¹ آیا فکر کونید کی خودمانِ جَه تعریف کودَأن دریم؟ یا بعضیانِ مَأنستَأن احتیاج دَأریم کسی اَمرَه معرفی نامه فَأده؟ یا شیمی معرفی نامه یَ مُحتاجیم؟ ² شومَأن خودتان اَمره بهترین معرفی نامه اید کی اَمی دیلانِ دورون بینیویشته بوبُسته و همه تَأند بخواند و بفهمد. ³ شومَأن نیشان بدَه دَأرید کی مسیح نامه اید، اَمی خدمت ثمره، و نه مُرکبِ مرَه بینیویشته بوبُسته، بلکی خدایِ زنده روحِ اَمرَه، و نه تخته سنگِ رو، بلکی انسانِ گوشتی دیلِ رو. ⁴ ولی اگر جرأت کونیم اَطو اِدعا بوکونیم، علت اَنه کی بواسطۀ مسیح، خدایَ اعتماد کامل دَأریم. ⁵ خودمانِ جَه لیاقتی نیدینیم کی بوگوئیم، بله اَمَأن اَ کارِ انجام دَئَنِ لیاقتَ دَأشتیم، نه، بلکی اَمی لیاقت جی خدا طرفه. ⁶ اون اَمرَه لیاقت ببخشه تا عهدِ جدیدِ خادمان بیبیم، عهدی کی ایتِه بینیویشته سندَه اُستواره نیه، بلکی روحِ کارِ رو اُستواره، چون بینیویشته بوبُسته شریعت انسانَ کوشه، ولی روح زندگانی بخشه. ⁷ اگر اون خدمتی کی آخرسر محکومیت و مرگَ باعث بوسته و کلماتِ حَک بوبُسته سنگِ رو اُستوار بو، اوطویی اون شکوه و جلالِ اَمرَه شروع بوبُست، بحدی کی بنی اسرائیل نتَأنستد جلالِ وَسی موسی صورتَ فَأندرد، هر چند کی بعداً اونِ نورِه درخشش کمَ بوستَأن دوبو، ⁸ پس خدمتی کی بواسطۀ روح القدسه چقدر ویشتر وَأستی جلال اَمرَه بیبه؟ ⁹ چون اگر خدمتی کی مَردمَه شریعتِ مرَه محکوم کوده اوطو جلالِ اَمرَه همراه بو، پس خدمتی کی مردمَه تبرئه کونه چقدر وَأستی جلالِ ویشتری بدَأره. ¹⁰ اونچی کی زمانی پورجلال بو، هَسَه اگر بخَأئیم جلالِ برتر، یعنی عهدِ جدیدِ جلالِ مرَه مقایسه بوکونیم، دِ اون جِلوه یَ نَئره. ¹¹ و اگر اونچی کی موقتی بو اوطو جلال دَأشته، اونچی کی همیشگیه چقدر وَأستی ویشتر جلال بدَأره. ¹² پس چون دَأنیم کی اَ تازه جلال هیچموقع جی میَأن نیشه، شهامتِ اَمرَه انجیلِ پیغامَ موعظه کونیم، ¹³ نه موسی مَأنستَأن کی خو صورتَ نقاب بزَه تا بنی اسرائیل اون جلالِ تومامه بوستَأن نیدیند. ¹⁴ ولی قؤمِ درک و فهمم تاریکَ بوست و بوشو نقابِ جیر، چره کی تا ایمروزم هون نقاب، عهدِ عتیق خواندنِ موقع اوشَأنِ دیل و فکرِ رو باقیه، اَن نقاب فقط مسیح ایمان اَوردنِ مرَه اوسَأده بِه. ¹⁵ بله، تا ایمروز هر موقع اوشَأن موسی توراتَ خَأند اون نقاب اوشَأنِ دیلِ رو نَهه. ¹⁶ ولی هر موقع خداوند طرف وَأگردد، نقاب اوسَأده بِه. ¹⁷ و خداوند روحه، و هر جایی کی خداونده روح بِئسه اویَ آزادیه. ¹⁸ و همۀ اَمَأن مسیحیان در حالی کی صورتهای بی نقابِ مرَه، آینه ایی مَأنستَأن خداوندِ جلالَ منعکس کونیم، ایبچه ایبچه جلالی میَأن کی هر روزم ویشترَ بِه اونِ شبیه بیم، و اَن خداوند، یعنی روح القدسه جَه سرچشمه گیره.