¹ Ame kuna pura asahi, Karunga kwa shuva muhoko wendi ndi? Nampili kuna manga. Ame numu Israel wa muruvharo rwa Abraham, wa mulira lya Benyamin. ² Karunga kapi ashwena muhoko wendi ogho atoghorora virugho vyakapito. Kapi mwavarura matjangwa vya kuhamena Elia, Ghuye kwatapire rushivano kwa Karunga kuhamena va Israel? Ashi, ³ ''Hompa vana dipaya vaporofete voye, vana yungurura na kudjonaghura vidjambero vyoye. Ame mpentjande nahupopo, weno vana shana kudipaya name.'' ⁴ Karunga weni omu alimburulire kukwendi? kwalimburura ashi, ''Nahupitapo varume mayovi matano-namaviri ovo vapiro kutongamena ngoro kwa Bara.'' ⁵ Nampili ntantani weno, Mpokalimo kambunga ghona kavantu ovo atoghororamo Karunga morwa nkenda yendi. ⁶ Ano nkeneshi kwavatoghorora morwa nkenda, kapishi morwa ya viruwana. Nkenda ndi kapi ya kara nkenda-nkenda. Matjangwa ghamwe kuna kutanta ashi, Nkeneshi morwa ya viruwana, na kuvhura nkashi kukara mu Nkenda; viruwana nakuvhurashi kukara vya muviruwana. ⁷ Weni ngoli? Ovyo vashanine va Israel, kapi vaviwanine, ovo atoghorora vavo mbo tupu vaviwano, vakuhupako kwava kukutita dimutjima. ⁸ Yira momu atanta matjangwa ashi: ''Karunga kwa vapa mpepo ya ghugova, mantjo ghavo ghapire kumona, ntani matwi ghavo ghapire kuyuvha, dogoro nakuliyuva lya namuntji.'' ⁹ Yira momu tupu atanta David ashi, ''Ndya davo ngadikara likwe lyavo, vipito vyavo ngavi kara rutenda rwavo na shipundukito shavo, na mfuto yavo. ¹⁰ Tura kaghuvi pa mantjo ghovo vapire kumona, ntani tura mudigho pa dimughongo davo da kupira kutundapo.'' ¹¹ Ame anu pura ashi, ''Va Juda kwa punduka mbyo vawererera ndi?'' Nampili kuna manga. Ghundjoni wavo kwa yitira vapagani liparu, mposhi ngayuvite va Israel mfudu. ¹² Ndjo da va Juda kwayitira ghudjuni lirago lya linene, ruhepo rwavo rwa pampepo kwayitira vapagani ghungagho wa ghunene,Lirago lya kutika kuni nko ngali karo nkeneshi shivaro nashintje shava Juda ngashitikiliramo. ¹³ Ame kuna kughamba nanwe vapagani ashi, ame kwakara numu Apostoli wa vapagani, mbyo na fumanena muviruwana vyande. ¹⁴ Mposhi nganuyuvite muhoko wande mfudu. Mposhi walye vamwe ngava parukamo. ¹⁵ Nkene likugaghunuko lyavo kwayitira ghudjuni ghu kwavo na Karunga, litamburo lyavo ngali kara yira livhumbuko kughufe? ¹⁶ Mboroto ya kuhova kukanga nkene yina pongoka, nayo vanaduvu yina pongoka. Dikare ndandani da shitondo nkene da pongoka na dimutavi nado dapongoka. ¹⁷ Dimutavi dimwe damaghywe wakutapeka kwa ditetako, makura mbyo, varukirako dimutavi da maghuywe ghamuwiya, kutanta ashi anwe vapagani munashoroko, mbyo munakukwata kana kumwe na shitondo sha ghuywe munwe mashini ghasho, ¹⁸ Walye mwakunene pitanga mupitakane dimutavi odi vatetako. Nkene ghukunenepita, yiva ashi kapishi ove ndandani oyo ya kwato lidi lya shitondo, nane ngoli ndandani yalidi ndjo ya kukwato ove. ¹⁹ Makura ngaghu ghambe ashi, ''Dimutavi kwadi tetako mposhi ame vanture ko''. ²⁰ Mo ngoli. Vavo kwava tetako mukonda ya kupira kupura kwavo, ove kwakuturako mukonda ya lipuro lyoye. Ngoli kapishi ghuvikunene pitire, kara na ghutjirwe. ²¹ Nkeneshi Karunga kapi akukata-kata kutetako dimutavi dene-dene, nampili noveshi kapi ngakukengerera ghukarerereko. ²² Monenu, ghuwa na lishandu lya Karunga: ghuye kwagarapire nava Juda ovo vatundomo, ghuye muwa kukoye nkene aghukara mughuwa wendi. Nkene kapi ngaghutikitilira mo nove ngakutetako. ²³ Nampili va Juda navo, Nkene vapira kukara ngoli mukupira lipuro, ndi ngava vavyutirako waro. Karunga kuvhura kuva turamo nka vavyukiremo. ²⁴ Ove vateta kughuywe wa kupira kutapeka, mbyo vakutura kuywe wa kutapeka, ovo vahameno kiughuywe wa kutapeka, ghureru kuva vyutirako kughuywe oko vahamena. ²⁵ Vakwetu, mposhili shihoramo shimwe, kunahora mushiyive, mposhi ngamushayeke kuhuguvara ghukonentu wenu: kukukuta mutjima kwava Israel kapi kwa karererapo, ngoli ngava kara tupu dogoro nange shivaro sha vapagani ovo ngavayo kwa Karunga ngashitikemo. ²⁶ Muhoko wava Israeli naghuntje ngaghuparuka, yira vatjanga ashi:'' Muyovoli ngatunda mu Siyoni. Ghuye ngaghupamo ghudini Karunga mulira lya Jakop, ²⁷ Lino ndyo likukwatakano lyande kumwe navo olyo ngani turapo, opo nganudongononapo ndjo davo.'' ²⁸ Mukonda yakushwena mbudi yaruhafo, vaJuda mbyo vana kara ghunkore naKarunga mukonda yenu anwe vapagani. Ano ngoli vavo mbo atoghorora Karunga, ntani ava hora ghunene mukonda yaVakurona vavo. ²⁹ Mukonda shi Karunga kapi atjindjanga maghano ghendi kwavo atoghorora mbyo ava tungika. ³⁰ Shirugho shakapito anwe kapi mwalimburukire kwa karunga, ano ngoli ntantani anwe Karunga ana mufere nkenda morwa kupira kulimburuka kwa vaJuda. ³¹ Nampili ntantani mongoli ,morwa nkenda oyo vaJuda mbyo vapira kulimburuka kwa Karunga. Mposhi yira momu vamufera nkenda , navo Karunga ntantani ngavafere nkenda. ³² Mbyovyo shi Karunga kwa tura navantje ashi vapire kulimburuka ngava wape mukuvafera nkenda navantje. ³³ Ee, ghungagho wa Karunga ghuyingi unene ghukonentu wendi na ghuyivi wendi ghuyingi unene! Are ghumwe wa kuvhura kushingonona viponga vyendi, dikare ndjenditito dendi are wakuvhura kudi kwata lighano! ³⁴ Yira momu atanta matjangwa ashi,'' Are ghumwe ogho ayivo maghayaro gha Hompa ntani are wakuvhura kumupa maghano? ³⁵ Ndi are ghumwe atapo vyuma kwa Karunga, ashi kumeho Karunga ngakavimuvyutire?'' ³⁶ Mbyo vyoshi navintje ndje avituropo, mukonda yendi mbyo vya karapo ntani navintje ngavivyuka kukwendi. Karunga vamufumadeke naruntje na naruntje. Amen.