¹ Sengmuse, Matu Yesus gilatutuk, "Nang gamamolo angaba miama ilatutuk, nama adedeng gie adingmi mate ading gingka amina bana sampe ging Lahatala ga e hamolang ba kuasa mi adu anga gauling." YESUS MUSA E ELIA GILATOPUNI ² Oli, Vid talaung sengmu, matuh Yesus sakolaval Petrus, Yakobus, oli Yohanes, gijali sengmu gang gilalokang ging p'ana adual balolu mimida. Musengmu, matu Yesus gihondal goa angami giavakal ga buala. ³ Oli, Gapakiang p'enangdi hamolang oli mang ap'al. Palika tang namaba il gene ga ap'al jua ka anga gajoang bana. ⁴ Musengmu, jiajase gihondal goa anga, Elia e Musa, ging ae Yesus galatutuk jia. ⁵ Anga mi, Petrus matu Yesus gala tutuk, "Rabi, ning adingmi mang nua bagie. Ma ping kemah atoga gene, anu miama Eg gene, anu miama Musa genang, oli anu miama Elia genang." ⁶ Anggelang, bola neningba ubagang gengdi ka gelibana karna ginang ajimi gip'ukangmali. ⁷ Anga gelang, bano p'al dihela ging migoleng, oli ilanu gamang ae bano angami adu, Gang bola, "Adingba Na Val gamamolo. Gengba Gohalela!" ⁸ Angami jiajase, ging ma na apal anga mi uling, gingka nama juadi uling gielibana jema kecuali matu Yesus. ⁹ Oli, ging gie adual uhap'a bo galolanghela, Yesus parinta miaginang neningba ging vanang ga uling anga ake miama namajua galahup'a ganang, sampe Manusia gaval bale ap'etal ae nama amina hahama angami. ¹⁰ Anga gagelang, ging hur anga puni anamang miama gingba gilahama sambil tateteng bola, aminahi bale ap'etal angase bola getabani. ¹¹ Muse, ging miama Yesus geteng, "Getabaniba ahli taurat gonong ubagang bola Elia musti gatula adu?" ¹² Angami muse, Yesus ubagang, "Elia gang musti gatula adu ibase ilbela anga gang gene ganua. Oli, nening ba nang tulis miama Manusia Gaval gadang musti ketang moleng anga ging dapa? ¹³ Ibase, Nang malekang ilatutuk sebola Elia adu jema, oli ging geng gene mang vede neningba gimau anga ugaluali, emanghula gausarenta anga gajoang." SAKOLAVAL GONONG EANG P'ELA NAMA ANU GOMI ANGA GING GENE UHAP'A JADIBANA ¹⁴ Angamuse, oras matu Yesus, Petrus, Yakobus, oli Yohanes ging bale sakolaval ebeng gonong giola adu, ging ulingse nama rae ae sakolaval ebeng anga giomamoing, oli ahli Taurat gonong ae giala ulak jia. ¹⁵ Oli, mang misavakase namamoing anga Yesus ga uling, ging baruati oli ging haru ehiva Geng tarima. ¹⁶ Muse, Yesus angami giteng, "Neningba ing ae miama ahli Taurat gonong gilaulak?" ¹⁷ Nama anu angami Gahur balas, "Guru, Nang naval amu anu p'ana ma ahondal goa karna eang p'ela gomimi maso e geng gene tutuk gahala. ¹⁸ Setiap kali eang p'ela anga geng kuasai, gang kodo meke tang hela oli purung boku gag mihela, oli gang gavehang nagiling, senghi gang kejang. Nang Asakolaval gonong gibagang giohi eang p'al ang gatiari, ibase ging jadibana." ¹⁹ Oli, Yesus gihur anga jawab sebola, "Hei, generasi ba ga iman naga! Nang musti ilatopuni Oras adedeng magalahi? Nang musti ilatopuni udagili sampe tavedinghi? Val anga p'ana Nolama!" ²⁰ Angamuse, val p'enang ging gala matu Yesus gola adu. Oli, eang p'ela Yesus ga uling, gang anga mi val p'enang gavavili. Val p'enang mugu meke tang hela oli kola valalamal ibase purungboku di ae gagmi hela. ²¹ Angamuse, Yesus val anga gimang geteng, "Ilading gie geng umugu luang tavang jema?" Gimang balas bola, "Gangdo ol jiami umugu. ²² Oli, roh anga sering geng ajong miama advaling gomimi oli geng miama jial gomi gene gamusi. Ani ibase, kalobola Ang bisa ilanu gene, nyomi nijahi oli ningmoling." ²³ Yesus galahup'a, "Kalo ang bisa? Ilkaranu ajimi anga misafakase miama gingba uparsaja anga." ²⁴ Mang sarak dinagase val anga gimang ko oli gangbola, "Nang uparsaja! Nauparsaja gomi ading umolinghi!" ²⁵ Angami Yesus ulingse nama rae holik-holik adu gomamoing, Gang eang p'ela anga uhelelmu gangbola, "Ingba roh tutuk gahala oli kap'e anga, Nang yoparenta ake valading gomimi ganangba gohap'a oli tang ake gomi maso ganang!" ²⁶ Kalili senjema muse oli val anga tatabi gafavilise, eang hamolang anga gohap'a. Val anga mangvede nama amina gajoang hise namarae anga bola, "Gang amina!" ²⁷ Agani ibase, Yesus val anga gatang puni, muse val anga mate. ²⁸ Oli, angami Yesus e gomi maso, Galalokang senghi gasakolaval gonong Geteng, "Getabaniba ninga ka gatiari jadibana?" ²⁹ Oli, Gang gialatutuk, "Ilgagiani ading ka gohap'a jadibana kecuali mang sambajang." Yesus Ga Aminang Bale Ututuk ³⁰ Momi hi adu, Yesus oli ga sakolaval gonong jema oli Galilea abang goa jema. Oli, Gangka bola nama ebeng ake gieli ganang. ³¹ Gagomimi anga, Gang ae Gasakolah val gonong ging ajar jia oli giala tutuk, "Manusia gaval mianumise nama miama manusia gatangmi, oli mianumise ging Gengtamina. Oli, nama Gengtamina sengse, vid atoga magalahi gang bale ap'etal." ³² Agani ibase, sakoaval gonong ka hur anga umanggarati bana oli gingbo taganingdi ging Go p'aliling. Ging Talalulak sebola Alangba Mip'al ³³ Sengmuse, Yesus oli Gasakolaval gonong Kapernaum misampe. Oli, Yesus e gomimi jema muse, Gang giteng, " Neningba ing fiagavening gomi ututuk?" ³⁴ Agani ibase, ging takimang karna fiagavening galuali anga ging talaulak sebola alangba mip'al. ³⁵ Muse, Yesus miha oli gang gasakolaval karanu falungavehang giagang. Oli, Gang gilatutuk, "Alangba ujali bola gatula, angase gang musti ae ginangajimi gimotagoa hi oli balentavala miama ginangajimi gilahama." ³⁶ Sengmuse, Yesus val kakiri anu mia oli geng miama gihahama mi mate. Oli, gang val anga geng karavang, Gang gilatutuk, ³⁷ "Alalang angaba val kakiri anu geng sambut ading gajoang ae Nane gomimi, gang Nengba Neng sambut. Oli, alalang angaba Neng sambut, ka Neng sambut bana, ibase Lahatala ba neng gahing." Namaba Setang Gatiari ae Yesus Gane Gomimi ³⁸ Yohanis Yesus galatutuk, "Guru, ning ulingse nama setang gatiari aeAne gomimi, oli ning geng hap'al karna gangka niluali bana." ³⁹ Agani ibase, Yesus gaubagang, "Ake ginguhap'al ganang karna nama juaka il ajaib gene nane gomi bana, angami anga gang bisa Neng hujat. ⁴⁰ Anggelang, alangba ka ping lavang bana, anga ae pi goang gomi. ⁴¹ Anggelang, Nang gamamolo angaba miama ilatutuk, alalang angaba jial cangkir anu miama enang karna ing anga Kristus ga pengikut, ga upah anga ka ebanaga bana." Bohola Dosa Gagelang ⁴² "Oli nama alalang angaba gagelanghi valkakiri gonongba Neng uparsaja anga anu dosa gene, minuase nama anga val p'al anu miama gotmi halia oli geng miama tang gomi p'ei. ⁴³ Oli, itang anga gagelanghi ing berdosa, se itang anga pataki. Ing mangminuase itang anga gene gabunahi ap'etal, daripada itang alohi naraka abangmi maso, ae ad valing ba amina bana angami, ⁴⁴ mana ba ga ip amina jadibana oli ga ad valing ba amina jadi bana. ⁴⁵ Oli, yaka gagelanghi ing berdosa, se yaka anga paras. Ing mang minuase yaka anga gene gabunahi ap'etal, daripada yaka alohi nama ajong miama naraka gomimi, ⁴⁶ mana ba ga ip amina jadibana oli ga ad valingba amina jadibana. ⁴⁷ Oli, yeng gagelanghi ing berdosa, se yeng anga deko. Ing mang minuase yengkavali anu kelang hi Lahatala ga e hamolang mi maso, daripada yeng kavali alohi nama ajong miama naraka gomimi, ⁴⁸ mana ba ga ip amina jadibana oli ga ad valingba am jadibana. ⁴⁹ Gagomi anga, nama ananu mianumise ad valing miama ihal migene. ⁵⁰ Ihal anga nua, ibase kalo ihal anga gamakil ebanaga, tatabanihi ing bale gene gang makil? Malekangba ihal ae yomi gomimi oli ing malekangba tala sanang tomi anu."