¹ جی پطرس، عیسایِ مسیحِ رسولْ، به مسیحیانی کی ایالتهایِ پونتوسْ، غَلاطیه، کاپادوکیه، آسیا، و بیطینیه میَأنْ پراکنده و غریبد. ² به اوشَأنی کی خدایِ پئرْ اوشَأنَ جی اَزلْ انتخاب بوکوده کی بواسطۀ خدا روحْ تقدیس بوبودْ تا عیسی مسیحِ جَه ایطاعت بوکوند و اونِ خونْ اوشَأنِ رو پاشیده بیبه، تا پاک بوبود. فیض و سلامتی روز به روز ویشتر شمرِه بأیه. ³ مُتبارک بیبه خدا، و اَمی خداوند عیسی مسیحِ پئرْ، کی خو رَحمتِ عظیمِ وَسی و بواسطۀ عیسی مسیحِ ویریشتَأن جی مُرده یانْ، اَمَرَه ایته تازه تولد و اُمیدِ زنده ببخشه، ⁴ تا بتَأنیم همۀ برکاتِ موعودَ بدس بأوریم. اَ برکاتْ عالَمِ بوجُرِ جَه، جایی کی نه خرابَ بِه نه رنگ و لعابِ جَه دکفه اَمِرِه کنار بنَه بوبُسته. ⁵ و شومَأنْ بواسطۀ خدا قوّت و خودتانِ ایمانْ، مَحفوظید تا نجاتی یَ دریافت بوکونید کی جی هَسَه شمرِه آماده بوبُسته و زمانِ آخرِ رِه ظاهرَ بِه. ⁶ پس هَسَه کی اَجور اِرثَ در پیش دَأرید وَأستی خوشحال بیبید، هر چند هَسَه ایتَه مدتِ کوتاهْ، لازم بوبُسته آزمایشهایِ مختلفِ دورون گرفتارَ بیدْ، و اَنْ شمرَه ناراحتَ کوده. ⁷ ولی اَ سختیانْ پیش اَیه تا شیمی ایمانِ اِصالتْ آزمایش بیبه، تا وختی عیسای مسیح ظهور کونه، شومَأن تحسین بیبید و افتخار بوکونید، افتخار بوکونید به هون ایمانی کی طلا جَه باارزشتره، چون حتی با اَنکی طلا جی میَأن شوئونیه، ولی اونَ آتشِ مرَه آزمایش کوند. ⁸ شومَأنْ با اَنکی تا هَسَه مسیحَ نیده دَأریدْ ولی اونَ دوس دَأرید، با اَنکی هَسَه اونَ نیدینید، ولی اونَ ایمان دَأرید، و اَنْ ایمانْ شیمی دیلِ دورون شادی عظیمی بوجود بأورده کی نشَه اونَ توضیح دَئَن. ⁹ هَ ایمانْ، آخرسر شیمی جانِ نجاتَ باعث بِه. ¹⁰ پیغمبرانْ دربارۀ اَ نجاتْ تحقیق کودد ولی کاملاً دربارۀ اون نَأنستد، اوشَأنْ خوشَأنِ کیتابانِ دورون نیویشتد کی اَ نجاتْ جی راهِ خدا فیضْ شمرَه رِسه. ¹¹ وختی مسیحِ روحْ کی پیغمبرانِ دورون ساکن بو دربارۀ زحماتی کی مسیحْ وَأستی تحمل بوکوده بِه و جلالی کی بازن اَمویه پیشگویی کوده، اوشَأنْ سعی کودد بفهمد کی کِی و چوطو اِتفاق دکفه. ¹² تا اَنکی خدا اوشَأنَ اِلهام بوکود کی اَ چیزانْ اوشَأنِ دورانِ دورون اتفاق دنکفه، و در حقیقتْ اون پیغمبرانْ شمرَه خدمت کودَأن دوبود، اوشَأنْ دربارۀ اُموری گب زئد کی هَسَه شومَأنْ انجیلِ مُبشرانِ جَه ایشتَأوید، جی هون کسانی کی بواسطۀ روح القدس کی آسمانِ جَه اوسه بوبُسته، شمرَه بشارت دهد. حتی فرشته یانم مُشتاقد دربارۀ اَ اُمور ویشتر بدَأند. ¹³ پس خودتَأنِ حواسَ جمعَ کونید و هُشیار بیبید، عیسی مسیحِ وَأگردستَأنِ رأفأ بِئسید، اُمید بدَأرید کی اون روزِ دورونْ فیضِ عظیمی شیمی نصیب بِهه. ¹⁴ خدا زأکأنِ مَأنستَأن بیبید و اونِ جَه ایطاعت بوکونید، وَأنألید گوناهانی کی پیشترانْ اوشَأنِ اَسیر بوئید شیمی زندگی رو تأثیر بنه، چون اونموقع نَأنستید چی کودَأن درید. ¹⁵ ولی هَسَه وَأستی خدایِ قدوسی مَأنستَأن کی شمره دخَأده، شیمی رفتار و کردارِ دورون مُقدس بیبید. ¹⁶ چره کی کیتاب مُقدسِ دورون بینیویشته:«مُقدس بیبید، چونکی من قُدوسم» ¹⁷ اَنم شمرَه یاد بیبه اون خدایی کی اونَ شیمی دوعائانِ دورون پئرِ آسمانی دخَأنید، روزِ جزا رِه کسی جَه طرفداری نوکونه، بلکی هر کسَ بسته به اونِ اَعمالْ عادلانه داوری کونه، پس تا زمانی کی اَ دونیا دورون ایسَأئید خداترسی مرَه زندگی بوکونید. ¹⁸ چون دَأنید کی اون راهِ و روشِ باطلْ و قدیمی ایی کی شیمی پئرانِ جَه به اِرث بوبورده بوئیدِ جَه آزادَ بوسته ایدْ و شیمی آزادی قیمت هم پرداخت بوبُسته، ولی نه به چیزهایی کی جی میَأن شِه، مثلاً طلا و نُقره مرَه، ¹⁹ بلکی عیسی مسیحِ خونِ اَمرَه، خونی کی خیلی هم با اَرزشه، چون اون ایتَه برۀ بی گناه و بی عیبِ مَأنستَأن قربانی بوبُست. ²⁰ اون پیشتر جی اَن کی جهانْ بوجود بأیه انتخاب بوبُست، ولی زمانِ آخرِ رِه شیمی وَسی ظهور بوکود. ²¹ شومَأنْ بواسطۀ اونْ خدایَ ایمان بأورده اید، خدایی کی مسیحَ مردَن پسِ رِه زندَه کودْ، و اونَ جلال ببخشه و سربلندَ کود، و هَسَه شیمی ایمان و اُمیدْ خدا رو اُستواره. ²² هَسَه کی حقیقتِ جَه ایطاعت کونید و شیمی جانَ پاکَ کوده دَأرید، تَأنید صمیمانه و بی ریا همدیگرَ مُحبت بوکونید، پس همدیگرَ جی تَه دیل دوس بدَأرید. ²³ چون زندگی تازه ایی دریافت بوکوده اید، اَ زندگی یَ شیمی پئر و مارِ جَه دریافت نوکوده اید، کی بعدِ ایتَه مدت جی میَأن شِه، بلکی اَ زندگی، تا اَبد پابرجایه، چون اونَ خدا کلامِ جَه کی زنده و اَبدیه بدس بأورده اید. ²⁴ چون:«آدمی علفَ مَأنه، و همۀ اونِ جلالْ علفِ گولَ مَأنه. علفْ خوشکَه بِه و اونِ گول فیوِه، ²⁵ ولی خدا کلام تا اَبدالآباد باقیه.» و اَن هون کلامی ایسه کی شمرَه بشارت بدَه بوبُسته.