¹ هر کی ایمان دَأره کی عیسی، مسیحْ و خدا پسره، خدا زأی حیساب بِه، و هر کی پئرَ دوس دَأره، اونِ زَأیَم دوس دَأره. ² از کَ یَ دَأنیم خدا زَأکأنَ دوس دَأریم؟ اَز اَنکی خدایَ دوس دَأریم و طبقِ اونِ اَحکام عمل کونیم. ³ خدایَ محبت کودَأن هَنه، یعنی اونِ اَحکامِ جَه اِطاعت بوکونیم، و اونِ اَحکام سنگین نیه. ⁴ چون هر کی خدا زأی بیبه دونیا رو پیروزَ بوسته، و اونچی کی باعث بوبُسته دونیا رو پیروز بیبیم اَمی ایمانه. ⁵ کیه اون کسی کی دونیا رو پیروزَ بوسته؟ فقط اون کسی کی ایمان دَأره عیسی، خدا پسره. ⁶ عیسی مسیحِ اَمونْ، آب و خونِ اَمرَه بو، اونِ اَمونْ نه فقط آبِ مرَه، بلکی هم آب و هم خودشِ خونِ مرَه بو، و خدا روحْ اَنَ شهادت دِهه، چون روحْ حقیقتِ محضه. ⁷ پس اَمَأن سه تَه شاهد دَأریم، ⁸ روحْ، آبْ، خونْ، و اَن سه تَه ایته ید. ⁹ اَمَأن کی انسانِ شهادتَ قبول کونیم، خدا شهادت کی پیله تره، چون شهادتی ایسه کی خدا خودش دربارۀ خو پسر بدَه دَأره. ¹⁰ هر کی خدا پسرَ ایمان بأوره، اَ شاهدَ خو دیلِ میَأن دَأره، ولی هر کی خدا شهادتَ قبول نوکونه اونَ دروغگو دَأنه، چون شهادتی کی خدا دربارۀ خو پسر دِهه یَ باور نوکوده. ¹¹ و اون شهادت اَنه؛ خدا اَمرَه حیات جاودانی فَأدَه دَأره و اَنْ حیاتَ تَأنیم بواسطۀ اونِ پسر دریافت بوکونیم. ¹² اونی کی پسرَ دَأره حیات دَأره، و اونی کی خدا پسرَ نَئره، حیاتَ دریافت نوکوده. ¹³ اَن نامه یَ بینیویشتم تا شومَأن کی خدا پسرَ ایمان دَأرید بدَأنید حیاتِ جاودانی دَأرید. ¹⁴ اَن اون اِطمینانی ایسه کی خدا حضورِ جَه دَأریم کی اگر اونِ جَه چیزی بخَأئیم کی مُطابقِ اونِ اِراده بیبه، اَمی دوعایَ ایشتَأوه. ¹⁵ و اگر دَأنیم هر چی کی اونِ جَه خَأئیم ایشتَأوه، تَأنیم اِطمینان بدَأریم اونچی کی اونِ جَه بخَأسته ایمَه، اَمَرَه عَطا کونه. ¹⁶ اگر کسی بیدینه کی اونِ برأر گوناهی کونه کی مرگَ باعث نیبه، اونِ رِه خدا حضور دوعا بوکونه، و اگر او شخص اون گوناهَ نوکوده، خدا اونَ زندگی بخشه، ولی گوناهی هم وجود دَأره کی مرگَ باعث بِه و من نوگویم کی اونِ رِه دوعا بوکونید. ¹⁷ هر کارِ نادوروستی گوناهه، ولی گوناهی هم وجود دَأره کی مرگَ باعث نیبه. ¹⁸ اَمَأن دَأنیم هر کس خدا زأی بیبه دِ گوناه نوکونه، چون عیسی کی خدا پسره اونَ محفوظ دَأره تا شیطانِ دس اونَ فَأنرسه. ¹⁹ اَمَأن دَأنیم کی خدا جَه ئیم، ولی شیطانْ همۀ دونیا رو تسلط دَأره. ²⁰ و اَنم دَأنیم کی خدا پسر بأمو و اَمرَه فهم ببخشه دَأره تا خدایِ واقعی یَ بشنَأسیم. و هَسَه اَمأن اونِ اَمرَه کی حَقه مُتحدیم، یعنی اونِ پسر عیسی مسیحِ اَمرَه. اون خدایِ واقعی و حیاتِ جاودانیه. ²¹ ای زأکأن، هر چی کی شیمی دیلِ میَأنْ خدا جایَ گیره، بُت حیساب بِه، بُتانِ جَه دوری بوکونید.