¹ بیدینید خدایِ پئر چقدر اَمرَه دوس دَأره کی اَمرَه خو «زأکأنْ» دخَأده دَأره، و هنم ایسه و اَمَأن واقعاً خدا زأکأنیم. و اگر دونیا مردمانْ اَمرَه نشناسد، علتْ اَنه کی خدایَ نشناخته دَأرد. ² ای عزیزانْ، هَسَه اَمَأن خدا زأکأنیم، ولی اونچی کی خَأئیم بیبیم هنوز آشکارَ نوبوسته، ولی اَنَ مُطمئنیم کی وختی مسیح وَأگرده اونِ مَأنستَأن بیهیم، چون اونَ هوطویی کی ایسه دینیم. ³ هر کی اَ حقیقتَ اُمید دَأره، خودشَ پاک دَأره، هوطویی کی مسیح پاکه. ⁴ و هر کی گوناه کونه، بر خلافِ شریعت عمل کونه، چون گوناه در حقیقت شریعتِ مرَه مخالفت کودَأنه. ⁵ شومَأن دَأنید کی مسیحْ ظاهرَ بوست تا آدمیانِ گوناهَ اوسَأنه، و اَنم دَأنید کی اونْ خودش کاملاً بی گوناه بو. ⁶ هر کی مسیحْ مرَه مُتحده گوناه نوکونه، ولی هر کی گوناه دورون زندگی کونه، نه اونَ بیده دَأره نه اونَ شناسه. ⁷ ای زأکأن، کسی شمرَه گومراه نوکونه، هر کسی عدالتَ بجا اَوره عادله، هوطویی کی اونْ عادله. ⁸ ولی اونی کی گوناه کونه، شیطانِ زأکه، چون شیطانْ جی هون اول گوناه بوکود. و هَنه وَسی خدا پسر ظاهرَ بوست تا شیطانِ کارانَ نابودَ کونه. ⁹ اونی کی خدا جَه بودونیا بأمو دَأره گوناه نوکونه، چون خدا ذاتْ اونِ دورون وجود دَأره و اون نتَأنه گوناه میَأن زندگی بوکونه، چون خدا اونِ پئره. ¹⁰ پس اَطو شَه گوفتَأن، کیی خدا زأیه کیی شیطانه زأی، اونی کی اَعمالِ دوروستَ بجا نَأوره، و یا خو برأرَ دوس نَئره خدا جَه نییه. ¹¹ چون اون پیغامی کی جی هون اَول بیشتَأوستید، اَنْ بو:«همدیگرَ محبت بوکونیم» ¹² اَمَأن نوَأستی قائنِ مَأنستَأن بیبیم، اون شیطانِ زأی بو و خو برأرَ بوکوشت. چی وَسی؟ اَنِ وَسی کی خودشِ اَعمال نادوروست بو و اونِ برأرِ اَعمال دوروست. ¹³ ای برأرأن، از اَنکی دونیا شیمی جَه نفرت دَأره تعجب نوکونید. ¹⁴ اگر اَمَأن اَمی برأرأنَ محبت بوکونیم، معلوم بِهه کی مرگِ جَه نجات پیدا کوده دَأریم و زندگی یَ داخلَ بوستیم. هر کی خو برأرَ محبت نوکونه مرگِ سرزمینِ دورون ساکنه. ¹⁵ هر کی خو برأرِ جَه نفرت دَأره قاتله، و شومَأن دَأنیدی کی هیچ قاتلی حیاتِ جاودانی نَئره. ¹⁶ اَمَأن معنی محبتِ واقعی یَ مسیحِ جَه یاد بیگیفتیم، چون اونْ خو جانَ اَمی وَسی فدا بوکود، اَمَأنم وَأستی اَمی جانَ اَمی برأرأنِ رِه بنیم. ¹⁷ اگر کسی مالِ دونیا بدَأره، ولی وختی خو برأرَ مُحتاج دینه اونَ کمک نوکونه، چوطو خدا محبتْ اَجور شخصِ دورون ساکنه؟ ¹⁸ ای زأکأن، بأئید محبت بوکونیم، نه فقط حرفی و تعارفی، بلکی واقعی و عملی. ¹⁹ اونموقع دَأنیم کی مسیحیانِ واقعی ایسیم، چون خدا حضورِ جَه اَمی وجدان اَمرَه گواهی دِهه. ²⁰ و اگر اَمی وجدان اَمرَه محکوم بوکونه، خدا اَمی وجدانِ جَه پیله تره و همه چیزِ جَه خبر دَأره. ²¹ ای عزیزان، اگر اَمی وجدان اَمرَه محکوم نوکونه، تَأنیم اِطمینانِ اَمرَه بیشیم خدا حضورْ، ²² و هر چی کی اونِ جَه درخواست بوکونیم، دریافت بوکونیم، چره کی اونِ اَحکامَ اِطاعت کونیم و اونچی کی اونَ خوش اَیه یَ انجام دهیم.