⁷ ای عزیزان، اَمَأن وأستی همدیگرَ دوس بدَأریم، چون دوستی و محبتْ خدا طرفِ جَه یه و هر کی مُحبت کونه خدا زَأیه و خدایَ شناسه. ⁸ ولی اونی کی مُحبت نوکونه، خدایَ نشناسه، چره کی خدا محبته. ⁹ خدا خو مُحبت اَطو اَمَرَه آشکارَ کود کی خو ایدانه پسرَ اوسَه کود به جهانْ، تا بواسطۀ اونْ اَمَأن زندگی بوکونیم. ¹⁰ اَنْ مُحبتْ واقعیه، اَمَأنْ اونَ مُحبت نوکودیم، بلکی اونْ اَمرَه مُحبت بوکود و خو پسرَ اوسَه کود تا اَمی گوناهانِ کفاره بیبه. ¹¹ ای عزیزان، هَسَه کی خدا اَمرَه اَطو مُحبت بوکود، اَمَأنم وَأستی همدیگرَ محبت بوکونیم. ¹² هیچوخت هیچکس خدایَ نیده دَأره، ولی اگر همدیگرَ محبت بوکونیم، خدا اَمی میَأن ساکن بِه و اونِ محبت اَمی وجودِ میَأن کامل بِه. ¹³ هَنه وَسی خدا خو روحِ پاکَ اَمرَه فَأدَه دَأره تا بدَأنیم خدا اَمی میَأن ساکنه و اَمَأن خدا میَأن. ¹⁴ و اَمَأن بیده ایم و شهادت دهیم کی پئرْ خو پسرَ اوسَه کود تا جهانِ نجات دهنده بیبه. ¹⁵ اونی کی اعتراف کونه کی عیسی خدا پسره، خدا اونِ وجودِ میَأن ساکنه و اونْ خدا میَأن. ¹⁶ اَمَأن دَأنیم کی خدا چقدر اَمرَه محبت دَأره و اونَ اِطمینان دَأریم. خدا محبته و هر کی محبتِ مرَه زندگی کونه خدا میَأن ساکنه و خدا اونِ وجودِ میَأن. ¹⁷ و اَطو اَمی محبت ویشتر و کاملترَ بِه، پس روزِ داوری رِه اِطمینانِ مرَه اونِ حضور ایسیم، چون اَ جهانِ دورون اَمی زندگی اونِ زندگی یَ مَأنه. ¹⁸ لازم نییه کسی جَه کی اَمرَه محبت دَأره بترسیم، چون خدا هر جور ترسَ اَمی جَه دورَه کوده، اگر هنوز ترسیم، علت اَنه کی هنوز کاملاً یقین نَئریم کی خدا واقعاً اَمرَه دوس دَأره. ¹⁹ اَمَأن محبت کونیم، چون اول اون اَمَرَه محبت بوکود. ²⁰ اگر کسی اِدعا دَأره کی خدایَ مُحبت کونه ولی خو برأرِ جَه نفرت دَأره، دوروغ گویه، چون کسی کی خو برأرَ کی دِئِن دره محبت نوکونه، چوطو اِمکان دَأره خدایی کی نیده دَأره یَ محبت بوکونه؟ ²¹ و اَنْ حُکمَ اَمَأن اونِ جَه فَأگیفته دَأریم کی «هر کی خدایَ مُحبت دَأره، وَأستی خو برأرَ مُحبت بوکونه.»