¹ Farisi gamanusia ging topuni jema Yesus gala oli Farisi ba moe Yerusalem mi adu. ² Oli, ging ulingse ga sakolaval susur kede gitang karita ka gitang hala bana. ³ Ang gagelang, nama Farisi oli Yahudi ilkede gingka gitang hala banaga sampe gitang ga vot ujia anga gidata gonong tang gikarang ba ging puni. ⁴ Oli, nama Yahudi moe mana tohingmi gingka ilkede bana gitang hala bana. Oli, rae anga ging utarima ging puni cawan-cawan, kendi-kendi, oli bejana-bejana tembaga. ⁵ Oli Farisi namulvala ging Tuhan Yesus geteng, "Getabaniba ing ugaluali banaga ibase ging susur kede gitang hala bana karita"? ⁶ Yesus gilatutuk, "Sarungfala Yesaya miama kolimi mega mahula, ae surat mi tulis: 'Abang-abang ba ning uada gitop'ol topol tang anga agani, giomi gagahi anga naleta. ⁷ Ging nenguada ka molo-molo bana il ba ging miama nama gala hup'a anga molo bana ging gimau ba pake'. Yesaya 29:13 ⁸ Lahatala gahur gingka ugaluali bana, ging miama gitajoving gene ging gihada angaba ugaluali." ⁹ Angaba Yesus gilatutuk "Ing leko tutuk ta aali ka galuali bana. ¹⁰ Ang gelangba, Musa bola imang iva ing uada, 'oli nama alalangba gahur p'ela miama gimang giva gadang anga gauntu bana'. ¹¹ Oli alangba hur p'ap'ela miama giva gimang gadang se malekangba gengtamina, ¹² ingka iva imang tutuk anga uhalela bana, ¹³ Angase gahapa Lahatala gamang kavali oli ihada anga hela". ¹⁴ Migamota Yesus namarae gaagang, "Inang ajimi nengba nohalela, oli manggarati. ¹⁵ Ilba balelang gomi maso anga nua, ilba tomimi hela anga karita". ¹⁶ "Alangba gavela namang uhalela, gang ae uhalela"! ¹⁷ Angamuse, Yesus oli jema e hila mida gang oli bale hela jema miama nama tohing uhap'a. ¹⁸ Oli, gaubagang bola, "Getabaniba ingka Nahur ading paham bana? Ingka geli sebola ilba manusia gomimi maso anga ilnua oli ilba manusia gomimi hela anga p'ela? ¹⁹ Angaba Yesus bola ilba ping kede anga ilnua, oli neningba piomimi hela anga p'ela p'ana jema fata manami p'ei." ²⁰ Muse gang bola, "Neningba piomimi hela anga karita manusia gomimi hela anga p'ela ae gomimi. ²¹ Ang gagelang, manusia gaganokung p'ela, il gap'uning, tentamina, ²² buha, il umaroa, nama gaali, gomi keta, tomi kalila, mang gahala jia, oli mang gebeng. ²³ Ading manusia gabung mi adu, angaba gaubagang bola p'ela." Namahial Sirofenisia ba Anu Gaugaluali ²⁴ Yesus mate muse Tirus Sidon abang gadang jema. Gang e hila mida nama jua ake geli ganang, ibase nama geli se bola gang ae angami. ²⁵ Nama hial anu setang giavakal tang adu Yesus giaka ejelmi p'ung muding. ²⁶ Nama hial anga Yunani hial, nama ugajali moe Siro-Fenisia mi. Gang Yesus gabagang sebola, Yesus gohi setang anga gatiari e gang gaval anga uhap'a. ²⁷ Angamuse Yesus nama hial anga galatutuk sebola, "Valakiri anga gitula ilkede. Anggelang, jobal hela valakiri gamud kede jobal godu ganang". ²⁸ Ibase, nama hial anga ubagang bola, "Tabi nimang. Ibase, jobaldi meja dumang valakiri gamud butung halu hela anga kede". ²⁹ Angamuse, Yesus nama hial anga galatutuk sebola, "Anggie hur ading ubagang jema jadi, nuaba bale jema." ³⁰ Sengmuse, nama hial jemase gaval ae tanang manami ta jia oli setang p'enang jema. Nama Gaveli Kap'e Gahoning ³¹ Angamuse, Yesus gavak gasoru abang huap'a jema moe gagoang gomi Sidon ke kolang Galilea Dekapolis abangmi. ³² Muse, nama gaveli kap'e tutuk gahala ging miama gabagang gohi gatang miama geng tang mega. ³³ Angamuse, Yesus gavak miama nama rae uhap'a. Gang gatang tel miama gaveli gomi taning, gang oli galebul anga degi. ³⁴ Angamuse, gang geng p'uhi mida burang gauling hekeng bili avening-avening sebola "Efata!", gamanggarati sebola "Balelang!" ³⁵ Angamuse gavelidi balelang, galebul ejeldi gang tutuk nua jema. ³⁶ Oli, Yesus gihapa sebola giohi ake ilanga usarenta ganang ibase ging ututuk tarus. ³⁷ Ging tatabi mibaruati ubagang sebola, "Neningba ging gene anga ajimi nua. Sengmuse nama gaveli kap'e p'enang ilumagia oli namaba tutuk gahala anga tutuk nua."