¹ اَ سومین باره کی شیمی ورجَه اَیم، خدا کلام فرمایه:«هر اتهامی یَ کی دو سه تَه شاهد گواهی بدد ثابت بِه» ² آخرین باری کی اویَ ایسَه بوم کسانی کی پیشترانِ رِه گوناه بوکوده بودَه هشدار بدَم، هَسَه هم باز اوشَأنَ و هم دیگرانَ هشدار دِهم کی اَی دفعه کی بأیم کسی رِه آسان نیگیرم. ³ چون شومَأن دلیل خَأئید و خَأئید ثابت بوکونم کی مسیح بواسطۀ من گب زنه. مسیح خو برخورد و روابطِ دورون شیمی اَمرَه ضعیف نییه، بلکی قدرتِ عظیمی ایسه شیمی وجودِ میَأن. ⁴ هر چن بدنِ ضعیف و انسانی اَمرَه صلیبِ رو بمرد، ولی هَسَه خدا قدرتِ اَمرَه زنده یه. اَمَأنم هَطو، اَمَأنم اَمی جسمِ میَأن ضعیفْ ولی اونِ مَأنستَأن زنده و قوی ایم، و شیمی برابرِ جَه خدا قدرتِ مرَه اختیار دَأریم. ⁵ خودتانَ آزمایش بوکونید بیدینید آیا مسیحی واقعی ایسید یا نه؟ خودتانَ محَک بزنید بیدینید جی آزمایشِ ایمان سربلند بیرون اَئید؟ آیا مسیح حضور و اونِ قدرتَ خودتانِ وجودِ میَأن هر روز ویشتر حس نوکونید؟ مگر اَنکی اَ آزمایشِ میَأن ردَ بوسته بید و فقط ظاهراً مسیحی اید! ⁶ ولی اُمیدوارم بفهمید کی اَمَأن اَ امتحانِ میَأن ردَ نوبوسته ایم. ⁷ می دوعا خدا درگاه جَه اَنه کی شومَأن گوناه جَه دور بیبید، نه اَنِ وَسی کی خودمانَ بوجُر فَأکشیم و مردم اَمَرَه تحسین بوکوند، بلکی خَأیم شیمی اَعمال راست و دوروست بیبه تا خودتان سربلندْ بیبید، حتی اگر مردم اَمرَه به حساب نَأورد و به نظر بأیه کی ردَ بوسته دَأریم بازم مُهم نییه. ⁸ اَمی وظیفه اَنه کی همیشه راستی و دوروستی پشتیبان بیبیم، و هیچ موقع هم نتَأنیم بر خلافِ دوروستی عملی انجام بدیم. ⁹ اَمَأن راضیئیم کی ضعیف بِئسیم ولی شومَأن قوی بیبید، اَمی پیله نأجه و دوعا اَنه کی شومَأن شیمی ایمانِ مسیحی میَأن رشد بوکونید و کامل بیبید. ¹⁰ هَنه وَسیه کی اَ چیزانَ وختی دورم شمره نیویسم تا وختی بأموم شیمی ورجَه مجبور نوبوم می اقتدارِ جَه استفاده بوکونم و شمرَه سرزنش و تنبیه بوکونم، چون اَ اِقتدارَه خداوند تقویت و رشد روحانی رِه مرَه فَأدَه دَأره نه تنبیه رِه. ¹¹ خلاصه اَن کی ای برأرأن شاد بیبید، مسیح میَأن رشد بوکونید و کامل بیبید، اونچی کی بوگوفتمَه توجه بدَأرید، همدیگرِ اَمرَه مُدارا بوکونید و صلح و صفا میَأن زندگی بوکونید، و بدَأنید خدایی کی محبت و سلامتی سرچشمه یه شیمی اَمرَه یه. ¹² همدیگرَ ایتَه مَأچی مُقدسِ اَمرَه سلام بوگوئید. ¹³ اَیَ همۀ مسیحیان شمرَه سلام رسَأند. ¹⁴ خداوند عیسایِ مسیح فیض، و خدا محبت، و روح القدسِ رفاقت، شومَأن همه تَه اَمْرَه بیبه. آمین