¹ پس هر جور کینه کدورتْ، و هر جور حُقه بازی و ظاهرسازی، و هرجور حسادت و بدگویی یَ شیمی جَه دورَه کونید، ² و شیرخواره زأیِ مَأنستَأنْ شیرِ روحانی مُشتاق بیبید، تا اونِ خوردنِ مرَه بتَأنید پیلَه بید و نجات پیدا کونید. ³ اگر واقعاً بچشه دَأرید کی خداوند مهربانه! ⁴ پس بأئید اونِ طرفْ، یعنی اونْ سنگِ زنده طرفْ کی مردمْ اونَ ردَ کودد، ولی خدا اونَ انتخاب بوکود و اونِ نظرِ جَه اَرزشمنده. ⁵ تا شومَأنم سنگهایِ زنده مَأنستَأن خدا دسِ دورونْ، اونْ عمارتِ روحانی چَأکودَأنِ رِه بکار بأئید، و اونْ عمارتِ دورون کاهنِ مُقدس هم بیبید، و قربانی هایِ روحانی یَ کی خدا نظرِ جَه پسندیده یه، بواسطۀ عیسی مسیح تقدیم بوکونید. ⁶ چون کیتاب مقدسِ دورون بینیویشته:«هَسَه صَهیونِ دورون سنگی نهم، ایتَه سنگِ زاویه مُمتاز و گِرانْ، اون کسی کی اونَ توکل بوکونه سراَفکنده نیبه» ⁷ اَ سنگ شمرَه کی ایمان بأورده اید اَرزشمنده، ولی اوشَأنی کی ایمان نأورده دَأردِ رِه، اون چیزی ایسه کی خدا کلام فرمایه، چون کیتاب مقدسِ دورون بینیویشته بوبُسته:«سنگی کی مِعماران ردَ کودد، ساختمانِ اصلی سنگ بوبُسته دَأره.» ⁸ و جایی دیگر فرمایه:«اون سنگی ایسه کی بَعضیانِ پا اونَ خوره و لیز خورد، و صخره ایی کی بعضیانْ اونِ جَه کفد» اوشَأنِ حقه کی لیز بوخورد و بکفدْ، چون خدا کلامَ ایطاعت نوکوند. ⁹ ولی شومَأنْ اوشَأنِ مَأنستأن نیئیدْ، بلکی ملتی ایسید انتخاب بوُسته، و کاهنانی کی اَمی پادشاهَ خدمت کونید، شومَأن اُمتی مقدسْ، و خدا قؤمِ خاصیدْ، تا خدا صفتانَ اعلام بوکونید، خدایی کی شمرَه تاریکی جَه دخَأده به خودشِ عجیبِ نورِ طرفْ. ¹⁰ پیشتر جی اَنْ، قؤمی نوبوئید، ولی هَسَه خدا قؤمیدْ، زمانی خدا رحمت و مهربانی جَه محروم بوئید، ولی هَسَه خدا شمرَه رَحمت بوکوده. ¹¹ عزیزانْ، شومَأنْ اَ دونیا میَأن غریب و بیگانه اید، هَنه وَسی شیمی جَه تقاضا کونم اَ دونیا شهوتهایِ گوناه آلودِ جَه دوری بوکونید، شهوتهایی تسلیم نیبید کی همیشه اَمی روحِ اَمرَه جنگ کودَأن دردْ. ¹² مراقب بیبید شیمی اطرافیانِ بی ایمانِ ورجَه چوطو رفتار کونید، چون با اَنکی هَسَه شمرَه متهم کوند کی بدکاری کونید، ولی زمانی کی مسیح وَأگرده، خدایَ شیمی کارایِ خوبِ وَسی ستایش کوند. ¹³ خداوندِ وَسی مقاماتِ کشوری جَه ایطاعت بوکونید، خَأیه پادشاه بیبه کی همه تَه جَه بوجُرتره، ¹⁴ خَأیه حاکمانِ دولتی بیبه کی پادشاه طرفِ جَه مَنصوب بوبُستد تا خلافکارانَ مُجازات بوکوند و دوروستکارانَ تشویق بوکوند. ¹⁵ خدا اِراده اَنه کی شومَأن شیمی اعمالِ خوبِ اَمرَه، مردمِ نفهمِ دهنَ دوَدید تا شیمی جَه ایراد نیگیرد. ¹⁶ دوروسته کی شومَأنْ احکامِ مذهبی جَه آزادَ بوسته اید، ولی اَن نوَأستی شمرِه بهانه ایی بیبه کی هر کارِ نادوروستی یَ انجام بدید، بلکی خودتانِ آزادی یَ وَأستی بکار بیگیرید تا خدا اِراده یَ انجام بدید. ¹⁷ همۀ مردمَ احترام بنید، شیمی برأرأنَ محبت بوکونید، خدا جَه بترسید، و پادشاهَ احترام بنید. ¹⁸ ای غلامان، خودتانِ اَربابانَ احترام بنید و اوشأنِ تسلیم بیبیدْ، نه فقط اوشَأنی کی مهرباند و شیمی ملاحظه یَ کوند، بلکی اوشَأنی کی سخت گیرد و توندی کوندِ تسلیم هم بیبید. ¹⁹ چون کسی کی بخَأیه خدا اِراده یَ انجام بده ولی به ناحق رَنج و زحمت بیدینه، خدا اونَ اَجر دِهه. ²⁰ ولی اگر کارِ خلافِ وَسی تنبیه بیبید و تحمل بوکونید، چی افتخاریه؟ ولی اگر کارِ دوروست انجام بدید و در عوض بدی بیدنید و اونَ تحمل بوکونید، خدا ورجَه ثواب دَأره. ²¹ مگر خدا شمره هَنه رِه انتخاب نوکوده؟ مسیحْ اونْ رنجهایی کی شیمی وَسی بکشه مرَه خودش شمرِه نمونه بوبُست تا شومَأنم هون راهی یَ بیشید کی اون بوشو. ²² «اون هیچ گوناهی نوکود و هیچموقع دروغی اونِ دَهنِ جَه بیرون نأمو» ²³ وختی اونَ فُحش بدَأد، فُحشِ مرَه جواب ندَه، وختی عذاب کشه یه، تهدید نوکوده، بلکی خورهَ بیسپُرد کسی دس کی همیشه عدالت و انصافِ اَمرَه داوری کونه. ²⁴ اونْ اَمی گوناهانَ خو دوش بیگیفت و اوشَأنَ بوبورد صلیبِ رو، تا اَمَأنْ نسبتِ به گوناه بیمیریم و عدالتِ رِه زندگی بوکونیم، چون اونِ زخمانِ اَمرَه شومَأن شفا پیدا کوده دَأرید. ²⁵ چون شومَأنْ گوسفندانی مَأنستَأن بوئید کی خوشَأنِ راهَ گومَه کوده دَأرد، ولی هَسَه شیمی شبانِ ورجَه وَأگردسته دَأرید، شبانی کی شیمی جانِ نگهبانه و شمرَه خطرِ جَه محافظت کونه.