¹ پس تصمیم بیگیفتم کی شیمی ورجَه نَأیم تا شیمی ناراحتی یَ باعث نوبوم. ² چره کی اگر شمرَه ناراحتَ کونم، دِ کی تَأنه مرَه خوشحالَ کونه؟ جُز هون کسانی کی من اوشَأنَ ناراحتَ کوده دَأرم. ³ هَنه وَسی اون قبلی نامه دورون اون مطالبَ بینیویشتم تا پیشتر جی می اَمون خودتان مسائلَ حل و فصل بوکونید تا وختی اَیم اوشَأنی کی وَأستی مرَه خوشحالَ کوند، می ناراحتی یَ باعث نوبود. چون اطمینان دَأرم کی می شادمانی همۀ شمرَه شادَه کونه. ⁴ من اون قبلی نامه یَ ناراحتی زیاد و دیلتنگی و اَشکایِ زیاده اَمرَه بینیویشتم، نه اینکی خَأستم شمرَه ناراحتَ کونم، بلکی خَأستم شمرَه خاطرجمع بوکونم کی بدَأنید چقدر شمرَه دوست دَأرم. ⁵ بدَأنید اون کسی کی باعث همۀ اَن ناراحتیان بوبُست، فقط مرَه ناراحتَ نوکود، بلکی خیلی جی شومَأنم ناراحتَ کود، ولی نخَأیم در اَن مورد ویشتر جی حد سختگیری بوکونم. ⁶ چون رفتاری کی اکثرِ شومَأن نسبتِ به اون نیشان بدَه اید، به اندازه کافی اونَ تنبیه بوکود. ⁷ پس هَسَه وَأستی اونَ ببخشید و دیلداری بدید، نوکونه غم و ناراحتی اونَ فیشار بأوره و جی پا تَأوَأده. ⁸ پس خواهش کونم کی اونَ نیشان بدید کی اونَ دوست دَأرید. ⁹ من اون نامه یَ اوطو شمره بینیویشتم تا شمره آزمایش بوکونم و بیدینم آیا هر موردی میَأن جی تعالیم ایطاعت کونید یا نه. ¹⁰ هر موقع شومَأن کسیَه ببخشید، منم اونَ بخشم، و اگر من کسیَه ببخشم وَأستی بوگویم مسیح حضورِ جَه و شیمی وَسی ببخشه دَأرم، البته اگر فکر کونید کی می بخششم لازمه. ¹¹ نوَأستی وَألیم شیطان جی اَن فرصت استفاده بوکونه، چره کی اونِ نقشه یانِ جَه بیخبر نیئیم. ¹² بگذریم، وختی بوشو بؤم «تروآس»، خداوند ایتِه پیلدانه فرصت مرِه خدمتِ رِه بازَه کود و بتَأنستم انجیلِ پیغامَ اویِ مردمَ فَأرسَأنم. ¹³ ولی چون اَمی برأر «تیطُسَ» اویَ پیدا نوکودم اونِ رِه دیلواپس بوبُستم، هَنه وَسی اوشَأنِ جَه خداحافظی بوکودم و بوشوم ایالتِ مقدونیه تا شاید اویَ تیطُسَ پیدا کونم. ¹⁴ ولی خدایَ شُکر کی بواسطۀ اتحاد مسیح اَمرَه، اَمرَه اونِ پیروزی میأن شریک کونه، و هر جا کی شیم اَمرَه بکار گیره تا انجیلِ پیغامَ، عطری خوشبو مَأنستَأن همه جا پخشَ کونیم. ¹⁵ چره کی اَمَأن بوخورِ خوشبویی مَأنستَأن ایسیم کی مسیح، خدایَ تقدیم کونه و اونِ عطرِ خوش همه جا پخشَ بِه، چی اوشَأنی میَأن کی نجات پیدا کوند، و چی اوشَأنی میَأن کی هلاک بهد. ¹⁶ اَن عطر کسی کی هلاکتِ راه میَأن ایسَه، مرگِ بویَ دِهه، و اونی کی نجاتِ راه میَأن ایسَه، عطرِ خوشِ زندگیه کی، زندگانی به بار اَوره. ولی کیه کی اَ کار و خدمتِ لیاقتَ بدَأره؟ ¹⁷ چون اَمَأن خیلیانِ مَأنستَأن نیئیم کی سودجویی وَسی خدا کلامَ ارزان فروشد و خدا کلامِ اَمرَه تجارت کوند، بلکی اَمَأن خدا طرفِ جَه مأمور بوبُسته ایم و صادقانه مسیح قدرتِ اَمرَه خدا حضورِ جَه گب زنیم.