¹ رسولان و ایماندارانی کی یهودیه میَأن ایسَه بود بیشتَأوستد کی غیرِ یهودیانم ایمان بأوردد. ² وختی پطرس وَأگردست اورشلیم، ایماندارانِ یهودی نژاد اونَ اعتراض بوکودد و بوگوفتد: ³ «چره ختنه نوبوسته یانِ خانه بوشوئی و اوشَأنِ اَمرَه همسفره بوبُستی و غذا بوخوردی؟» ⁴ پطرس همه چیَه جی اول اوشَأنِ رِه تعریف بوکود و بوگفت: ⁵ «من شهرِ یافا میَأن ایسَه بوم و دوعا کودِم کی رؤیا میَأن بیدم ایتِه چی پیلدانه سُفره مَأنستَأن کی چهار گوشِه جَه آویزان بو جی آسمان بیجیر بأمو و فَأرسه می ورجَه. ⁶ وختی خُب فَأندرستم، بیدم اونِ دورون انواع و اَقسامِ چهارپا و حیواناتِ وحشی و پرنده و خزنده نَهه. ⁷ بازن ایتَه ندا به می گوش فَأرسه کی بوگوفت؛ ای پطرس، ویریز سر وَأوین و بوخور. ⁸ جواب بدَم؛ نه ای خداوند، چره کی هیچوخت چیزِ حرام و نجسَ لب نزَه دَأرم. ⁹ دومی بارِ رِه جی آسمان ندا بأمو کی؛ اونچی کی خدا حلال بوکوده یَ، تو نجس نوگو. ¹⁰ و سه بار اَ اِتفاق دکفت، بازن همۀ اون چیزَأن به آسمان بوجُر بوبورده بوبُست. ¹¹ در هَ موقع سه نفر کی جی قیصریه می ورجَه اوسه بوبُسته بود، فَأرسد به هو خانه ای کی من اونِ دورون مهمان بوم. ¹² خدا روح مرَه بوگوفت کی اوشَأنِ اَمرَه بوشوم و شک نوکونم، و اَ شیش تَه برَأرم اَمی اَمرَه بأمود و همه تَه بوشوئیم او مردایَ خانه. ¹³ و اون اَمرِه تعریف بوکود کی چوطو خو خانه دورون ایتَه فرشته یَ بیده دَأره کی اونَ بوگوفته؛ چن نفرَ اوسَه کون شهرِ یافا تا شمعونِ معروف به پطرسَ بأورد به اَیَ، ¹⁴ اون تره پیغامی اَوره کی بواسطۀ اون پیغام، تو و همۀ تی خانواده نجات پیدا کونید. ¹⁵ و من شروع بوکودم اوشَأنِ رِه گب زَئَن کی روح القُدس اوشَأنِ رو نازل بوبُست، دوروست هوطویی کی اول اَمی رو نازل بوبوسته بو. ¹⁶ اونموقع خداوندِ گبَ بخاطر بأوردم کی بوگوفته بو؛ یحیی آبِ اَمرَه تعمید دَئِه، ولی شومَأن روح القُدسِ اَمرَه تعمید گیرید. ¹⁷ پس اگر خدا هو عطایی یَ اوشَأنَ ببخشِه کی وختی اَمَأن عیسی مسیحَ ایمان بأوردیم اَمرَه عطا بوکود، پس من کی بوبوم کی خدا پِشَ بیگیرم؟» ¹⁸ وختی اَ گبانَ بیشتَأوستد ساکت بِئسَد و قانع بوبوستد، و هَطو کی خدایَ ستایش کودد بوگوفتد:«پس راستی کی خدا غیرِ یهودیانم اَ فرصتَ بدَه دَأره تا خوشَأنِ گوناهانِ جَه توبه بوکوند و نجات پیدا کوند» ¹⁹ و اما اوشَأنی کی و اَذیت و آزاری کی اِستیفانِ کوشتَن پسِ رِه شروع بوبُسته بو پراکندَه بوسته بود، تا فینیقیه قبرس و اَنطاکیه سفر بوکودد، اوشَأن انجیلِ پیغامَ فقط یهودیانَ اعلام کودد. ²⁰ ولی اوشَأنِ میَأن چن نفر جی قبرس و قیرَوان ایسَه بود کی وختی اَنطاکیه یَ فَأرسد یونانیانِ مرَه گب بزَد و دربارۀ عیسای خداوند اوشَأنَ بشارت بدَأد. ²¹ و خداوندِ قدرت اوشَأنِ اَمرَه بو و خیلیَأن ایمان بأوردد و وَأگردستد خداوندِ طرف. ²² وختی اَ خبر کلیسایِ اورشلیمَ فأرسه، برنابایَ اوسه کودد اَنطاکیه. ²³ وختی برنابا اویَ فَأرسه و خداوندِ فیضَ بیدِه، خوشحالَ بوست و همه تَه یَ نصیحت بوکود کی تمامِ دیل و جانِ اَمرَه، خداوندَ وفادار بوبود. ²⁴ چره کی خودشم پور جی روح القدس بو و ایمانی قوی دَأشته، هَنه وَسی خیلیَأن خداوندَ ایمان بأوردد. ²⁵ بازن برنابا بوشو طرسوس تا شائولَ پیداکونه، ²⁶ وختی شائولَ پیدا کود اونَ بأورد اَنطاکیه. اوشَأن در اویَ یکسال تمام بِئسَأد و ایماندارانِ اَمرَه کلیسا میَأن جمعَ بوستد و خیلیانَ تعلیم دَأئِد. اَنطاکیه میَأن بو کی اولین بار رِه عیسی شاگردانَ «مسیحی» دخَأدد. ²⁷ هو روزَأن چن تَه نبی جی اورشلیم بأمود اَنطاکیه. ²⁸ ایتَه جی اوشَأن کی «آغابوس» نام دَأشته، ویریشت و روح القدسِ الهامِ اَمرَه پیشگویی بوکود کی ایتَه قحطی سخت اَیِه. اَ قحطی کلودیوسِ قیصرِ اَیام اِتفاق دکفت. ²⁹ پس مسیحیان تصمیم بیگیفتد کی هر کس خو توانِ قدر یهودیه ایماندارانِ رِه کمکی اوسه کونه. ³⁰ و هَ کارَ بوکودد و خوشَأنِ کمکأنَ شائول و برنابا دس بیسپُردد تا اوشَأنَ فأرسَأند اورشلیمِ کشیشانِ دس.