِشِ جَه نگهبانی دَئِد. ⁷ ایمرتبه خدا فرشته ظاهرَ بوست و نوری زندانِ دورون بِتأوست. فرشته پطرسِ پَألیَه بزَه و اونَ بیدارَ کود و بوگوفت:«زود ویریز» هو لحظه زنجیرَأن اونِ دسَأنِ جَه بازَه بوستد و فووَستد زمینِ رو. ⁸ فرشته اونَ بوگوفت:«تی کمرَ دود و تی کفشَ دوکون» پطرس هَ کارَه بوکود، بازن فرشته اونَ بوگوفت:«تی ردایَ تَأوَأد تی دوشِ رو و می دونبال بیا» ⁹ پطرسم اونِ دونبال راه دکفت و زندانِ جَه بوشو بیرون، ولی باور نوکوده کی اونچی کی فرشته کودَأن دره واقعیه و خیال کوده خواب دِئِن دره. ¹⁰ اوشَأن نگهبانای اول و دومِ جولو جَه ردَ بوستد، و فَأرسد ایتَه آهنی دروازه یَ کی رو به شهر بازَ بوسته. دروازه خوره خوره اَشَأنِ رِه بازَه بوست و اوشَأن بوشود بیرون و ایتَه کوچه یَ تا آخر بوشود کی ایمرتبه فرشته غیبَ بوست. ¹¹ اونموقع پطرس به خودش بأمو و بوگوفت:«هَسَه دِ یقین دَأرم کی خدا خو فرشته یَ اوسه کوده تا مرَه جی هیرودیسِ چنگ و اونچی کی یهودیان اونِ رَأفا ایسَه بود نجات بده» ¹² وختی اَنَ بفهمست بوشو مریم خانه کی یوحنای معروف به مَرقُسِ مار بو. در اویَ خیلیَأن جمعَ بوسته بود و دوعا کودد. ¹³ وختی پطرس اویَ فَأرسه در بزَه، ایتَه خدمتکار کی «رودا» نام دَأشته بأمو کی درَ وَأکونه. ¹⁴ وختی پطرسِ صدایَ بشناخت درَ بازَه نوکود و جی شادمانی بودوَست بودورون و خبر بدَه کی:«پطرس درِ پوشت ایسَه» ¹⁵ اونَ بوگوفتد:«دیوانه بوسته ای مگه؟» ولی وختی بیدد اصرار کونه بوگوفتد:«حتما پطرسِ روح بأموده دَأره» ¹⁶ در اَ موقع پطرس هَطو در زَئِه، وختی درَ وَأکودد همه تَه مات و مبهوت بِئسَأد. ¹⁷ پطرس خو دسِ اَمرَه اوشَأنَ ایشاره بوکود کی ساکت بِئسد و اوشَأنِ رِه توضیح بدَه کی چوطو خداوند اونَ زندانِ جَه نجات بدَه دَأره و آخر سر بوگوفت کی:«اَ اِتفاقَ یعقوب و دیگر ایماندارانَ خبر بدید» بازن بوشو به ایته جایِ دیگر. ¹⁸ فردایی صُبح سربازانِ میَأن غوغایی بپا بوبُست، چره کی نَأنِستد پطرس کَ یَ بوشو دَأره. ¹⁹ هیرودیس دستور بدَه همه جا پطرسِ دونبال بگردد، وختی اونَ پیدا نوکودد نگهبانانَ بخَأست و اوشَأنِ جَه بازجویی بوکود و اوشَأنِ حُکمِ اعدامَ صادر بوکود. بازن خودش جی یهودیه بوشو قیصریه و ایته مدت اویَ بِئسَه. ²⁰ هیرودیس شهرهای صور و صیدونِ مردمِ جَه کینه دَأشته و اوشَأنِ اَمرَه لج دکفته بو. هَنه وَسی اویِ مردم هیرودیسِ وزیرِ دربار، یعنی بلاستوس حمایتَ بدس بأوردد و همگی دستجمعی بوشود اونِ ورجَه و تقاضایِ صُلح و آشتی بوکودد، چره کی اوشَأنِ شهرَأنِ خورد و خوراک و اقتصاد به هیرودیسِ سرزمین وابسته بو. ²¹ روزی کی اوشَأن قرار بوبُست بوشود هیرودیسِ ورجَه، اون رختِ شاهی دوکود و اوشَأنِ رِه سخنرانی بوکود. ²² مردم فریاد بوکودد:«اَ ایتَه جی خدایانِ صدایه، نه آدمی صدا» ²³ هو لحظه خداوندِ فرشته هیرودیسَ بزَه، چره کی جلالی کی خدا شین بویَ خورَه نسبت بدَه بو. بازن کرمَأن اونِ بدنَ بوخوردد و اون بمرد. ²⁴ اما خدا کلام هَطو پخشَ بوسته و ایماندارانِ تعداد هر روز ویشترَ بوسته. ²⁵ و برنابا و شائولم وختی خوشَأنِ مأموریتَ اورشلیمِ میَأن تومامَ کودد دوباره وَأگردستد اَنطاکیه، و شوئونِ موقع یوحنایِ معروف به مَرقُسم خوشَأنِ مرَه بوبوردد.