¹ پس چون مسیحْ درد و رنجِ جسمانی بکشه، شومَأنم وأستی خودتانَ هَ کارِ رِه آمادهَ کونید، چون کسی کی درد و رنج بکشه دَأره دِ گوناه مرَه کاری نَئره. ² و تا آخرِ عُمرْ طبقِ خدا اِراده زندگی کونه نه بر طبقِ شهوتهایِ انسانی. ³ چون شومَأنْ پیشترانِ رِه به اندازه کافی خودتانِ وختَ صرفِ کارهایی کی خدانشناسان میل دَأرد انجام بدد بوکوده اید. اون موقع شیمی زندگی یَ هرزگی و شهوترانی و مَستی و عَیاشی و بُت پرستی هایِ حَرامِ دورون تَلفْ کودید. ⁴ هَنه وَسیه کی هَسه اَجور بی بند و باری یانِ دورون اوشَأنِ مرَه شریک نیبید، تعجب کوند و شمرَه فُحش دهد. ⁵ ولی اوشَأنْ وَأستی روزی خوشَأنِ حیسابَ خدایی یَ پس بدد کی مُرده یان و زنده یانِ داوری رِه آماده یه. ⁶ هَنه وسیه کی اوشَأنی کی هَسَه بمرده دَأردَ بشارت بدَه بوبُست، تا هر چند جسماً آدمیانِ ورجَه محکوم بوبُستد، ولی اوشَأنِ روحْ خدا ورجَه زندگی بوکونه. ⁷ بزودی دونیا به آخر فَأرسه، پس شیمی حواس جمع بیبه و منضبط و جدی دوعا بوکونید. ⁸ مهمتر از همه اَنه کی همدیگرَ همۀ وجودِ اَمرَه مُحبت بوکونید، چون محبتْ گوناهانِ زیادَ پوشَأنه. ⁹ بدونِ غُرغُر و ناراحتی همدیگرَ مهمان بوکونید. ¹⁰ خداوند هر کودامِ شمرَه عَطایِ خاصی ببخشه دَأره، اَن عطایایَ همدیگرِ خیرتِ رِه بکار بیگیرید و اَطو همدیگرَ برکاتِ مختلفِ جَه بهره مند بوکونید. ¹¹ مثلاً کسی کی موعظه کونه، جوری موعظه بوکونه کی مشخص بیبه خدا طرفِ جَه گب زنه، و کسی کی خدمت کونه، قدرتی مرَه کی خدا اونَ فأدَه دَأره خدمت بوکونه تا همه چیزِ دورون، خدا بواسطۀ عیسی مسیح جلال پیدا کونه، چون جلال و قدرت تا اَبدالآباد اونِ برازنده یه. ¹² ای عزیزان، جی اَن آزمایشهایِ سختی کی شمرِه پیش اَیه تعجب نوکونید، و جوری رفتار نوکونید کی اِنگار ایتَه اتفاقِ عجیب شمرِه دکفته دَأره. ¹³ در عوضْ، اَنِ وَسی کی مسیحِ رنجانِ دورون شریک بوبُسته اید خوشحال بیبید، تا وختی اونِ جلالْ ظهور کونه، شیمی شادی کاملَ بِه. ¹⁴ اگر فقط اَنِ وَسی کی مسیحی ایی ایسید شمرَه فُحش دهد و رُسوایی پیش اَورد، خوش به حال شومَأن! چون اَطو جلالِ روحْ کی خدا روحه، شیمی رو آرام گیره. ¹⁵ اگر رنج کشید، نوکونه کی قتل و دزدی و شرارتْ یا فضولی وَسی رنج بکشید، ¹⁶ ولی اگر مسیحی بودنِ وَسی رنج کشید، شرمنده نیبید، بلکی اَنِ وَسی کی مسیحِ نامَ خودتانِ رو دَأرید خدایَ شُکر بوکونید. ¹⁷ عزیزانْ اونِ وخت برسه دَأره کی داوری، خدا خانه جَه شروع بیبه، و اگر اونِ شروع اَمی جَه یه کی خدا زأکأنیم، پس اوشَأنی کی خدا انجیلَ اِطاعت نوکوندِه آخر عاقبت چی خَأیه بیبه؟ ¹⁸ و اگر دوروستکاران اَطو به سختی نجات پیدا کوند، بی دینان و گوناهکارانِ سر چی خَأیه بَأیه؟ ¹⁹ پس اگر به خواستِ خدا رنج کشَأن درید، اِشکالی نَئره، خودتانِ نیکوکاری یَ اِدامه بدید، خدایَ اعتماد بوکونید و شیمی جانَ بیسپارید اون خالقی دسْ کی همیشه خو وعده یانَ وفا کونه.