¹ من دربارۀ کلامِ حیاتْ شمرِه نیویسم، کلامی کی از اول وجود دَأشته و اَمَأن اونَ بیشتَأوستیم و اونَ خودمانِ چومِ اَمرَه بیده ایم، اَمَأنْ اونَ بیده ایم و اَمی دسانِ اَمرَه اونَ لمس بوکودیم. ² حیاتْ ظاهرَ بوست، و اَمَأن شهادت دهیم کی اونَ بیده ایم، اَمَأن حیاتِ جاودانی یَ شمرَه اعلام کونیم، که پئرِ مرَه بو و اَمَرَه ظاهرَ بوست. ³ اَمَأن اونچی کی بیده ایم و بیشتَأوستیمَ شمرَه اعلام کونیم، تا اِتحادی میَأن کی پئرْ و اونِ پسرْ عیسی مسیحِ اَمرَه دَأریمْ شومَأنم شریک بیبید. ⁴ اَمَأن اَشَأنَ شمره نیویسیم تا اَمی شادی کامل بیبه. ⁵ اَن اون پیغامی ایسه کی اونِ جَه بیشتَأوستیم و شمرَه اعلام کونیم: خدا نوره، و هیچ تاریکی ایی اونِ میَأن وجود نَئره. ⁶ اگر بوگوئیم اونِ مرَه شراکت دَأریم، ولی تاریکی میَأن زندگی بوکونیم، معلوم بِه کی دوروغ گوئیم و راستی مرَه عمل نوکونیم. ⁷ ولی اگر نورِ میَأن زندگی بوکونیم، هوطویی کی خدا نورِ میَأن ایسَه، اونموقع اونِ مرَه شراکت دَأریم و اونِ پسرْ عیسی خونْ، اَمرَه هر گوناهی جَه پاکَ کونه. ⁸ اگر بوگوئیم گوناهی نَئریم، خودمانَ گول بزَه ئیم و راستی جَه دوریم. ⁹ ولی اگر خودمانِ گوناهانَ اعتراف بوکونیم، اون کی اَمین و عادله، اَمی گوناهانَ بخشه و هر ناراستی جَه اَمرَه پاکَ کونه. ¹⁰ اگر بوگوئیم گوناه نوکوده ایم، اونَ دوروغگو بدَأنسته ایم، و اونِ کلام اَمی دورون جایی نَئره.