³ من فقط دَأنم کی به بهشت بوجُر بوبورده بوبُست ولی جسماً بوشو یا روحاً من نَأنم فقط خدا دَأنه. ⁴ اویَ چیزایی ناگوفتنی بیشتَأوست کی گب زَئَن جی اوشَأن انسانِ رِه جایز نییه. ⁵ من اَ مردِ تجربه یانَ افتخار کونم، ولی خودمِ جَه هیچی افتخار کودَأنِ رِه نیدینم جُز می ضعفان، ضعفانی کی خدا خودشِ جلالِ رِه استفاده کونه. ⁶ اگر خودمِ جَه تعریف بوکونم نادانانِ مَأنستَأن رفتار نوکودِم، چون هر چی بوگویم عینِ حقیقته، ولی اَ کارَ نوکونم چون نخَأیم کسی ویشتر جی اون چیزی کی می جَه دینه یا می جَه ایشتَأوه مرِه ارزش قائل بیبه. ⁷ ولی اَنِ وَسی کی اَ مکاشفه ئانِ عظیمِ دِئِنِ وَسی مغرور نوبوم، ایتَه ناخوشیه دردناکی مرَه فَأدَه بوبُست، خدا وَأهَأشت ایتَه چی خارِ مَأنستَأن می بدنِ میَأن جُر بَأیه، یعنی شیطانِ اوسه بوبُسته کی مرَه رنج بده تا زیادی مغرور نوبوم. ⁸ سه بار خداوندَ التماس بوکودم کی اَ خارَ می جَه دورَه کونه، ⁹ ولی مرَه بوگوفت:«می فیض تی اَمْرَه یه و هَن تره وسته، چره کی می قدرت تی ضعفِ میَأن بهتر نمایان بِه» پس هَسَه دِه شادی اَمرَه می ضعف و ناتوانی یَ افتخار کونم، چون می زندگی مسیحِ قدرتَ نمایان کونه نه می توانایی و استعدادَه. ¹⁰ هَنه وَسی ضعفانِ میَأن، فُحش و ناسزائانِ میَأن، سختیانِ میَأن، اذیت و آزاران و مشکلاتِ میَأنْ مسیحِ وَسی شادمانم، چون وختی ضعیفم اونموقع یه کی توانایم، چره کی ویشتر خدایَ تکیه کونم. ¹¹ نادانانِ مَأنستَأن حرف بزَم، شیمی تقصیره شومَأن مرَه مجبور بوکودید اَطو خودمِ جَه تعریف بوکونم، در حالی کی شومَأن وَأستی می جَه تعریف بوکوده بید، هر چن من هیچم، ولی اون کسایی کی خوشَأنَ «رسولانِ عالی مقام» دَأندِ جَه کمتر نییم. ¹² زمانی کی شیمی اَمرَه ایسَه بؤم صبر و حوصلۀ زیادِ اَمرَه خدایَ خدمت کودم، خدا بواسطۀ من معجزات و کارهای عجیبِ زیادی شیمی میَأن انجام بدَه، هَ معجزات ثابت کونه کی من خدا رسول و اونِ اوسه بوبُسته یم. ¹³ اگر بخَأئیم دیگر کلیسائانِ مرَه مقایسه بوکونیم، من چی کاری دیگرانِ رِه بوکودم کی شمرَه نوکودم؟ جز اَنکی می خرجِ وَسی هیچموقع شیمی جَه کمکِ مالی فَأنگیفتم؟ مرَه اَ بی انصافی وَسی ببخشید! ¹⁴ هَسَه آماده یم سومین باره رِه بأیم شیمی ورجَه، و قول دهم اَی دفعَه هم شیمی رو باری ننم و شیمی سربار نوبوم، چره کی من شمرَه خَأیم نه شیمی پولَ! شومَأن می زَأکَأنید، اَن زَأکَأن نیید کی وَأستی خوشَأنِ پئر و مارِ رِه پول پس انداز بوکوند، بلکی برعکس، اَ پئر و مارد کی وَأستی زأکأن رِه کنار بند. ¹⁵ پس من خوشحالی اَمرَه هر چی کی دَأرم شیمی تقویتِ روحانی رِه خرج کونم، حتی حاضرم می جانَ شمرَه فدا بوکونم، اگر من اَقدر شمرَه دوس دَأرم، آیا دوروسته کی شومَأن مرَه کمتر دوس بدَأرید؟ ¹⁶ بعضی جی شومَأن قبول دَأرید کی من تا هَسَه شیمی رو باری نوبوستم، ولی فکر کونید من آدمِ خیلی زرنگی ایسم و شمرَه فریب بدَه دَأرم و حتماً ایتِه جایی شیمی وجودِ جَه سودی بوبوردم! ¹⁷ ولی من چوطو اَ کارَه بوکودِم؟ آیا بواسطۀ اون کسانی کی شیمی ورجَه اوسه کودم شیمی جَه سوءاستفاده بوکودم؟ ¹⁸ من تیطُسِ جَه خواهش بوکودم کی شیمی ورجَه بأیه و اونِ اَمرَه اَمی برأرم اوسه کودم، آیا تیطُس شیمی جَه بهره ایی فَأگیفت؟ مگر اَمَأن ایتَه روح مرَه هدایت نوبوستیم و هر دویِ اَمَأن به ایتَه روش عمل نوکودیم؟ ¹⁹ شاید فکر کونید تلاش کونیم خودمانِ جَه دفاع بوکونیم! ولی اَطو نییه، اَمَأن خدا حضورِ جَه و مسیحِ اتحادِ اَمرَه گب زنیم، ولی ای عزیزان، اَنَ بدَأنید اَمَأن هرکاری کونیم شیمی تقویت روحانی رِه ایسه. ²⁰ چره کی ترسم بأیم شیمی ورجَه و شمرَه اوطویی کی انتظار دَأرم نیدینم، و شومَأنم مرَه اوطویی کی انتظار دَأرید نیدینید. ترسم شیمی میَأن، دعوا و حسادت و توندی و خودخواهی و اِفترا و غیبت و غرور و تفرقه بیدینم. ²¹ و اَنِ جَم ترسم کی بأیم شیمی ورجَه و هویَ خدا ایبار دیگر مرَه شرمنده بوکونه، و من کسانی وَسی کی پیشترانِ رِه گوناه بوکوده دَأرد و هنوز خوشَأنِ ناپاکی و بی عفتی و عیاشی جَه توبه نوکوده دَأرد، ناراحتَ بؤم و ماتم بیگیرم.