¹ ای زأکأن، اَنَ شمره نیویسم تا گوناه نوکونید، ولی اگر کسی گوناهی بوکود، پئرِ ورجَه کسی یَ دَأریم کی اَمرِه شفاعت کونه، یعنی عیسی مسیحَ کی کاملاً عادله. ² اونْ خودشْ اَمی گوناهانِ کفاره یه، و نه فقط اَمی گوناهانْ، بلکی همۀ جهانِ گوناهانْ. ³ فقط زمانی تَأنیم مُطمئن بیبیم کی اونَ شناسیم کی اونِ اَحکامِ جَه اِطاعت بوکونیم ⁴ کسی کی گویه اونَ شناسه ولی اونِ اَحکامَ ندَأره، دوروغ گویه و راستی اونِ دورون جایی نَئره. ⁵ ولی کسی کی اونِ کلامِ جَه اِطاعت کونه، در حقیقت خدا محبتْ اونِ وجودِ دورون کاملَ بوسته، از اَ راه تَأنیم مُطمئن بیبیم که خدا دورون زندگی کونیم. ⁶ کسی کی اِدعا کونه مسیحیه و مسیحْ میَأن زندگی کونه، وَأستی هوطویی زندگی بوکونه کی عیسایِ مسیح زندگی کوده. ⁷ ای عزیزان، حُکمِ تازه ایی شمرَه نینیویسم، بلکی هون حُکمِ قدیمی ایی که از اول دَأشتید و همۀ شومَأن اونَ بیشتَأوسته دَأریدَ تکرار کونم، یعنی همدیگرَ محبت بوکونید. ⁸ ولی با اَنحال اَ حکمی کی شمره نیویسم همیشه تازه یه، و هوطو کی مسیحْ اونَ عمل بوکود شومَأنم وَأستی اونَ عمل بوکونید، چون تاریکی شوئون دره و نورِ واقعی شروع به تاوستن بوکوده. ⁹ کسی کی گویه نورِ میَأن ایسَه ولی خو برأرِ جَه نفرت دَأره، هنوز تاریکی میَأن ایسَه. ¹⁰ ولی اونی کی خو برأرَ محبت کونه، نورِ میَأن زندگی کونه و لغزش نوخوره. ¹¹ ولی کسی کی خو برأرِ جَه نفرت دَأره تاریکی میَأن ایسَه و تاریکی میَأن قدم زنه، اونْ نَأنه کَ یَ شوئون دره، چون تاریکی اونِ چومانَ کورَ کوده. ¹² ای زأکأنْ اَ چیزانَ شمرِه نیویسم چون شیمی گوناهانْ عیسی مسیحِ نامِ وَسی آمرزیده بوبُسته. ¹³ ای پئرانْ، شمره نیویسم چون اونَ کی جی اَزل ایسَه بویَ شنَأسید، ای جوانانْ، شمرَه نیویسم چون اونْ شریرِ رو غلبه بوکوده اید. ای کوچی زأکأن، شمرِه نیویسم چون پئرَ شنأسید. ¹⁴ ای پئرانْ، شمره بینیویشتم چون اونَ کی جی اَزل ایسَه بویَ شنَأسید. ای جوانانْ شمره بینیویشتم چون کی قوّت دَأرید و خدا کلام شیمی میَأن ساکنه و شریرِ رو غلبه بوکوده اید. ¹⁵ دونیا و اونچی کی اونِ میَأن نَهَه یَ دیل دَنوَدید، چون اگر کسی دونیایَ دوس بدَأره، پئرِ مُحبت اونِ دورون وجود نَئره. ¹⁶ چون هر چی کی دونیا میَأن نَهه، یعنی جسمِ شهوتْ، چومِ خواهشْ و زندگانی غرورْ، پئرِ جَه نییه بلکی جهانِ جَه یه. ¹⁷ دونیا و اونِ هَوَسانْ زودگوذره، ولی اونی کی خدا اِراده یَ بجا اَوره، تا اَبد باقی مَأنه. ¹⁸ ای زَأکأن، اَ دِ ساعتِ آخره، و هوطو کی بیشتَأوسته اید ضدِ مسیح اَیه، هَسَه هم کسانی کی ضدِ مسیحد زیادد و همه جا ایسأد. و هَنه وَسی فهمیم کی ساعتِ آخر فأرسه دَأره. ¹⁹ اَنْ ضدِ مسیحیان اَمی مرَه ایسَه بودْ ولی اَمی جَه نوبود و بوشود، چون اگر اَمی اَمرَه بؤد ایسَأده و نوشویِد، ولی بوشود تا معلوم بیبه کی هیچکودام جی اوشَأن اَمی جَه نوبود. ²⁰ ولی اونْ قدوسْ شمرَه مَسحْ بوکوده و شومَأنْ حقیقتَ دَأنید. ²¹ اگر من اَشَأنَ شمرِه نیویسم نه اَنِ وَسی کی حقیقتَ نَأنید، بلکی چون شومَأن دَأنید نیویسم، شومَأن دَأنید کی راستی جَه هیچ دوروغی بوجود نَأیه. ^{22 23} پس دوروغگوی واقعی کیسه؟ کسی ایسه کی بوگویه عیسی «مسیحْ» نییه، کسی کی اَطو گویه خودشْ ضدِ مسیحه، چون هم پئرَ ردَ کونه هم پسرَ. ²⁴ وَألید اونچی کی از اول بیشتَأوستیدْ شیمی دیلانِ میَأن ثابت بمَأنه، چون اگر اونچی کی از اول بیشتَأوستید شیمی دیلانِ میَأن ثابت بمَأنه، شومَأن همیشه پئرِ میَأن و پسرِ میَأن ثابت مَأنید. ²⁵ و اون حیاتِ جاودانی ایی کی اونْ وَعده بدَه دَأره شیمی نصیب بِهه. ²⁶ من اَ چیزانَ دربارۀ اون کسانی بینیویشتم کی شمرَه گومراه کوند. ²⁷ ولی دربارۀ شومَأن وَأستی بوگویم شومَأن نیازی نئرید کسی شمرَه تعلیم بده، چون روح القدس دربارۀ همه چی شمرَه تعلیم دِهه و اونِ تعالیم حقیقته و دوروغ نییه. پس هوطو کی روح شمرَه تعلیم دِهه همیشه مسیح میَأن بِئسید و اونِ جَه دورَه نیبید. ²⁸ پس هَسَه ای زأکأن، اونِ میَأن بِئسید تا وختی ظهور بوکود اِطمینانِ مرَه بیشیم اونِ پیشواز، نه اَنکی اونِ جَه خجالت بکشیم. ²⁹ اگر بفهمسته دَأرید کی اونْ عادله، پس دَأنید هر کی عدالتَ بجا بأوره اونِ جَه بودونیا بأمو دَأره.