¹ پس چون خدا جی روی خو لطف اَمرَه مأمور اَ خدمت بوکوده دَأره، هیچموقع خستَه نیبیم. ² اَمَأن سعی نوکونیم حُقه بازی و رَوشایِ مخفیانه اَمرَه مردمَ مسیح طرف هدایت بوکونیم، اَمَأن نخَأئیم کسیَه کلک بزنیم و هیچموقع خدا کلامَ تحریف نوکونیم، بلکی برعکس، خدا شاهده کی خیلی واضح حقیقتَ گوئیم و همیشه تلاش کونیم کی بتَأنیم جی هَن راه همۀ مردمِ رو تاثیر خوبی بنیم. ³ ولی اگر اَمی انجیلِ پیغام نامفهومه و اونِ درک کودَأن سخته، فقط اوشَأنی رِه اَطویه کی هلاکتِ راه میَأن شوئون درد. ⁴ شیطان کی اَ جهانِ خدایه، بی ایمانانِ فهمَ کورَ کوده تا نتَأند انجیلِ پور جلاله نورَه بیدیند، و اَمی پیغامِ معنیه کی دربارۀ مسیح جلاله یَ درک بوکوند، مسیحی کی خدایِ نادیده صورته. ⁵ اَمَأن دربارۀ خودمان موعظه نوکونیم یا خودمانِ جَه تعریف نوکونیم، بلکی موعظه کونیم کی عیسای مسیح خداونده، و اَمَأن اونِ وَسی شیمی خادمینیم. ⁶ چون هون خدایی کی بوگوفت:«نور جی تاریکی میَأن بتَأوه» خو نورَ اَمی دیلانِ میَأنم بتاوانه تا بفهمیم کی اَن اونِ پور جلالِ نوره کی عیسی صورتِ جَه تاوه. ⁷ اما اَ عظیم گنجَ، گیلی ظرفِ دورون یعنی اَمی بدنهای ضعیف و نابود بوستَأنی میَأن قرار بدَه، تا همه تَه نِ رِه آشکارَ بِه کی اَمی پیغامِ عظیمِ قدرت، خدا طرفِ جَه یه نه اَمی جَه. ⁸ اَمَأن جی هر طرف فشارِ میَأن ایسَأئیم ولی خوردَه نوبوستیم، بعضی موقع مشکلاتی وَسی کی پیش اَیه تعجب کونیم و حیرانَ بیم، ولی نااُمید نیئیم. ⁹ آزار دینیم ولی تنها نمَأنستیم، زمین بکفته دَأریم ولی هلاکَ نوبوستیم. ¹⁰ هوطو کی مسیح مرگِ اَمرَه روبرو بوبُست اَمَأنم همیشه مرگِ اَمرَه روبرو بیم، پس اَمی زنده بودن دلیلی ایسه بر عیسی زنده بودن. ¹¹ اَمَأن اَمی زندگی دورون چون خداوندَ خدمت کونیم همیشه مرگَ تسلیم بیم، ولی اَن خودش فرصتی ایسه تا عیسی زنده بودن و اونِ قدرتَ اَمی بدنایِ فانی میَأن نیشان بدیم. ¹² اَمَأن انجیلِ پیغامِ اِعلام کودَأن وَسی مرگِ اَمرَه روبرو بیم، ولی شومَأن هَ پیغامِ اَمرَه زندگی اَبدی بدس اَورید. ¹³ کتاب مقدس میَأن بینیویشته:«چون ایمان بأوردم، گب بزم» هَ روحِ ایمانِ اَمرَه، اَمَأنم ایمان دَأریم و گب زنیم. ¹⁴ چون دَأنیم هون خدایی کی اَمی خداوند عیسی یَ مَردن پسِ رِه ویریزَأنی، اَمرَم عیسی مَأنستَأن ویریزَأنه و شیمی اَمرَه به اونِ حضور اَوره. ¹⁵ اَشَأن همه شیمی خاطرِ وَسیه، تا خدا فیضِ وَسی مردمِ ویشتری ایمان بأورد و اَ ایمان اَوردن باعث بیبه افراد ویشتری اونَ شُکر و سپاس بوگوید، و اَطو خدا هم ویشتر جلال پیدا کونه. ¹⁶ هَنه وَسیه کی اَمَأن هیچموقع خدمتَ جَه دیلسردَ نیبیم، هر چند اَمی انسانیتِ ظاهری ایبچه ایبچه جی میَأن شوئون دره، ولی اَمی انسانیتِ باطنی روز به روز تازه ترَه بِه. ¹⁷ چره کی اَ رنج و زحمتَأی جُزئی و زود گذر، اَمرِه جلالی اَبدی فراهم اَوره کی اَ کوچی زحمتانِ اَمرَه نَشَه مقایسه کودَأن. ¹⁸ پس اَمَأن اونچی کی دیدنیه یَ چوم نودوخته دَأریم، بلکی چیزایِ نادیدنی یَ چوم بودوخته دَأریم، چره کی اونی کی دیدنیه موقتیه ولی چیزایِ نادیدنی تا اَبد باقی مَأند.