¹ امیدوارم می گبانِ جَه کی تا حدودی جاهلانه یه خستَه نوبوسته بید، خواهش کونم تحمل بوکونید و وَألید اونچی کی می دیلِ دورون دره یَ بوگویم. ² منم هون غیرت و علاقه ایی کی خدا نسبتِ به شومَأن دَأره یَ می دیلِ میَأن احساس کونم، چره کی من شمرَه ایتَه باکرۀ پاکدامنِ مَأنستَأن مسیح مرَه نامزد بوکودم و اونَ بیسپُردم. ³ اما ترسم هوطو کی حوا مارِ جَه فریب بوخورد شیمی افکارم جی اِرادت و اِخلاصی کی مسیحَ دَأرید مُنحرفَ بِه. ⁴ می ترس اَنِ وَسیه کی شومَأن خیلی ساده دیل و زود باورید، چون اگر کسی شیمی ورجَه بأیه و شمرِه ایتَه عیسایِ دیگرِ جَه غیرِ اونی کی اَمَأن شمره موعظه بوکودیم موعظه بوکونه، یا ایتَه روح غیرِ اون روحی کی دریافت بوکودید، یا انجیلی غیرِ اون انجیلی کی بیشتَأوستید شمره عرضه بوکونه، خیلی راحت شومَأن همه یَ باور کونید. ⁵ ولی فکر نوکونم من جی اون آقایان کی خوشانَ پیله کسْ و رسولانِ عالی مقام دَأند چیزی کم بدَأرم. ⁶ شاید واعظِ خوبی نوبوم، ولی حقایقِ روحانی شناختِ جَه چیزی کم نَئرم و دَأنم دربارۀ چی گب زَئَن درم، و شومَأن اَنَ مسئله یَ متوجه بوبُسته اید چون بارها هر موردِ میَأن ثابت بوکودم. ⁷ آیا گوناه بوکودم کی انجیلِ پیغامَ مفت و مجانی شمرَه اعلام بوکودم؟ من اَ کارِ مرَه خودمَ حقیر کودَم تا شومَأن سرافراز بیبید. ⁸ در عوض خودمِ خرجِ رِه دیگر کلیسائانِ جَه کمکِ مالی فَأگیفتم، به قولِ معروف اوشَأنَ غارت بوکودم تا بتَأنم مجانی شمرَه خدمت بوکونم. ⁹ وختی شیمی ورجَه ایسَه بؤم با اَنکی پول احتیاج دَأشتم کسی یَ به زحمت تَأنوَأدَم و برارانی کی جی مقدونیه بامو بود می احتیاجاتَ رفع بوکودد. من هیچموقع شیمی دوشِ رو باری نوبوسته دَأرم و بعد از اَنم نوبوم. ¹⁰ به اون مسیحِ حقانیت کی می وجودَ بیگیفته قسم خورم کی هیچکی نتَأنه اَ افتخارَ می جَه بیگیره و همۀ یونانِ میَأن اَ موضوعَ اعلام کونم. ¹¹ شاید شمره فکر بوکونید اصلاً چی وَسی شیمی کمکَ قبول نوکودم، چون شمرَه دوس نَئرم؟ نه، خدا دَأنه کی چقدر شمرَه دوس دَأرم. ¹² ولی می هَ روشَ ایدامه دهم تا فرصت طلبانی کی گوید اَمی مَأنستَأن خدایَ خدمت کودَأن درد و اوشَأنِ خدمتو اَمی خدمت ایتَه یه، دِ نتَأند اَطو ادعا بوکوند. ¹³ چون اَجور اشخاص هیچموقع خدا طرفِ جَه اوسه نوبوسته دَأرد، اوشَأن رسولانِ دروغین و خادمینِ فریبکاری ایسد کی خوشَأنَ مسیحِ رسولان معرفی کوند. ²² آیا اوشَأن عِبرانید؟ منم ایسم! آیا اسرائیلید؟ منم ایسم! آیا ابراهیمِ زَأکَأند؟ منم ایسم! ²³ آیا مسیحِ خادماند؟ هر چن اَجور گب زَئَن دیوانگیه، ولی من ویشتر جی اوشأن خدمت بوکوده دَأرم! من جی همه ویشتر کار بوکوده دَأرم و ویشتر جی همه دکفته دَأرم زندان، ویشتر جی اوشَأن شلاق بوخوردم، و ویشتر جی اوشَأن مرگِ اَمرَه روبرو بوبُستم. ²⁴ پنج بار یهودیانِ جَه سی و نُه ضربه شلاق بوخوردم، ²⁵ سه بار چوبِ اَمرَه مرَه بزد، ایبار سنگسار بوبُستم، سه بار دریا میَأن اَمی کشتی غرقَ بوست، ایته شب و روزَ دریا میَأن موجانِ وسط بوگذرانم. ²⁶ همیشه سفرِ میَأن ایسَه بؤم و خطر همیشه مرَه تهدید کوده: رودخانه یانِ میَأنِ جَه دوارستَأنِ خطر، راهزنانِ خطر، می هموطنانِ یهودی خطر، غیرِ یهودیانِ خطر، خطرْ شهرانِ میَأن، خطرْ بیابانِ میَأن، خطرْ دریا میَأن، خطرْ جی برأرأنِ دروغینِ طرف کی کلیسائانِ میَأن ایسَد.