¹ YESUS YERUSALEM MI MASO MANG TUANG P'AL MOLO 1 Oras anga, ging Yerusalem, Betfage oli Betania gabung, moe Zaitun abuka tang, Yesus ga sakola val ging gahing, ² Gang gialatutuk, " Abang ba iomi goa jia anga ing mi va, ing va sampe jema, ing ieng uling se keledai lotal nama ka p'ana lamal bado ae anodu nata, ing gahial uhaiaka e tedo ma. ³ Nama joa iabung taganing bola, 'Getabani ba ing gene gagiani?', gialatutuk,' Lahatala ba ning gahing ani hi ning p'ana bale adu.'" ⁴ Anga muse, ging jema se keledai anu ae viag ejel mi anodu, poe balelang mi, viag gabung uhaiaka p'ana adu. ⁵ Nama adedeng ae mate jia ging angami gialatutuk, "Ing nening gene ba ing keledai anga uhaiaka anga?" ⁶ Ging nama ga hur gaedeng nening hur ba Yesus miama giala hup'a anga ba ging miama nama galatutuk, anga muse nama anga gonong lamal. ⁷ anga muse, keledai p'enang ging p'ana adu miama Yesus genang, anga muse gang ga juba p'enang tang mega, seng muse Yesus mida tang miha. ⁸ Oli, nama tohing gi juba anga miama viak mi piapi, oli ging ebeng anga gi juba ging miama te gatang anga uhalia. ⁹ Nama tohing rae gahondal goa oli gamota goa agang moring ubagang se bohula, " Nuahama ! Berkat miama Geng anga ba Lahatala gane mi adu. Mazmur 118;25-26 ¹⁰ Berkat miama Daud ga parenta gomi mi, pi data tulang gonong! Nuahama, toe mana gatela mi!" ¹¹ Seng muse, Yesus Yerusalem mi jema E Hamolang mi. Oli, gang mate gi'uling mana anga mi goleng, Gang ga sakola val karanu valung alo giala Betania mi jema ibase il gomi kakua luang jema. YESUS AGUAMAHI GENETAMINA ¹² Oli, mi iliali ging mate Betania abang uha'pa, Yesus gang kapaing se gang malapal. ¹³ Angami Gang geng uling se aguamahi ejel anu ae mate jia ibase gang geng uling se gavel bae, gang mate va ga'uling gahalang il ebeng di joa kalu ae te anga u gang bisa harak. Ibase gang va te anga gabung se, gangka iljoa harak banaga mang gavel mamaung bae oli aguamahi ga oras gahi u bado. ¹⁴ Anga muse , Yesus te anga galatutuk, "Ake ba nama joa ahi kede gegjia gegmega .'' Oli, angami anga ga sakola val gonong di umagia. YESUS E HAMOLANG MI JEMA ¹⁵ Anga muse, ging jema moe Yerusalem mi. Oli, Yesus e hamolang mi mida se nama ae tala una jia anga muse gang angami mida meja ba nama tang il apbali kadera oli aduang ga hora ajimi gang mia bale oli gang bariti balelang gomi hela. ¹⁶ Anga muse gang gaga nama ake il pbana e hamolang gabung lamal ganang. ¹⁷ Anga muse, Yesus angami ging ajar oli gang gilatutuk, "Nening ba nama tulis, na e anga gaubagang sebula e sambajang miama nama nua gie abang-abang tang adi giala hama'? Ani ibase, ing mia p'along mana gene." ¹⁸ Oli, anga mi anga marang p'al oli taurat gaboma gonong di umagia muse ging angami viag gola gengtamina. Anga gelang, ging gip'ukang gamali nama tohing anga ajimi navera ging ga hur umagia. ¹⁹ Oli, angami il mulai kakua, Yesus ga sakola val gala abang uhap'a. IUGALUIANG MIAMA LAHATALA GOMI 20 Anga muse, koko ging angami levat, ging uling se aguamahi ejel p'enang tatabi amina to'e dol mi hela gie bariking ujia. ²¹ Petrus gang ueling gang Yesus galatutuk, ''guru, uling! Aguamahi p'enang angbola gohi amina p'enang amina jema!" ²² Anga muse, Yesus gi hur balas, ''Iman parasaja anga puni e mang ae Lahatala giomi mi. ²³ Nang bola hur tatabi miama yalatutuk, alang angaba ubagang se bola adual adi, p'uhi oli bariti tang mi i di gap'ukang ka mali banaga, anga a parasaja bola nening ba ang ubagang anga gang jadi, angase il anga gang ae miama ala hama. ²⁴ Anga gelang ba nang bola iyalatutuk, nening ba ing amur miama Lahatala gadang oli bagang, ing parasaja se bola ing mia jema bae, ani hise il anga nama miama menang bae. ²⁵ Oli, ing bola mate amur, nening ba ing gene migahala miama ajoa a edeng galahama anga di uampo, anga hise Pimang Lahatala toe sorga mi gang pi gahalang di uampo. ²⁶ Ibase, ing kalu i kaku i serang gagahalang uampo banaga angase, Pimang Lahatala toe sorga mi di gang ka pigahalang anga uampo banaga." YAHUDI GA BOMA GONONG YESUS GA KUASA U TAGANING ²⁷ 27 Ging oli, bale Yerusalem mi adu. Oras angami Yesus ae garaja e gomi lamal jia, marang p'al, taurat ga boma oli yahudi ga boma gonong gola adu. ²⁸ Ging, angami galatutuk, ''Angase kuasa nanening senghise Ang il adi gonong gene, angase alang ba kuasa miama menang hi Ang il adi gonong gene. ²⁹ Yesus gialatutuk, "Nang bola hur anu miama u iyeteng. Na hur adi gaedeng, anga se nang bisa kuasa nanening senghise nang il adi gene. ³⁰ Angase Yohanis jial miama nama gabiang tang anga toe sorga mi hela bae manusia mi adu bae? Na hur adi u gaedeng!" ³¹ Ging angami tomi anu talatutuk ubagang se bohula, ''Ping kalo ubagang, 'Sorga mi,' angase gang bola, ' Angase, getabani ba ing ka parasaja banaga?' ³² Ani ibase, ping ga hur anga ga edeng, 'Manusia mi adu'?'' Nama p'al gonong nama tohing rae up'aliling oli ging geli se bohula Yohanis anga tabi-tabi gahing vala. ³³ Anga gelang, ging angami Yesus galatutuk, "Ning ka geli banaga." Oli, Yesus angami gialatutuk," Anga se Neng di ani, Nengdi ka hur anga miama ialatutuk bola kuasa nening hise nang il adi gene."