¹ من کی خودم کلیسا رهبرم، و شاهد بؤم مسیحْ چوطو رنج بکشه، و اون جلالی کی قراره بزودی بأیه دورون شریکُ سهیمم، شومَأن کشیشانِ جَه تقاضا دَأرم. ² خدا گله کی شمرَه بیسپُرده بوبُسته مراقب بیبید و اوشَأنَ شبانی بوکونید، ولی نه جی رویِ اِجبار و زور، بلکی مِیل و رِغبتِ اَمرَه، هوطویی کی خدا خَأیه، و نه منافعِ نامشروعِ وَسی، بلکی جی رویِ عشق و علاقه. ³ سعی نوکونید اوشَأنی رو کی شیمی دس بیسپُرده بوبُسته دَأردْ سروری بوکونید، بلکی خودتانْ وَأستی گله رِه نمونه بیبید. ⁴ تا روزی کی شبانِ اَعظم ظهور کونه، تاجِ جلالَ کی هیچموقع پژمُرده نیبه دریافت بوکونید. ⁵ ای جوانانْ، شومَأنم کلیسا شِیخانِ جَه پیروی بوکونید، همه تَه شیمی رفتارِ دورون فروتن بیبید، چون؛ خدا مغرورانِ جولو ایسه، ولی فروتنانَ فیض بخشه. ⁶ اگر خودتانَ خداوندِ دسِ جیر فروتن بوکونید، اونْ وختِ مناسبِ رِه شمرَه سربلندَ کونه. ⁷ خودتانِ نگرانی و غُصه یَ اونَ بیسپارید، چون اونْ همیشه شیمی فکره. ⁸ مواظب بیبید و شیمی حواس جمع بیبه، چون شیمی دوشمنْ اِبلیسْ، ایتَه شیرِ غُرّانِ مَأنستَأن هر طرف چرخه، و کسی دونبال گرده تا اونَ قورتَ دِه. ⁹ پس ایمانِ دورون اُستوار بیبید و اونِ جولو بئسید، چون دَأنید تمامی دونیا دورون مسیحیانْ هَ زحماتَ دوچارد. ¹⁰ ولی بعدِ ایتَه مدتِ کوتاه، وختی اَ زحماتَ تحمل بوکودید، خدا کی همۀ برکاتِ روحانی یَ بخشه و شمرَه بواسطۀ مسیح دعوت بوکوده تا اونِ جلالِ دورون شریک بیبید، خودشْ شمرَه کامل، قوی، و اُستوار کونه، ¹¹ قوّت و جلالْ تا اَبدالآباد اونِ شینه، آمین. ¹² سیلاسِ کمکِ اَمرَه اَ چند خطَ شمرِه بینیویشتم، من اونَ برأری اَمینْ و وفادار دَأنم. من شمره بینیویشتم تا شمرَه تشویق بوکونم و شهادت بدم کی هَنه، خدا فیضِ حقیقی، اونِ دورون اُستوار بِئسید. ¹³ شیمی خأخور،(احتمالاً منظور کلیسایه) کی شیمی مَأنستَأن خدا انتخاب بوبُسته یه و شهرِ بابِلِ دورون ایسَه شمرَه سلام رسَأنه، می پسرْ مَرقُس هم شمرِه سلامرسَأنه. ¹⁴ می طرفِ جَه همدیگرَ مَأچی محبت آمیزِ مرَه سلام بوگوئید. صلح و سلامتی بیبه بر همۀ شومَأنْ کی عیسی مسیحِ شینید. آمین