¹ Vakwetu, shihoro shamumutjima wande shino ashi va Israel ndi ngava yoghoke, yino ndjo ndapero yande kwa Karunga. ² Ame kuna kutapa ghumbangi wa kuhamenakukwavo ashi vavo kukondjera Karunga, ano ngoli vavo kapi vakara naghukonentu. ³ Mukondashi vavo kapi vayiva ghuhungami wa Karunga, mbyo vaturapo wavo vavene, mbyo vapira kukutapa kughuhungami wa Karunga. ⁴ Mukondashi Kristus ndjo atikitiliromo veta nadintje mposhi kehe ghuno wa kupura mumwendi ngawane ghuhungami. ⁵ Moses kwatjanga vyakuhamena ghuhungami wa veta ashi: ''Muntu wa kutikitamo veta ya ghuhungami momu mu veta mo ngaparukira.'' ⁶ Ano ngoli ghuhungami wakutunda kulipuro kulipuro kwatanta ashi: ''Kapishi ngaghu kupure mumutjima ghoye ashi, 'Áre ogho ngarondo ngayendemo muliwiru?' (ntani ashi, are ogho ngakayito Kristus ngakaghurumuke); ⁷ ndi kapishi ghughambe ashi, 'Are ogho ngayendo aghurumuke muShirongo shavafe?''' (kutanta ashi, ngakavhumbure Kristus mughufe). ⁸ Nane weni omo ana kutanta matjangwa, ashi? ''Nkango pepi nove dakara, mukanwa koye ntani namumutjima ghoye.'' Yayo ndjo nkango ya lipuro oyo tuna kuyuvita. ⁹ Nkene oghu tongonona ghughambe ashi Jesus ndje Hompa, ove ghupure namutjima ghoye ashi Karunga kwa muvhumbura kughufe, ove ngaghu kaparuka. ¹⁰ Mbyovyoshi muntu kupura na mutjima wendi mpo ashi awane ghuhungami, ntani ghuye atongonone na kanwa kendi makura ngaka paruke. ¹¹ Matjangwa kuna kutanta ashi, ''Kehe ghuno wakupura mumwendi kapi ngavamufita ntjoni. ¹² Kapinka ngapakara makushuvo pakatji kava Juda na va Gereka. Mukondashi navantje Hompa wavo ghumwetupu, ghuye kutungika na ghuntungi wendi wa ghunene na vantje va kukuya lidina lyendi. ¹³ Matjangwa kwatanta ashi, kehe ghuno wa kukuya mulidina lya Hompa ngaka paruka. ¹⁴ Vavo ne, weni omo ngavavhura kukuya kukwendi nkene kapi vapura mumwendi? Weni omo ngavapura mumwendi nkene shi kapi vayuvha mbudi yendi nampili rumwetupu? Weni omo ngavapura nkeneshi kwato ogho ana kuyuvito mbudi yendi? ¹⁵ Weni omo vayuvita mbudi, nkeneshi kwato wakuvatuma?- Yira momu atanta matjangwa ashi, ''Vyawapa ghunene nkeneshi ava mudingura vakuyuvita mbudi ya Ruhafo!'' ¹⁶ Ano ngoli kapishi navantje valimburuko ku mbudi ya ruhafo. Isaya kwatanta ashi, ''Hompa, are ogho apuro mumbudi yetu oyo twayuvitanga?'' ¹⁷ Lipuro kuliwana nkene aghuyuvhu mbudi, ntani mbudi kutunda mukuyuvita Kristus. ¹⁸ Ame anupura ashi, ''Vyaghushili kapi vayuvha mbudi ndi?'' vayuvha, matjangwa kwatanta ashi, ''Liywi lyavo kwayenda mwayendo ghudjuni mudima, ntani nkango davo kwakatika nkoku wakatwa ghudjuni.'' ¹⁹ Ame, anu pura nka, ashi ''Muhoko wa va Israel kapi wa kwatire lighano ndi?'' pamuhovo Moses atanta ashi, ''Ame nganurwa lifupa kukwenu omo nganuruwanita dimuhoko dahana mulyo. Ame nganu ruwanita dimuhoko dakupira ndunge, mbo nganuruwanita ngava mgarapite.'' ²⁰ Isaya kwa ghambire ahana ghutjirwe ashi, ''Ame vangwana ovo vapiliro kuntjana-ntjana. Ame kwa monekera ovo vapiliro kushana kuya kukwande.'' ²¹ Kuhamena va Israel ghuye kwatanta ashi, ''Mayuva naghantje ame kwatapa maghoko ghande kumuhoko wapiro kulimburuka wakaro naghurunde.''