(Yesus Pilatus Gahondagmi) ¹ Ildo kakuatiase, marang-marang gapal gonong mia ma nama ilgageli, miama sanhedrin. Senghise, ginang ajini to landar Yesus geng pata, gala jema pilatu gatang ini gamugu. ² Angmuse, Pilatus angami geteng, aganise engba Yahudi gonong gi Raja? Angmuse gang gahuranga gabalese bola, engba adia ubagang jia. ³ Angmuse, marang-marang gonong mulai lekotutuk tohing rai miama Yesus gadang. ⁴ Angmu, Pilatus di geteng, angka bola wahur adi balas bangga? Angbake eng uling lekotutuk tohing-tohing adi, miama adang. ⁵ Ami ibase, Yesus ka gahur balas banaga sampe Pilatus di herang. (Yesus Oli Barabas) ⁶ Hari pal Paskah gadang angase, Pilatus biasa nama hukung anu gene gila, mana miama maginang. ⁷ Oli anga mi anga nama anu gane Barabas, gengdi are hukung e mi wama il gajahing di tengtamina gahahami. ⁸ Nama tohing mulai adu Pilatus gabung sebola, gohi gene emanghula gang biasa gene miama gidang anga gajoang. ⁹ Oli, gihur gabak giala tutuk sebola, anise ing ujali e Yahudi ga Raja adi nang gene gilam ana miama minang? ¹⁰ Se gang gelisebola, marang-marang gonong gala adu anga giomi gaka-gaka ketami gala adu. ¹¹ Angaba marang-marang gonong mama tohing giomi tang, Pilatus gohi Barabas ba gogalolang gang gilamana. ¹² Ang muse Pilatus oti gialatutuk: Angase, meningbanang malekang gene miama mamaba ingbola Yahudi garaja adi Gadang? ¹³ Ging oli tang orang duma sebola, galamida geng halia! ¹⁴ Ang muse, Pilatus gang oli gila tutuk getabani? Bela gahala meningba gang ukarajang? Ging oli tang orange duma sebola, galamida geng halia! ¹⁵ Bola miama nama tohing gomi gasanang gene, Pilatus gang Baraba uga lolang segang go gikamanae Yesus, pienang gang hapa sengmuse gang mia maginang ging gala jema geng halia. (Yesus Gahula oli Gajajahing) ¹⁶ Namul wala gonong Yesus gala Bendarmi, gedung pengadilan mi. Oliging gita agang tapuni. ¹⁷ Sengmuse ging kondo milalu, hul tamumung anu miama magenang gang pendo; Ging angami sindal magang anu hana, ¹⁸ Sengmuse ging miama Yesus gakiang tamang. Sengmuse ging angmi geng uada, ubagang sebola; salam Yahudi ga Raja. ¹⁹ Oli ging angami pul aji anu miama gabiang hapa oli go purung sengmuse toku hela geng somba. ²⁰ Ging angmi Yesus gijajahing seng muse, ging angami gakondo penang buka milalu benang buka seng muse ga konda mamoto ba miama magenang gang pendo sengmuse gala jema geng halia. (Yesus Genghalia) ²¹ Angmuse nama lalamal wiag galuali angaba ging geng orole (geng paska) Simon kirene wal, geg lalamal moe desa miadu, geng anga Alexander Rufus giwan, gengba nama gohi kut penang toni. ²² Angmuse, ging angami gala mana anu gadang jema mana anga gane Golgota, ga manggarati sebola gabiang tala gemana. ²³ Ging angami mal mahipang mima tuak ugau hise miama magenang, base gang ka mia bana. ²⁴ Seng muse, ging angmi geng galia e gakondo penang u pena gapa puning sengse miama gi topaul, anu-anu gau lu gomini. ²⁵ Oras anga gadang anga godu atoga, gomi angaba ging geng hahia. ²⁶ Hurba nama tulis miama Yesus geng gene jahala anga nama tulis sebola Raja Yahudi wal. ²⁷ Oli angami anga nama il gajahing gamanusia di miama Yesus gala halia anu gatane goa, oli anu ga pilang goa. ²⁸ Anga hise, surat hamolang gakanapimi, gaubagang sebola: Nama e geng miama nama pela ga hahama mi mala. ²⁹ Anga gelang nama tohing angami lamal anga gibiang miama uga wa vili ubagang sebola: He engba ubagang sebola lahatala ga e garikil sengse angbale bakung vid atoga gomi, ³⁰ awale gene salamat laut uhapa e hesa! ³¹ Aminuse marang-marang gonong, miama nama il gageli gonong gitopuni Yesus galula ubagangse bola, gang nama ebengdi gang gene salamat, ibase gangka gawak gene salamat jadi bana. ³² Biarlah gang geg ae bola genga, Israel ga Raja, nuaba laut tang hela, anghise ningdi egaludi, ging ba nama miama Yesus gabung halia anga gonongdi gahula. (Yesus Amina) ³³ Oras godu talaung gomi, kakuapal ging tang adu jema godu tukanu ujia. ³⁴ Godu mitukanu gomi, Yesus agang galila-galila se bota; Eloi, eloi, lama sabak thani ganbagang sebola! Nimang, nimang, getabani ba ang atang miama noga hipul? ³⁵ Ging hur anga umagia muse, ginang adedeng tabung mate anga gonong gital a tutukse bola ing bake yeng uling, Gang Elia gaagang." ³⁶ Angmuse nama anu ehi-ehi jema gabusa ateng pana adu sengmuse miama anggur kalila migau e miama pul anu mi, sengse galamida peleg topol ubareka, sengmuse angani galatutuk, amihise pingbake gauling hula, Elia adu gala hela e naga. ³⁷ Sengmuse, Yesus gamang puhi galila-galila sengmuse hekeng gamug. ³⁸ Oras anga gadang, angaba sabo pa ehamolang gomimi hila anga takahi walo gatela sampe galolang. ³⁹ Ali nawuel wala ga palba Yesus gahondal mimate gang bola uling bola Yesus ga hekeng gaumate anga tatabani, pohingse gang ubangang sebola; Tatabi, nama adi lahatala gawal! ⁴⁰ Anga mi anga nama hial adedeng leta-leta mimate gieng uling, angami anga, Maria Magdalena, Maria Yakobus muda, giwa oli salome. ⁴¹ Geng adiba tula Yesus mise Galelea abangmi, anga ging gatuali gobalenta. Angami angaba nama hial tohing rai di adu e Yesus gala Yerusalem. (Yesus Gapotung) ⁴² Jigomi kakua anga, giawak usadia, se mi il lialise wid pal pielang gama, penangba hari Sabbat, ⁴³ Yusuf Arimatea jia adu, geng angadi majelis pal ba nama gengada, gengdi gawak sadia-sadia lakoatala gamana hamolang anga baing, oli geng angaba Pilatus ubarani jema Yesus gabaring anga bagang. Umagia bola Yesus amina jema muse Pilatus mi baruati. ⁴⁴ Pilatus umagia bola Yesus amima jema gang angami, namul wala gaka palang ga agang, geteng se bola Yesus tatabi ausuna jema. ⁴⁵ Pilatus geli muse hamul vala gabung umagia baring benang gang miana Yusuf genang. ⁴⁶ Angmuse Yusuf angani jema sabo bala peli pana adu gang angami, Yesus gabarena benang gala hela senga sabo bala genang miama geng baloli seng muse gang miama kumburba gang alu anga mi gapotung, lae paka gomi, gang angami val pal anu gakola adu miama kumbur ga vig gel genang takahi. ⁴⁷ Maria Magdalena oli Maria yoses giu di manaba nama Yesus gabaring mami anga gingdi geli.