¹ هَسَه دِ دَأنیم هر موقع اَ زمینی خیمه ایی کی اونِ دورون زندگی کونیم فوکورده، آسمانِ میَأن خدا جَه خانه ایی جاودانی دَأریم کی انسانِ دسِ اَمرَه چَأکوده نوبوسته. ² راستی کی اَ بدنِ میَأن زندگی کونیم همیشه آه کشَأن دریم، چره کی مشتاقیم کی اَمی آسمانی خانه یَ ایتَه تازه رختِ مَأنستَأن دوکونیم. ³ چون اونِ دوکودنِ مرَه دِ روحِ بدونِ بدن نیئیم. ⁴ ولی تا موقعی کی اَ بدنِ خاکی میَأن زندگی کونیم تحتِ فشاریم و آه کشیم، ولی اَمَأن نخَأئیم اَ رختَ بکنیم و جی دس بدیم، بلکی خَأئیم رختِ دیگری اونِ رو دوکونیم تا اَ بدنهای فانی زندگی اَبدی میَأن غرقَ بِه. ⁵ اَن اون چیزی ایسه کی خدا اَمرِه آمادَه کوده و روح القدسَ به عنوان نمونه و بیعانه اَمرَه عطا بوکوده. ⁶ پس خاطر جمعیم، ولی اَنم دَأنیم تا زمانی کی اَ بدنِ میَأن زندگی کونیم خداوندِ حضورِ جَه دوریم. ⁷ اَمَأن اَ اُمورَ ایمانِ اَمرَه باور کونیم، نه دِئِنِ اَمرَه. ⁸ هَنه وَسیه کی مرگِ جَه ترسی نَئریم و ترجیح دیهیم اَ بدنَ ترکَ کونیم و خداوندِ ورجَه سامان بیگیریم. ⁹ ولی چی اَ بدنِ میَأن بئسیم و چی آسمان میَأن، ایتَه هدف دَأریم، کی اونِ رضایتَ بدس بأوریم. ¹⁰ چون همۀ اَمَأن ایتَه روزی مسیحِ داوری تختِ پِشِ جَه بپا ایسیم و مطابقِ اونچی کی بوکوده ایم وَأستی جزا بیدینیم، چی خوب چی بد. ¹¹ اَمَأن خداوندِ ترسِ معنیه بفهمسته دَأریم و هَنه وَسیه کی سعی کونیم مردمَه نجاتِ طرف هدایت بوکونیم. خدا اَمی دیلِ جَه خبر دَأره و دَأنه اونچی کی گوئیم حقیقته، اُمیدوارم شیمی وجدانِ ورجَه هم اَ موضوع آشکارَ بوسته بِه. ¹² نَخَأئیم فکر بوکونید کی باز شروع بوکودیم خودمَأنِ جَه تعریف کودَأن، بلکی خَأئیم دلیلی بدَأرید تا بتَأنید اَمرَه افتخار بوکونید و اون دروغه معلمینِ جوابَ بدید کی فقط مقام و ظاهرَ افتخار کوند نه باطن و اونچی کی آدمی دیلِ دورون نَهه یَ. ¹³ اگر اَمی عقلَ جی دس بدَه دَأریم، خدا وَسیه، و اگر عاقلیم، شیمی وَسیه. ¹⁴ چره کی مسیح مُحبته کی همۀ اَمی افکار و اعمالِ رو حاکمه، چون یقین دَأریم کی اینفر همۀ انسانانِ وَسی بمرد، پس همه اونِ مرگِ دورون شریک بوبُستد. ¹⁵ و همه تَأنِ رِه بمرد تا اوشَأنی کی زنده ید جی اَن پس خوشَأنِ رِه زندگی نوکوند، بلکی اون کسی وَسی زندگی بوکوند کی اوشَأنِ رِه بمرد و دوباره زندَه بوست. ¹⁶ پس جی اَن پس هیچکسَ معیارایِ انسانی مرَه قضاوت نوکونیم، هر چند پیشترانِ رِه دربارۀ مسیح هم هَطو قضاوت کودیم، ولی هَسَه دِ اَطو نییه. ¹⁷ پس کسی کی مسیح مرَه مُتحد بِه، ایتَه تازه زندگانی دَأره، همۀ اونچی کی کهنه بو بوگوذشته دَأره و هَسَه دِ همه چی تازَه بوسته. ¹⁸ همۀ اَ چیان خدایی طرفه جَه یه کی بواسطۀ عیسایِ مسیحِ فداکاری، اَمَرَه خودشِه اَمْرَه آشتی بدَه، و اَ آشتی پیغامَ اَمَرَه بیسپُرده دَأره تا اونَ دیگرانَ فَأرسَأنیم. ¹⁹ اون آشتی پیغام اَنه کی خدا مسیحِ میَأن جهانَ خودشِ اَمرَه آشتی دَأئه و مردمِ گوناهانَ به اوشَأنِ حیساب نِنَأئِه. ²⁰ پس اَمَأن مسیح سفیرانیم، جوری کی خدا به اَمی زبان شُمرَه دخَأنه کی بأئید آشتی بوکونید. اَمَأن مسیح طرفِ جَه شیمی جَه خواهش کونیم کی خدا اَمرَه آشتی بوکونید. ²¹ خدا کسی کی گوناهَه نشناختَه، اَمی وَسی گوناهکار به حیساب بأورد تا اَمَأن بواسطۀ اتحاد اونِ اَمرَه، خودِ خدا مَأنستَأن عادل به حیساب بَأئیم.